Educación renova a súa web como paso previo á adopción do dominio .gal

A Consellería de Cultura, Educación e Ordenación Universitaria, en colaboración coa AMTEGA, vén de renovar o seu portal web edu.xunta.es, que desde hoxe mesmo está ao dispor da cidadanía galega, facendo uso do xestor de contidos aberto Drupal 7, que permite melloras no rendemento, seguridade, uso e sociabilidade desta ferramenta institucional, ademais da adaptación e harmonización co deseño web corporativo da Xunta de Galicia.
As melloras que se achegan neste redeseño amósanse a través dunha interface máis amigable e moderna do espazo web do departamento educativo autonómico que busca achegarse e responder eficazmente ás demandas de coñecemento e información por parte da comunidade educativa galega.
O seguinte paso, que se acometerá en breve, será a migración de contidos e a adopción do dominio .gal, apoiando a divulgación da marca galega na Rede.
Cómpre destacar que neste novo web todas as novas teñen a opción de recomendar a través das redes sociais máis estendidas: Twitter e Facebook. Así mesmo, co fin de mellorar as características de acceso universal, incorpórase a funcionalidade de “Escoitar” en todas as novas publicadas. Finalmente, esta ferramenta dispón no apartado da Unidade de atención a centros (UAC) dun formulario para a comunidade educativa que permite o envío de consultas, comentarios, incidencias, etc.