Exixen que a consellaría de Educación presione en Madrid para que a LOMCE non se aprobe

A Plataforma galega en defensa do ensino público entrégalle un escrito a Jesús Vázquez en que o instan a se colocar do lado "do clamor popular" ou a presentar a súa demisión.

 A Plataforma galega en defensa do ensino público entregou esta quinta feira un escrito no rexistro da consellaría de Educación para instar o seu titular, Jesús Vázquez, a que presione en Madrid para que a contrarreforma educativa de Wert, batizada como 'lei de mellora da calidade educativa', non supere a súa tramitación parlamentaria. Ou iso ou que demita. 
"Se vostede non se pon á fronte do clamor popular contra a LOMCE ou debe abandonar o seu cargo por actuar en nome do PP e non ao servizo do ensino público galego", sinala o texto entregado onde se lle advirte a Vázquez que está a refrentar "unha lei que liquida a igualdade de oportunidades [...] elitista, clasista e segregadora".
Alén de tales cualificativos, a Plataforma subliña máis unha vez o ataque ás linguas propias das nacións que fan parte do Estado español, nomeadamente do galego, malia que, após dicir que lera a lei, o conselleiro di que é "totalmente respetuosa" con estes idiomas "e coa súa aprendizaxe".
Porén, non só serán os centros educativos os que decidan cantas horas dedican á ensinanza nestas linguas senón que fican relegadas á condición de materias de especialidade, por debaixo da relixión católica, e impón ademais a obriga de que os gobernos dos territorios financien con diñeiro público escolas privadas onde se garanta o ensino integramente en español "para evitar a escolarización no noso idioma", declarou Anxo Louzao en representación da Plataforma. Aliás, a redución do 45% ao 35% a autonomía dos territorios con lingua propia para achegaren contidos ao currículo educativo fai que a realidade social, histórica e cultural da Galiza, para alén da lingüítica, fiquen fóra das escolas.

Mocións en claustros e Concellos, cacharelas e unha 'Marcha a Compostela' contra a LOMCE

A Plataforma Galega en Defensa do Ensino Público presentou este martes un calendario de mobilizacións co obxectivo de frear a aprobación da Lei Wert e valorou como "un éxito rotundo" a folga no ensino do 9 de maio e as manifestación nas vilas e cidades galegas nas que participaron máis de 40.000 persoas. As accións previstas inclúen concentracións, mocións en claustros e Concellos, cacharelas e mesmo unha Marcha a Compostela dende diferentes localidades e comarcas do país, percorrendo a pé os últimos quilómetros, cando menos, dende as catro estradas máis importantes de acceso a Compostela (Ourense, Lugo, Pontevedra, A Coruña), coincidindo co debate parlamentario da LOMCE. 

Coincidindo co debate parlamentario da LOMCE levarase a cabo unha Marcha a Compostela dende diferentes localidades e comarcas do país

O calendario de mobilizacións iníciase o 30 de maio coa entrega en San Caetano dun escrito no que se insta ao conselleiro de Educación a que "ao igual que fará o goberno vasco e catalá, o Goberno galego presione ao Goberno do Estado para a non aprobación da LOMCE, por ser unha lei españolizadora, antigalega e centralista". O 5 de xuño, tamén en San Caetano, haberá unha concentración diante da Consellería de Educación. Levarase a cabo unha simulación de “apertura” dun expediente disciplinario ao Ministro Wert, polo seu “maltrato ao ensino público".

Tamén haberá protestas na noite de San Xoán para que nas cacharelas do país se “queime a LOMCE” de xeito simbólico

O xoves 13 de xuño haberá actos contra a LOMCE nas diferentes comarcas do país, consistentes na lectura de diferentes textos por persoeiros das diferentes localidades, así como actuacións musicais e outras accións. No último claustro do curso a Plataforma instará os diferentes claustros dos centros educativos para que no derradeiro claustro deste curso académico saquen unha resolución en contra da LOMCE e dos recortes no ensino público. De igual xeito solicitaráselle aos grupos da oposición ao PP que presenten moción nos concellos para que demanden a aprobación dun texto solicitando a non aprobación da LOMCE e que se faga chegar ao conselleiro de Educación. Tamén haberá protestas na noite de San Xoán para que nas cacharelas do país se “queime a LOMCE” de xeito simbólico.

A Consellería de Educación négase a conmemorar o Día de Rosalía no calendario escolar

A CIG-Ensino afirma que a Consellería de Educación “negouse taxativamente” a que no apartado das conmemoracións do calendario escolar apareza como data a celebrar o Día de Rosalía, 24 de febreiro. Mais no calendario si aparece o día dos Dereitos do consumidor.
A central nacionalista entende que “só nunha permanente actitude de rexeitamento de todo o relacionado coa nosa lingua, nunha negativa a potenciar o uso do noso idioma, no autoodio podemos explicar esta actitude de Educación”
Horario excesivo
Noutra orde de cousas, a CIG-Ensino propuxo que o curso escolar comezase os días 12 e 17 de setembro e lembroulle á administración que na Galiza hai un horario escolar que “supera en moitas horas o de países que sempre se sitúan como modelos en materia de Educación. De acordo cos datos que figuran na propia páxina do MEC, en Galiza o alumnado de Secundaria ten 1050 horas lectivas, fronte ás 868 de Finlandia, as 983 de Francia e as 973 de Alemaña. En Primaria tamén o alumnado galego, con 875 horas, supera as 621 de Finlandia, as 714 de Alemaña e mesmo as 872 de Francia”.

Camiñatas, accións na rúa e 'queimar' a LOMCE nas cacharelas: Galiza rexeita a lei de Wert

A Plataforma galega en defensa do ensino público presentou esta terza feira un calendario de mobilizacións en contra da lei que recibiu o visto e prace no Consello de ministr@s do 17 de Maio e batizada como 'de mellora da calidade educativa'

 Após o "éxito rotundo" da greve xeral no ensino convocada o 9 de maio, con manifestacións en todo o País das cales fixeron parte por volta de 40.000 persoas, toca seguir revolvéndose en contra dunha norma que, tal e como a definiu Anxo Louzao, responsábel da CIG-Ensino e que falou en representación do profesorado, "pretende unha españolización absoluta do sistema educativo e evidencia que o poder executivo que reside no Consello de Ministros cambiou de lugar e está na Conferencia Episcopal e na patronal do ensino privado".
Como voceiro das familias tomou a palabra Fernando Lacaci, presidente da federación de Anpas de Compostela, cualificou a lei do ministerio de Educación como "unha lei de parte e de partido que nace sen o consenso demandado desde hai décadas" á hora de acometer unha reforma educativa. O papel que as nai e pais de alumn@s nos consellos escolares "desaparece", dixo, e acrecentou que namentres a relixión "en lugar de desaparecer pasa a ser unha materia con efecto chamada", con repercusión no expediente académico e que conta para a obtención dunha bolsa de estudos.
Por derradeiro, Víctor Giadás, integrante da Liga estudantil, lembrou que a LOMCE non conta tampouco co apoio do alumnado e tildouna de "involucionista". Todos os colectivos que fan parte da Plataforma (para alén dos xa citados estarían Comités, Federación provincial de Anpas de Lugo, Federación de Anpas da Costa da Morte, Federación de Anpas de Ferrolterra, AS-PG, Movemento Dezao en defensa do ensino público, Sindicato de Estudantes, BNG e Galiza Nova) fixeron un chamado ás mobilizacións cuxo calendario se reproduce deseguido:

• 30 de maio ás 11.30h en San Caetano => entrega dun escrito no cal se insta ao conselleiro de Educación a que, ao igual que farán os gobernos vasco e catalá, presione en Madrid para a non aprobación da LOMCE
   
• 5 de xuño ás 11.30h en San Caetano => concentración diante da consellaría de Educación. Simulación de apertura dun expediente disciplinario ao ministro Wert, habida conta do seu 'maltrato' ao ensino público, mediante o cal 'será expulsado' do sistema educativo
   
• 13 de xuño ás 19h a 20h nas comarcas de todo o País => acto contra a LOMCE que consistirá na leitura de textos, así como actuacións musicais
   
• Último claustro do curso => a Plataforma instará aos centros educativos para que saquen unha resolución en contra da LOMCE e dos recortes no ensino público
   
• Mocións nos concellos => solicitaráselles aos grupos da oposición dos diferentes concellos da Galiza que demanden, nos respectivos plenos municipais, a aprobación dun texto solicitando a non aprobación da lei e que se lle faga chegar ao conselleiro de Educación
   
• Cacharelas => transmitiremos as nosas reivindicacións ás diferentes vilas, cidades e aldeas, co fin de que nas cacharelas do País 'queimen' a LOMCE
   
• Coincidindo co debate parlamentario da norma => levarase a cabo unha Marcha a Compostela dende diferentes localidades e comarcas do país, percorrendo a pé os últimos quilómetros, cando menos, dende as catro estradas máis importantes de acceso a Compostela (Ourense, Lugo, Pontevedra, A Coruña).

"O PP quere modificar o sistema educativo para dende el modificar o sistema social"

Luz López, secretaria xeral de CCOO-Ensino, presentou este mércores o Libro Verde da Educación elaborado polo sindicato. O libro, que leva meses sendo presentado en todo o Estado, comeza facendo un diagnóstico da situación actual do ensino e de que aspectos se deben mellorar. A continuación debulla as criticas que dende CC.OO. se lle fan ao proxecto de lei da LOMCE e finalmente realiza un conxunto de propostas para mellorar o sistema educativo en contraposición coas que fai a LOMCE. "O Goberno sacou un proxecto de lei sen ningún tipo de consenso nin debate e nós o que pretendemos con este libro é manter o debate aberto e que toda a comunidade educativa poida realizar achegas", explica Luz López, que conclúe que "esta lei é completamente regresiva e non vai mellorar en absoluto as carencias que si ten o sistema educativo".

"O Goberno sacou un proxecto de lei sen ningún tipo de consenso nin debate e nós o que pretendemos con este libro é manter o debate aberto e que toda a comunidade educativa poida realizar achegas"

A proposta do ministro Wert, aprobada xa polo Consello de Ministros, iniciará agora o seu trámite parlamentario. Dende os colectivos opostos á reforma existe o temor de que o PP module os tempos para facer coincidir a súa apobación -previsiblemente cos seus únicos votos- cun momento de desmobilización da comunidade educativa: xullo ou o comezo do mes de setembro: "Eles teñen a forza parlamentaria suficiente para xogar cos tempos e van tentar que a comunidade educativa estea máis apagada. Por iso o obxectivo é manter as mobilizacións até final de curso para retomalas con forza en setembro. Pero si que existe a posibilidade de que se aprobe en xullo e aí a comunidade educativa estaría máis desmobilizada", afirma Luz López.

A responsable de CCOO-Ensino tamén salienta que "esta lei ratifica e pon por escrito os recortes que se viñeron facendo en todos os servizos públicos e polo tanto no ensino"

A responsable de CCOO-Ensino tamén salienta que "esta lei ratifica e pon por escrito os recortes que se viñeron facendo en todos os servizos públicos e polo tanto no ensino" e engade que "estamos nun momento de moita precariedade no que se refire á dotación orzamentaria e de persoal dos centros. Perdéronse en toda España 60 mil postos de traballo no sistema educativo. Esta lei asenta e agrava os recortes. O que pretenden é modificar o sistema educativo para dende el modificar o sistema social como eles queren".

Tamén lembra que o Goberno "está esforzándose moito" para que a aprobación da LOMCE non coincida no tempo coa reforma da lei universitaria estatal: "non queren que coincidan no tempo porque saben que así nos poderían por a toda a comunidade educativa en pé de guerra. E vendo a LOMCE non é difícil prever que liñas pode ter esa reforma universitaria".

Alonso Montero afirma que a Academia podería recorrer a LOMCE

O presidente da Academia Galega, Xesús Alonso Montero mostrou a súa oposición á LOMCE e mesmo indicou a posibilidade de que a institución que el preside presentase un recurso de non o facer o goberno da Xunta, como os cataláns e galego a súa aprobación. “Hai que situarse ante calquera disposición, veña de onde veña, que entendamos que merma os dereitos da lingua galega” sinalou. 

O profesor e presidente da RAG, Alonso Montero aplaudiu os recursos presentados por Euskadi e Cataluña contra a Lei Orgánica de Mellora da Calidade Educativa (LOMCE) da que mostrou a súa oposición. Ao seu ver, a reforma educativa “merma os dereitos da lingua galega” e sinalou que, se instancias políticas non mostran a súa oposición e recorren a lei, hai outros colectivos en defensa da lingua que poden facelo, para o que citou a Mesa pola Normalización Lingüística e a propia Real Academia Galega que, segundo dixo, teñen que opoñerse a calquera medida que vai en contra da normalizaicón lingüística. 

As declaracións do presidente da Academia veñen logo das súas polémicas intervencións que provocaron, entre outras, a resposta da propia Mesa pola Normalización Lingüística, que lamentou que o máximo representante da Academia fixese gala nunha entrevista dun uso non normalizado do galego.

Estas primeiras semanas de Alonso Montero estan a ser especialmente intensas xa que, en arredor dun mes, foi protagonista de diferentes polémicas, apareceu en numerosas entrevisas en medios, presidiu todos os actos do Día das Letras Galegas e dedicouse tamén a visitas institucionais, a máis recente, a da presidenta do Parlamento Galego, Pilar Rojo. 

"De ratos e nenos", vídeo-protesta dun colexio contra o repago no comedor

Cando van comezar as vacacións, moitas familias saben que o curso que vén será aínda máis costa arriba no comezo escolar. Os comedores escolares deixarán de ser gratuítos e en sinal de protesta, a ANPA do colexio San Sadurniño está a difundir “De ratos e nenos”, o vídeo co que manifestan a inxustiza da medida. Video no interior. 

É o propio alumnado o que protagoniza o vídeo producido pola ANPA do colexio de San Sadurniño co fin de protestar polo repago nos comedores escolares. Ata 4,5 euros diarios terán que abonar as familias para que as criaturas podan comer na escola e non teñan que coller o autobús de regreso as súas casas co estómago baleiro.”Un custe demasiado elevado para moitos pais e nais que hoxe manteñen un fogar con axudas mínimas... ou incluso sen elas” din na presentación do video-protesta no que se recrea a conversa de tres cativos desde unha xanela do propio comedor desde a que poden ver ao resto do alumnado xantando nas súas mesas. 

Todas as crianzas comen menos as  tres que miran pola xanela que encetan unha conversa na que tentan explicarse que é o que está a pasar. "Teño tanta fame que mesmo podería comer un amigo" di un dos tres cativos que non entende as razóns de ter que agardar o bus para ir xantar a casa. Saben que agora toca comer tarde de máis. "As cinco e eu a esa hora xa merendo" comentan nunha conversa na que os pequenos tamén se preguntan por que no colexio non se poden levar fiambreiras. "Polo perigo de intoxicación" recibe como resposta. "Intoxicarse como os ratos?" repregunta. "Polo menos os ratos comen á hora e sen ter que pagar". 

​

A Plataforma en Defensa do Ensino Público convoca manifestacións nas catro provincias o vindeiro 9 de maio ás 19:30 horas

Estas mobilizacións enmárcanse dentro dos actos da xornada de Folga Xeral no Ensino convocada para esa data

A Plataforma en Defensa do Ensino Público na que se integran CCOO, FETE-UGT, CSIF, CONFAPA-GALICIA, Sindicato de Estudantes, IESGA e Escola Viva, convoca manifestacións nas catro provincias galegas con motivo da Xornada de Folga Xeral no Ensino que esta plataforma ven de convocar para o día 9 de Maio.

Estas manifestacións terán lugar nas cidades de A Coruña, Lugo, Ourense e Vigo ás 19:30 horas. A Plataforma manifesta que se escolleu o horario de tarde para a celebracións das mesmas para facilitar ás nais e pais do alumnado, que son convocantes desta xornada de folga, a asistencia ás mesmas e que puideran expresar o rexeitamento á LOMCE e ás políticas de recortes dos gobernos central e autonómico.

A Plataforma lamenta que non puidera facerse efectiva unha mobilización unitaria de todas as organizacións que representan á comunidade educativa galega, a pesar dos ofrecementos que se fixeron para iso.

A bisbarra súmase ao parón educativo do día 9 cunha protesta na Praza dá Igrexa

A comunidade educativa de Deza súmase á folga xeral do próximo xoves, día 9, cunha concentración ás 12.00 horas na Praza dá Igrexa de Lalín. A saída dos centros de ensino comezará ás 11.30 horas. O parón está convocado polas federacións de Anpas así como polas organizacións sindicais de docentes e estudantes, para mostrar o rexeitamento á Lei de Mellora da Calidade Educativa (Lomce), coñecida tamén como a Lei Wert. Esta norma pretende instaurar reválidas ao final de Secundaria e Bacharelato, promove a segregación por sexos e adianta dos 16 aos 14 anos a idade en que os mozos deben decidir que queren seguir estudando.

Dende o Movemento Dezao polo Ensino Público anímase docentes, alumnos e pais a participar nesta folga. O colectivo, por outra parte, celebra esta tarde ás 16.50 horas no colexio de Agolada unha rolda de prensa na que ofrecerá un resumo das actividades que levou a cabo ata a data e as iniciativas pendentes ata final de curso.

O STEG pide a retirada da LOMCE á vista do ditame emitido polo Consello de Estado

A unha semana da folga xeral no ensino, convocada para o vindeiro xoves 9 de maio, o STEG considera que o ditame emitido polo Consello de Estado a respecto da Ley Orgánica de Mejora de la Calidad de la Educación "supón un novo golpe para a proposta contrarreforma educativa da que é responsable o Ministro Wert" e "valida as críticas de que a LOMCE é unha proposta de partido, ideolóxica e non negociada nin consensuada". O STEG pide a súa retirada e reclama ao mesmo tempo o inicio dun proceso de debate e diálogo sobre os cambios que precisa o ensino público para mellorar. De igual xeito chama á participación nas mobilizacións convocadas en contra dos recortes en educación, contra a LOMCE e en defensa do ensino público.

O STEG considera que o ditame "supón un novo golpe para a proposta contrarreforma educativa da que é responsable o Ministro Wert" e "valida as críticas de que a LOMCE é unha proposta de partido, ideolóxica e non negociada nin consensuada"

O STEG sinala que o Consello de Estado "pide que se acade un acordo coas forzas políticas e sociais para dar estabilidade ao sistema xa que este anteproxecto conseguiu o rexeitamento de todas as organizacións representativas da comunidade educativa do ensino público, así como da maioría de partidos con representación parlamentaria, pois non houbo nin negociación nin acordo". No apartado de financiamento o Consello de Estado observa unha “insuficiencia da valoración económica que suporá a súa aprobación”, ao mesmo tempo que pide ao Ministro que publique “os custos efectivos do anteproyecto de Lei e a fixación dos compromisos no tempo para o seu financiamento”.
En canto ás materias, o ditame propón que se volva a fixar o estatuto e horario das ensinanzas artísticas e do segundo idioma estranxeiro en Primaria, sendo de oferta obrigatoria para os centros; e que volva ser de oferta obrigatoria a Educación Artística, a Música, a Tecnoloxía, o segundo Idioma Estranxeiro e a Cultura Clásica na Educación Secundaria. De igual xeito reclama unha materia relativa á formación ético-cívica, sinalando á Educación para a Cidadanía, tanto en Primaria como en Secundaria, eliminada polo goberno. Tamén cuestiona que o ensino da relixión teña unha alternativa obrigatoria como propón o anteproyecto de Lei, "pois, tal e como dixo o Tribunal Supremo, de ser así, o alumnado de relixión non estudaría nunca competencias cívicas e sociais", afirma o sindicato.

O informe propón que sexan as Consellerías de Educación dos distintos territorios as que determinen a porcentaxe que debe darse no uso das dúas linguas no ensino

O Consello de Estado tampouco comparte a contrarreforma que se propón no tema do ensino das linguas cooficiais, propoñendo que sexan as Consellerías de Educación dos distintos territorios as que determinen a porcentaxe que debe darse no uso das dúas linguas no ensino, e rexeita que se deban pagar clases en castelán ao alumnado que o demande. "E dicir, propón validar o modelo actual", destaca o STEG.
Con respecto ás reválidas insta a que sexa o propio profesorado do centro quen as faga e denuncia o stress infantil que poden supoñer a proliferación de reválidas na Educación Primaria. Tamén cuestiona a posibilidade que se abre de que as universidades poidan facer probas específicas, "xa que a súa posta en marcha suporía acabar coa equidade no acceso ao ensino superior".

Con respecto  a segregación en razón do sexo, o Consello recoñece que o sistema de coeducación ou educación mixta constituíu “un avance no tratamento da igualdade de xénero que é constitutivo da democracia”

Pide que se volva ao que marca a normativa vixente en canto a distribución de competencias entre as comunidades e o Estado no relativo ao deseño do currículum, volvendo ao 55/65% en función de se teñen lingua propia ou non, cualificando de “incoherente” a distribución que se propón na LOMCE.
Con respecto  a segregación en razón do sexo, o Consello recoñece que o sistema de coeducación ou educación mixta constituíu “un avance no tratamento da igualdade de xénero que é constitutivo da democracia” e recoñece que os centros concertados non teñen un dereito “incondicionado” ao financiamento público.

CIG-Ensino cre "abusivos" os servizos mínimos fixados por Educación para a folga do 9 de maio

Este xoves 2 de maio tivo lugar unha reunión coa Consellería de Educación co obxecto de negociar os servizos mínimos para a folga do ensino do día 9 de maio. A CIG-Ensino considera a proposta presentada pola administración é "arbitraria e desproporcionada" e entende que "non queda garantido o lexítimo exercicio do dereito á folga do conxunto do persoal que traballa para Educación". Non foi posíbel chegar a un acordo negociado, segundo o sindicato, "xa que a proposta da Consellaría é a mesma que para a folga do 14 de novembro e supera os servizos mínimos de folgas anteriores".

A CIG-Ensino considera a proposta presentada pola administración é "arbitraria e desproporcionada" e entende que "non queda garantido o lexítimo exercicio do dereito á folga do conxunto do persoal que traballa para Educación"

A Consellaría só aceptou a proposta de suprimir “un directivo docente en cada facultade ou escola nos que estea autorizada a realización de exames porque xa hai unha sentenza gañada pola CIG que recoñece abusiva esta proposta".  Para a CIG-Ensino resulta "especialmente grave" que a Xunta "teime en conculcar dereitos fundamentais de xeito reiterado" xa que impide exercer o dereito a folga ao profesorado das unitarias malia o auto do 19 de xuño de 2002 da sala do contencioso-administrativo do TSXG que di: “enténdese que os servizos mínimos que hai que fixar para o período de folga convocado non poderán exceder en cada centro, departamento ou oficina, do número de persoas que normalmente permanecen neles con ocasión dun domingo ou día festivo, salvo que se trate de órganos que tales días permanecen pechados, no que haberá que atenderse ás quendas establecidas para os sábados”.

Para a CIG-Ensino resulta "especialmente grave" que a Xunta "teime en conculcar dereitos fundamentais de xeito reiterado"

Segundo CIG-Ensino, "de cumprirse o estabelecido polo alto tribunal galego, se todo o profesorado secunda a folga,  ningún centro debería estar en funcionamento o día 9 de novembro posto que nas fins de semana as escolas permanecen pechadas". Ademais, a CIG-Ensino considera especialmente "intolerábel que a Xunta volva privar dos seus dereitos ao persoal das escolar unitarias, e en boa medida dos coidadores/as e subalternos/as, xa que obriga á presenza dalgún/ha membro docente naqueles centros con menos de seis unidades".

Máis unha provocación da Xunta: reivindicará o Día das Letras contratando a Manquiña, colaborador de Galicia Bilingüe

O actor apoiou a mobilización da ultradereita española convocada por Galicia Bilingüe en Compostela o 8 de febreiro de 2009. Participantes nese protesto berraban "aldeanos!" e "paletos!" ás persoas que fixeron parte da contra-manifestación, esta si, en defensa da nosa lingua, namentres os antidisturbios mallaban nelas. Doce están pendentes de xuízo.

"Un recuerdo muy especial a una persoa que ha arriesgado mucho al apoyar esta manifestación y los fines de Galicia Bilingüe, que es el actor Manquiña". Así lle agradecían a Manuel Manquiña desde o palco a colaboración coa asociación que preside Gloria Lago na manifestación realizada en Compostela o 8 de febreiro de 2009, convocada baixo o lema Sí, quiero libertad para elegir.

Varios videos difundidos na rede daban conta de imaxes dunha muller que se protexía da chuvia cun paraugas e berraba a verdadeira ideoloxía que hai detrás do colectivo que preside Gloria Lago: "paletos!", "aldeanos!", "libertad!", "libertad!" namentres ducias de antidisturbios mallaban nas persoas que participaron na contra-manifestación, estoutra si, en defensa da nosa lingua. Doce desas persoas están pendentes de xuízo.

O mesmo Manuel Manquiña que apoiou a Galicia Bilingüe nesa mobilización é o escollido pola Xunta de Galiza para conmemorar este ano o Día da nosa lingua e das nosas letras e, de paso, homenaxear a Roberto Vidal Bolaño e a Rosalía de Castro, cando se fan 150 anos da publicación de Cantares Gallegos, ​un libro en que a poeta nacional defendeu desde o prólogo a identidade nacional da Galiza e ao que a Xunta, na súa nota de imprensa, se refire como "cantigas populares". O acto desenvolverase na Cidade da Cultura.

Con todo, o contributo de Manquiña ao desprestixio da nosa lingua propia non fica aí. Coñecidas son as súas declaracións en que asegurou que "Galicia é moi bilingüe, por moito que joda" polas que lle preguntou o xornalista Alberto Ramos nunha recente entrevista. E o actor respostou, moi ao estilo do discurso de Galicia Bilingüe: "eu creo na liberdade da xente por riba da liberdade dos lugares e das patrias; eu non creo no pobo". Para rematar acrecentou: "en Galicia, en galego? Mira, vai tomar polo cú!"

Non é a primeira vez que a Xunta opta por persoas de coñecida belixerancia contra a nosa lingua propia para actos públicos. Recentemente a escollida para ler a Rosalía foi a escritora Marta Rivera de la Cruz, cuxa obra está publicada integramente en español e que tamén mostrou a súa simpatía cara á asociación Galicia Bilingüe. Chegou inclusive a se queixar do "veto" do bipartito, ao non contar con ela precisamente para este tipo de eventos polas súas opinións ao redor do galego.