martes, 15 de setembro de 2015

A CIG-Ensino denuncia o recorte de profesorado co que a Consellaría de Educación castiga o ensino público

Iníciase o curso en secundaria con moitos centros sen profesorado.
 
A CIG-Ensino denuncia que a Consellaría de Educación continúa sen atender as demandas que están a facer diferentes centros públicos que se atopan sen profesorado para iniciar con normalidade o novo curso escolar. Este martes 15 de setembro iniciase o curso en secundaria con falta de profesorado nos centros, masificación de aulas e maior porcentaxe de docentes que van ter quer impartir unha ou máis materias das que non son especialistas.
>A estas alturas son moitos os centros que seguen sen ver atendidas as necesidades de profesorado comunicadas á Consellaría de Educación. Os recortes constátanse tamén na adxudicación definitiva de destinos provisionais de secundaria que ven de resolverse e na que atopamos adxudicacións irregulares, perfís disparatados e adxudicacións de prazas non solicitadas. Educación adxudicoulle destino nesta convocatoria a 3.973 profesores e profesoras, dos que 1078 terán que impartir materias afins, o que representa un 27%  do total (incrementándose a cifra nun 15% en relación ao curso pasado). Así mesmo increméntase o profesorado desprazado nun 13%. Observamos tamén como hoxe o 26% dos cadros de persoal dos centros de secundaria muda cada curso co que supón en detrimento da calidade do ensino e prexuízo para os/as docentes.

Súmase a isto os conflitos derivados da aplicación da LOMCE sen ter desenvolto a tempo a normativa necesaria para aplicala e que vai supor maior segregación do alumnado, confesionalidade, españolización e privatización e menos galego nas aulas. Ademais a CIG-Ensino denuncia as dificultades que se lle están poñendo ao alumnado para poder cursar unha materia alternativa á Relixión en Bacharelato. Na combinación de materias que o alumnado pode elixir como materias específicas ou de libre configuración, dáse a circunstancia de que a única materia dunha hora de duración é Relixión, o que se traduce en que haxa alumnos e alumnas que, se non contan cunha materia alternativa ofertada polo centro, se vexan obrigados a coller relixión para completar o seu itinerario formativo.

Diante desta situación, a CIG-Ensino participará -como membro da Plataforma Galega en Defensa do Ensino Público- na concentración convocada o mércores 16 de setembro ás 11:30 horas diante da Consellaría de Educación, en San Caetano co lema “Máis profesorado, menos alumnado por aula, ensino público e de calidade!

Ningún comentario:

Publicar un comentario