luns, 21 de setembro de 2015

A ferramenta docente Moodle, traducida ao galego nun 86%

A Oficina de Software Libre do CIXUG vén de dar a coñecer que a tradución ao galego de Moodle superou finalmente a taxa do 85%. Como lembraremos, Moodle é unha aplicación web educativa e virtual, de distribución libre, que se dirixe a botar unha man ao profesorado na creación de comunidades de aprendizaxe en liña, entre outras funcionalidades importantes. A localización á nosa lingua da ferramenta que está a impulsar a devandita Oficina saldouse no mes de agosto co envío dun total de 14.753 cadeas (máis de 21.000 termos) á versión estábel de Moodle (versión 2.9.1). A traxa de tradución, en base a isto, pasou de ser do 77% a situarse nun 86%.
Segundo reflicte Mancomún, con este fito o galego pasa a integrar a listaxe das trinta linguas nas que a aplicación está traducida en máis dun 80%.
Ao fío destas novidades, a Oficina lembrou que malia que os traballos foron remitidos á última versión de Moodle, a versión 2.9, a ferramenta de tradución fai unha propagación das cadeas cara as versións anteriores, polo que as instalacións da ferramenta non actualizadas tamén poderán tirar proveito deste traballo e obter unha actualización do paquete de idioma.
Recordar tamén que Moodle está a ser empregado polas tres universidades galegas para xestionar as súas aulas virtuais: o Campus virtual da Universidade de Santiago de Compostela, o Campus virtual da Universidade da Coruña e o Servizo de Teledocencia da Universidade de Vigo.

Ningún comentario:

Publicar un comentario