Volver ao cole custará este ano 1.268 euros de media e uns 5.232 se é privado

A Organización de Consumidores Unidos (OCU) estima que a volta ao cole nun centro público terá un custo medio por alumno este curso de 1.268 euros mentres que será de 2.386 euros nun colexio concertado e de 5.232 euros nun privado, segundo unha enquisa realizada entre máis de mil consumidores.

Segundo o estudo, os gastos extraescolares apenas difiren nestes centros, xa que se calculan en 59 euros ao mes para os alumnos de colexios públicos e os 55 ou 58 que gastan os pais dos que estudan en centros concertados ou privados, respectivamente.
As maiores diferenzas, á marxe das cotas posto que a educación pública é gratuíta, encóntranse no prezo do servizo de comedor, sensiblemente máis caro nos centros concertados aínda que contan con financiamento autonómico: de media, páganse 89 euros ao mes por alumno na pública e 115 na privada. Na concertada son 122 euros.
O transporte, pola contra, é máis caro nos privados, con ata 100 euros por neno ao mes, fronte aos 70 da concertada e os 42 dos colexios da comunidade autónoma.
Non son os únicos gastos que afrontan as familias. A estes gastos mensuais fixos hai que engadir desembolsos como a compra de libros de texto (132 euros nun colexio público e 204 de media nun privado) e material (83 no público, 86 no concertado e 108 no privado) ou as cotas dos clubs e asociacións de pais (de 21 euros na pública a 47 na privada) e o seguro escolar, entre outros.

Como parte dunha "grande ofensiva" O PSOE levará o decreto de bolsas ao Supremo

O secretario de Organización do PSOE, Óscar López, anunciou este luns que a formación denunciará ante o Tribunal Supremo o Real Decreto que regula as bolsas e axudas ao estudo, aprobado polo Goberno o pasado 2 de agosto, como parte dunha "grande ofensiva" que os socialistas poñerán en marcha este curso "en defensa da educación e da igualdade de oportunidades".

Estamos a estudar ese decreto en profundidade para ver a posibilidade de denuncialo ante o Tribunal Supremo en defensa da igualdade de oportunidades", explicou López en rolda de prensa ao termo dunha reunión do Grupo de Traballo de Educación que presidiu o secretario xeral do partido, Alfredo Pérez Rubalcaba, no seu primeiro día de traballo tras as vacacións.
Segundo dixo en relación á Lei Orgánica de Educación, o decreto nace dunha norma "que ten como obxectivo a garantía da igualdade de oportunidades", o que daría a 'percha' aos socialistas para impugnalo ante o Tribunal Supremo.
Esta é unha das "cinco accións de saída" que o PSOE vai poñer marcha como parte da citada "grande ofensiva" en defensa da educación, que arrancará este mércores coa comparecencia en sede parlamentaria do ministro do ramo, José Ignacio Wert, a quen os socialistas interrogarán sobre a política de bolsas, pero tamén sobre as taxas universitarias e o proxecto de Lei Orgánica de Mellora da Calidade Educativa (LOMCE) que se encontra en fase de emendas.
Sobre este asunto, López recordou que "case todos" os grupos da oposición se teñen posto de acordo para derrogar a norma en canto alcancen maioría abondo e ten avanzado que isto "será probablemente o primeiro que aconteza na próxima Lexislatura". Con todo, o PSOE mantén a súa intención de recorrela ante o Tribunal Constitucional tan pronto como se aprobe.
A "terceira acción" anunciada polo responsable de Organización do PSOE consiste en "solicitar reunión coa Conferencia de Reitores de Universidades de España (CRUE) para falar de bolsas e tamén de taxas", co fin de analizar a situación ao seu xuízo, "intolerable", que se produciu tras ampliar o Goberno a forquita de prezos de matriculación.
López considera que o Goberno "está a provocar unha quebra entre cidadáns brutal dependendo do territorio no que vivan" e explica que, a día de hoxe, "o prezo medio dunha carreira en Andalucía é de 750 euros e en Madrid, está entre 1.620 e 1.980, máis do dobre".
Iso é así porque en aplicación das marxes que dá o Goberno, hai comunidades gobernadas polo Partido Socialista que están a conxelar ou soben un un por cento as taxas mentres outras gobernadas polo PP, como Madrid, soben un 20% que acumulado co ano anterior é un 60%. É unha diferenza intolerable", sinalou.
Así mesmo, López anunciou a convocatoria dunha convención "monográfica sobre Educación" que terá lugar o 21 de setembro de cara á Conferencia Política, e a posta en marcha dunha campaña de recollida de libros de texto nas súas sedes de todo o país "para que se poidan organizar bancos de intercambio de libros de texto" que axuden a aliviar a 'volta ao cole' das familias que teñan "máis dificultades".

O BNG acusa a Xunta de "desprezar a igualdade" ao financiar os colexios que segregan

O 14 de agosto de 2013 a Consellaría de Educación publicou no DOG a Orde do 9 de agosto de 2013 pola que se aproba os concertos educativos cos centros docentes privados cunha vixencia de catro anos, até o curso 2016-2017. Neste contexto, o BNG demanda da Secretaría Xeral de de Igualdade que actúe para que se cumpra a sentenza do TSXG que no mes de marzo anulaba os concertos a cinco colexios que segregan o alumnado por razóns de sexo. A formación frontista supón que a publicación desta orde se fixo no inicio dunha ponte, en pleno mes de agosto, "coa intención de que pase desapercibida ao conxunto da sociedade galega".

O BNG pide á Secretaría de Igualdade "que actúe para que se cumpra a sentenza do TSXG e se anulen os concertos a estes centros"

Carme Adán, deputada do BNG no Parlamento Galego, presentou  unha Proposición Non de Lei para o seu debate en Pleno con motivo da anulación destes concertos aos centros que segregan nenos e nenas. Pretenden que a Secretaría xeral de Igualdade, que depende da Vicepresidencia, "actúe de xeito inmediato para que se cumpra a Sentenza do Tribunal Superior de Xustiza de Galicia e se anulen os concertos a estes centros dada a discriminación sexista que supón".
A deputada cualificou de "tomadura de pelo" as declaracións do conselleiro de Cultura, Educación e Ordenación Universitaria, Jesús Vázquez, que afirmou que a sentenza "se cumprirá de xeito gradual". O Tribunal Superior de Xustiza de Galicia acudíu á Lei Orgániza de Educación para invalidar o financiamento público nos centros  de Montecastelo, Alova e Las Acacias en Vigo e Montespiño e Peñarredonda, na Coruña.

"Mentras se manteñen 3 millóns en axudas a centros segregacionistas, suben un 40% as taxas de comedor e eliminase profesorado"

Adán lembrou que a supresión dos concertos a este tipo de centros "xa fora decidida polo Goberno bipartito" e que ao retornar o PP ao goberno galego "faltoulle tempo para decidir devolvérllos". A deputada cre que implica "un desprezo das políticas de igualdade o feito de que non se asuma agora unha sentenza que deixa claro que a actual lei de educación, a LOE, prohibe taxativamente a discriminación do alumado por sexo".
O BNG pide que a Secretaria xeral de Igualdade ou o Vicepresidente que  "rachen o seu silencio absoluto" e expliquen "se consideran que desde o principio de igualdade e de coeducación pode desoírse esta sentenza". O BNG tamén recordou que mentras se manteñen "3 millóns de euros en concertos con centros segregacionistas suben un 40% as taxas dos comedores escolares ou eliminan profesorado e unidades educativas" o que "mostra a vontade deste goberno, que é absolutamente inadmisíbel".

Catro colexios que segregan por sexo recorren a decisión da Xunta

O Goberno galego decidiu suprimir novos concertos tras a última sentenza do TSXG.

• Educación renova os concertos con colexios que segregan 
  
  Fomento de Centros de Ensino, entidade vinculada ao Opus Dei e titular dos colexios Peñarredonda, Montecastelo, Montespiño e Las Acacias, recorrerá a resolución da Xunta pola que se nega o concerto educativo en primeiro de primaria a estes catro centros que segregan os alumnos en función do seu sexo. O Goberno galego decidiu suprimir novos concertos tras a última sentenza do Tribunal Superior de Xustiza de Galicia que considera ilegais as axudas a estes colexios. Malia iso, Educación mantén as subvencións nas unidades didácticas que xa existían o pasado curso. A patronal destes colexios ultrarreligiosos non só oponse á negativa da Xunta, tamén recorreu ante o Supremo o fallo do Tribunal Superior.
  En declaracións a Europa Press, o director do colexio Montecastelo de Vigo, José Manuel Rodríguez Lago, defendeu que o fallo do TSXG fai referencia a unha orde de 2009, e que actualmente o "escenario xurídico cambiou". Recordou que a Lei de Presupostos di explicitamente que os centros de educación diferenciada teñen "os mesmos dereitos" a recibir concerto "que calquera outro". E lamentou que a retirada das axudas públicas prexudique a "os " pais que escolleron ese colexio" e teñen o dereito fundamental de optar "libremente". O director de Montecastelo defendeu os "excelentes resultados académicos practicamente o 100% de aprobados" en exames de selectividade, destes centros que poñen o alumnado "ás portas da universidade". Os catro centros remitiron un comunicado á prensa no que manifestan a súa "desconformidade" coa Xunta por unha decisión que "afecta gravemente ás familias". Recorda que a Constitución "garante o dereito dos pais a educar os seus fillos segundo as súas propias conviccións" e escoller o centro "que consideren máis conveniente".
  

  "Respecto á liberdade"

  Finalmente, a patronal educativa vinculada ao Opus Dei confía en que a Xunta "respecte un modelo educativo que contribúe á mellora do sistema", igual que "noutros aspectos mostrou o seu respecto á liberdade dos cidadáns". Tamén onte, o PP a través do seu deputado Román Rodríguez reprochou que PSOE e AGE critiquen "o mesmo sistema de educación diferenciada" vixente en Andalucía, onde gobiernam socialistas e Esquerda Unida.
  

  Máis información

  • Educación comprométese a retirar as axudas
  • Anulados os concertos con cinco colexios que separan sexos

A Xunta financiará cinco anos máis os colexios que segregan

Os cinco colexios privados, catro deles dunha empresa ligada ao Opus Dei, que imparten educación segregada seguen a ter na Xunta unha das súas principais valedoras. Apenas unha semana despois de que a Consellería de Educación decidise manter o financiamento público para estes centros que separan os nenos das nenas o seu titular, Jesús Vázquez, realizou ante a prensa unha acendida defensa desta decisión. Vázquez di "cumprir" a sentenza do Tribunal Superior de Xustiza de Galicia (TSXG) que declara ilegais estes subsidios, pero avanza que seguirá inxectando cartos públicos nos colexios ultraconservadores durante ata cinco anos máis.
A preguntas da prensa Vázquez explicou que ese cumprimento da sentenza vén dado polo feito de que a Consellería "non lles renovou" os concertos para os primeiros cursos e así o seguirá facendo cos segundos, terceiros e seguintes, un cada ano. Por que así? Por un principio de "confianza lexítima", isto é, para que o alumnado que comezou os seus estudos nun destes colexios poida rematalos alí. Deste xeito. a "desaparición total" das axudas non se produciría ata dentro dun lustro.

O conselleiro non ve "ideoloxía" en financiar estes colexios do Opus pero si en retirarlles as axudas

Á marxe desta retirada gradual que, por outra banda, é posible que non se produza dado que a Lei Wert avala estes concertos, Jesús Vázquez aproveitou a comparecencia para explicar que o Goberno galego non practica ideoloxía ningunha ao financiar os colexios do Opus, pero que si o fai quen reclama que non sexan sostidos con cartos do erario. Segundo Vázquez "certas críticas" aos colexios que segregan "non parten da comunidade educativa, senón dunha certa ideoloxía ou compoñentes politizados de certos sindicatos ou grupos políticos.

Vázquez defende que a educación segregada "está admitida en todo o mundo", mesmo en países "de índole socialista"

Onde non ve ideoloxía por ningures é, precisamente, en separar os nenos das nenas. Este tipo de ensino, argumenta, está "admitido a nivel mundial, apoiado pola propia Unesco" e mesmo, sentenza, foi "desenvolvida noutros países de índole socialista ou gobernados polo partido socialista ou por gobernos socialistas". "Está admitida en todo o mundo -abonda o conselleiro- e, de feito, a Constitución tamén ampara esta situación", sinala, obviando, non obstante, que as axudas contradín a lei educativa vixente.

Toda a oposición esixe a retirada dos concertos

Mentres o conselleiro de Educación defendía como propia a causa dos centros segregacionistas toda a oposición parlamentaria esixíalle a retirada inmediata das axudas ou, o que é o mesmo, o cumprimento da sentenza do TSXG. Dende o PSdeG o seu voceiro en materia educativa, Vicente Docasar, rexistrou no Parlamento unha proposición non de lei encamiñada, precisamente, á supresión "inmediata" dos subsidios xa que a orde do Goberno "incumpre claramente" o ditame do alto tribunal baseándose nunha "aberración ideolóxica e sectaria".

PSdeG, AGE e BNG censuran que a Xunta opte por incumprir a lei vixente

Pola súa banda, AGE e BNG optaron por solicitar conxuntamente -por separado non teñen escanos dabondo- a comparecencia "urxente" do conselleiro para "informar da continuación" destes concertos, contradicindo á Xustiza. "O que está a facer a Xunta é incumprir a sentenza" e aplicando a lei Wert "de xeito anticipado", din ambos grupos, que censuran que o Executivo "potencie o ensino segregador que separa os nenos e as nenas e os mestres das mestras, nun puritanismo enfermizo" que "ademais contradí" a lei vixente.

Wert dá unha nova volta de torca ás bolsas

A convocatoria feita pública esta segunda feira recolle mudanzas nos criterios de asignación das axudas á residencia. O Ministerio computará a vivenda d@ familiar máis próxim@ ao centro de estudos aínda "que non coincida co domicilio legal do solicitante".

Así o recolle a resolución de convocatoria das bolsas de axuda ao estudo para o curso 2013-2014. A norma atinxe ás ensinanzas superiores, non obrigatorias, universitarias ou non --agás doutoramento estudos de especialización e títulos propios de universidades. Inlúense pois as Formacións Profesionais de grao medio ou superior e as Escolas oficiais.
A medida, que non foi anunciada polo executivo español, impedirá acceder a unha axuda de 1.500 euros a aquel@s estudantes que teñan un/ha familiar vivindo na mesma cidade ao considerarse que ese é o domicilio d@ solicitante en troca da súa residencia legal (alí onde está empadroad@).
Entre as mudanzas que recolle a convocatoria estabelece unha serie de "obrigas" para @s estudantes que deberán "destinar a bolsa á finalidade para a que se concede", segundo recolle o texto. Entre elas re-embolsar a contía percibida nos supostos explicitados na propia resolución. Isto é, anulación da matrícula ou non ter superados os créditos exixidos.
No caso das ensinanzas non universitarias, non ter asistido a un mínimo do 80% de horas lectivas ou non ter aprobados o 50% das materias, créditos ou horas matriculadas.

A Xunta obvia a Xustiza e volve subvencionar os colexios que separan nenos e nenas

Enviar un neno ou nena a un colexio segregracionista seguirá estando subvencionado en Galicia. En pleno mes de agosto e ás portas dunha longa ponte festiva a Consellería de Educación vén de publicar a orde coa que renova os acordos cos centros de ensino concertado e nela inclúe os cinco colexios que separan o alumnado en función do sexo. A sentenza coa que o Tribunal Superior de Xustiza de Galicia (TSXG) ilegalizou o pasado marzo estes concertos a instancias do Sindicato de Traballadoras e Traballadores do Ensino de Galiza (STEG) non foi obstáculo para a Xunta, que se prepara para seguir inxectando cartos nestes centros ata 2017.
O que para a Xustiza é incumprir a lei vixente para o Goberno galego non é máis que "educación diferenciada" e por iso segue a concertar aulas con Montespiño e Peñarredonda, na Coruña, e con Montecastelo, Las Acacias e Aloya en Vigo. Dos cinco colexios os catro primeiros están promovidos pola empresa Fomento de Centros de Enseñanza, ligada ao Opus Dei, e o restante, Aloya, pertence á conservadora Asociación Fontenova. Ambas entidades decidiron interpoñer un recurso de casación ante o Tribunal Supremo contra a sentenza do TSXG, recurso que agora lle serve á Xunta como xustificación para non retirarlles os fondos públicos.

Catro dos cinco centros subvencionados están ligados ao Opus Dei

O gabinete que dirixe Alberto Núñez Feijóo sinala que o ditame do alto tribunal galego "non é firme" e ademais, razoa, a lei de orzamentos xerais do estado "recolle a directriz presente no ordenamento xurídico de inexistencia de prohibición ou limitación constitucional ou legal ao finan ciamento da educación separada por sexo". Nesta apreciación a Xunta pasa por riba da aínda vixente Lei Orgánica de Educación, que, como lembraba o TSXG en marzo, "prohibe tallantemente a discriminación dos alumnos na admisión a centros públicos e concertados", ademais de outorgarlle prioridade aos centros educativos que practiquen a "coeducación".

As axudas a estes colexios contradín a lei educativa vixente

Neste contexto, e cunha lei educativa en trámite -a Lei Wert- que si lles dará sustento legal ás subvencións a centros segregacionistas, a Consellería considera que "o procedente" é seguir a darlles cartos a estes colexios, coa única cautela de "non concertar as unidades de primeiro de educación primaria ou secundaria, segundo o caso, nos citados centros, e si facelo respecto das unidades correspondentes aos segundos e seguintes cursos". O obxectivo, asegura Educación nun comunicado, é "garantir que o alumnado xa escolarizado non sufra alteración ningunha na súa traxectoria educativa e poida rematar os seus estudos nas mesmas condicións coas que as iniciaron", isto é, os nenos por unha banda e as nenas, pola outra. De paso, di a Xunta, "minimízanse" os "posibles efectos o alumnado e nas familias en xeral, á espera do pronunciamento" do Supremo.

O STEG recorrerá de novo

Nada máis coñecer a decisión gobernamental o STEG xa anunciaba a súa intención de "ir de novo aos tribunais para que a sentenza firme, posto que non foi recorrida pola Consellería, sexa cumprida pola Administración". A xuízo da central sindical o Executivo emprega de novo "o dereito a escoller das familias para xustificar políticas afíns ao ideario máis reaccionario deste goberno" aínda que isto "vulnere os dereitos da infancia". Trátase, subliñan, de cumprir a lei xa que o TSXG "non cuestiona a existencia" destes colexios, senón que "poidan acollerse ao sistema de ensino sostido con fondos públicos".

"A Xunta incumpre premeditadamente a sentenza", di o STEG

A Xunta, censura o STEG, "incumpre premeditadamente a sentenza e aproba os concertos con estes centros por un período de catro anos, cunha orde publicada en período vacacional para que a comunidade educativa non poida reaccionar como se merece esta medida". A decisión, conclúen, "evidencia a liña educativa deste Goberno, que non ten reparos en reducir centos de postos de traballo, investimentos en recursos, libros de texto ou facer pagar para poder comer nos comedores escolares no ensino público co argumento da crise, nin en adicar 3 millóns de euros de todas e todos, para subvencionar a unha empresa educativa contraria ao espírito da coeducación".

Defendendo lingua e patrimonio

O proxecto 'Palabras de pedra' agarda continuar as actividades tres anos máis.

O IES Marco do Camballón (Vila de Cruces) é o artífice do Proxecto Mámoas-Palabras de Pedra. unha inicitativa que busca a valorización da nosa nosa lingua e o noso patrimonio, en concreto das mámoas de OIrós. Dende a súa posta en marcha fai pouco menos dun ano, xa deu varios froitos como é o libro Mámoas de Oirós. Lendas Possíveis, de Ramón Taboada, que foi presentado pola asociación Novo Cruceiro durante a noite de onte.

 A asociación cultural Novo Cruceiro presentaba onte o libro Mámoas de Oirós. Lendas Possíveis de Ramón Taboada e ilustracións de Calota Salgado. Unha recreación de lendas vinculadas á necrópole megalítica de Oirós: Mulleres que se converten en serpes ou tesouros escondidos de Cruces. Forma parte do Proxecto Proxecto Mámoas-Palabras de Pedra que o IES Marco do Camballón impulsa para valorizar o patrimonio material e sociolingüístico do concello.

O Clube de Lingua deste centro de educación secundaria foi, en colaboración con Novo Cruceiro, o artífice da posta en marcha deste proxecto no pasado mes de setembro. Dende entón alumnos, mestres, pais e nais, así como outros axentes do concello sumáronse a esta iniciativa.
Á vez que manteñen contacto cos arqueólogos que excavaron as mámoas nos anos 60, desenvolveron xa varias actividades, como unha excursión a Oirós en compañía de Celso Fernández Sanmartín ou unha conferencia de Manuel Gago, quen os achegou ao patrimonio e á historia de Vila de Cruces.
Asimesmo, en colaboración coa asociación, crearon a colección Os livros de rastalavras. A obra de Taboada é a segunda, despois de Sexo, Lingua e Rock'N'Roll, unha antoloxía elaborada por alumnado, exalumnado e profesorado do centro que conta con textos de xente vinculada á comarca, como a xornalista Belén Regueira ou a poeta Iria Anido Pedreira. Tamén participan no libro creadores como O Leo e Arremecaghona ou Vituco Neira, cantante de Ruxe Ruxe, xunto ao deseñador gráfico Raio. Tamén destaca o disco Camballón Mix, que recolle pezas de grupos a nivel galego e nacional e que xa vai pola súa sexta edición.
Pero o proxecto vai para longo, posto que teñen previsto seguir en marcha tres anos, como mínimo. De feito, xa son varios os proxectos que teñen en mente. Como a elaboración dun mapa dos tesouros de Vila de Cruces. Así como a limpeza dunha das mámoas, cos permisos de rigor.Un proxecto de normalización lingüística que recibiu un premio á innovación educativa da Xunta de Galicia.
De momento, para continuar co proxecto e como parte da semana cultural, a asociación propón unha camiñada o día 6 de agosto ao campo de mámoas de Oirós, que sairá ás 10.30 horas do iES Camballón.

Terase en conta a consulta 'non vinculante' aos pais para fixar a lingua no ensino infantil

A consulta aos pais e nais non será vinculante á hora de fixar a lingua na que se imparta o ensino infantil en Galicia. Así o determinou de forma clara o Tribunal Superior de Xustiza de Galicia nas súas sentencias e así o acata a Xunta nas súas disposicións. Porén a consulta "constituirá un dato moi importante" para que os centros tomen esta decisión sobre a lingua inicial de ensino, canda a outros factores, coma o ámbito sociolingüístico e a garantía de equilibrio de ensino. O Goberno galego xustifica a importancia redobrada que se lle outorga á opinión de pais e nais en que "o coñecemento por parte dos centros da lingua materna dos alumnos/as vén obrigada pola Lei 3/1983 de normalización lingüística e toda a normativa posterior".

A consulta "constituirá un dato moi importante" para que os centros tomen esta decisión sobre a lingua inicial de ensino

O Secretario xeral de Política Lingüística, Valentín García, presentou a instrución que adecúa o decreto de plurilingüismo ao fixado pola xustiza e asegurou que “a fórmula adapta totalmente o Decreto ás sentenzas do TSXG en canto que cingue totalmente o contido da norma ao ditame do alto tribunal galego”. En novembro as sentenzas do TSXG anulaban o artigo 5.2. do Decreto, no que se estipulaba a realización dunha enquisa entre os pais e nais en Educación Infantil.
Os centros tamén considerarán a realidade sociolingüística da contorna na que estean radicados "tendo en conta, en todo caso, a garantía dunha presenza equilibrada das dúas linguas cooficiais da nosa Comunidade Autónoma como vehiculares do ensino e tamén que o alumnado deberá adquirir competencia lingüística tanto en galego coma en castelán", indica Política Lingüística. Tamén se sinala que "o alumnado deberá empregar na aula a lingua estipulada para a impartición de cada área, materia ou módulo", aspecto no que “prevalecerán, á hora de avaliar as respectivas materias, os criterios de avaliación referidos á adquisición dos coñecementos específicos”.
Hai catro semanas a Consellaría de Educación comezou a enviarlles aos centros de ensino un modelo de enquisa semellante ao do ano pasado para pasarlle aos pais e as nais en Educación Infantil e así determinar a lingua vehicular nas aulas. Isto foi moi criticado pola CIG, que lle solicitou ao TSXG que executase a sentenza e anulasee o envío da consulta por parte da Xunta. O conselleiro Jesús Vázquez saíu ao paso destas críticas cualificando de "antidemocrática" a "actitude" da CIG "ao tentar impedir que a Consellería reúna información sobre a lingua materna do alumnado de infantil, cuestión fundamental para garantir os dereitos do alumnado". A Xunta defendeu daquela que "a pregunta realizada pola Consellería ás familias é legal" e "necesaria" xa que só persegue "coñecer cal é a lingua da que parten as nenas e nenos de infantil" para así "garantir os dereitos do alumnado" en referencia á mención do respecto á lingua materna presente na Lei 3/1983 de normalización lingüística e no propio decreto 124/2007, que establece no seu artigo 7" que "a lingua materna predominante será determinada polo claustro e que para o seu establecemento deberán terse en conta, entre outros, a información achegada polos pais e nais".
CIG-Ensino presentou un "incidente de execucion de sentenza" ante o TSXG e o 11 de xullo o tribunal deulle vinte días á Xunta para xustificar que a enquisa lingüística repartida entre os centros de ensino non vai contra as sentenzas coas que o alto tribunal galego ilegalizou parte do decreto do plurilingüismo.

Un proxecto galego para aprender linguas por internet gaña seguidores en Europa

A plataforma para iniciarse en inglés, español, portugués ou romanés, financiada pola UE, naceu en Galicia e recibe 300 000 visitas ao ano.

Fonte: Faro de Vigo

O centro elixirá a lingua predominante na aula en función de tres factores

Varias sentenzas do Tribunal Superior de Xustiza de Galicia anularon dous dos artigos do decreto do plurilingüismo, polo que a Consellería de Educación tivo que adaptar esta norma para o próximo curso. O principal cambio é que a lingua predominante que se utilizará na aula na etapa de infantil non a determinará o colexio en función da consulta aos pais que se fai ao comezo deste período educativo, senón que o centro decidirá tomando como criterio tres factores: a pregunta aos pais, a realidade sociolingüística da contorna e a garantía da presenza das dúas linguas cooficiais, galego e castelán.

Fonte: La Voz de Galicia

IU-ICV-CHA presenta no Congreso 160 emendas á LOMCE. Reclaman unha escola pública e laica.

A Esquerda Plural (IU-ICV-CHA) rexistrou este mércores no Congreso un total de 160 emendas parciais ao proxecto de Lei para a Mellora da Calidade Educativa (LOMCE), entre as que reclama a defensa dunha escola pública e laica, ademais dunha educación en igualdade de condicións para todos os alumnos.

Precisamente o presidente do Congreso, Jesús Posada, decidiu este mércores aprazar previsiblemente e ata o 7 de agosto a presentación de emendas parciais á LOMCE. Non obstante, os grupos parlamentarios teñen a opción de rexistralas antes de que finalice o prazo establecido pola Cámara Baixa se así o consideran oportuno, tal e como considerou neste caso a Esquerda Plural.
Para a redacción destas emendas a Esquerda Plural, en coordinación coa área de Educación de IU, abriu hai semanas un proceso de participación cidadá, especialmente a través dun portal en Internet('http://lomceno.wordpress.com/tusenmiendas/,'), para recoller centos de propostas, elaboradas en "estreito contacto" con representantes de toda a comunidade educativa.

EMENDAS PARA TODO O ARTICULADO

Así, a formación de esquerdas detalla que estas emendas parciais abranguen a totalidade do seu articulado, tanto á exposición de motivos coma ás 93 modificacións que no texto se realizan á vixente Lei Orgánica de Educación (GABE), ademais de ás disposicións adicionais e finais que conforman todo o articulado da contrarreforma educativa que pretende impoñer o PP.
"IU enfróntase así ao contido dun proxecto de lei que foi imposto polo Goberno do PP, co nefasto protagonismo personalista do ministro José Ignacio Wert, sen un debate real e sen consenso, virando as costas claramente á comunidade educativa", insiste o grupo parlamentario.
Neste sentido, o seu voceiro no Congreso, Caridade García Álvarez, defende que con estas emendas parciais, de igual forma que xa fixese a formación na súa emenda de totalidade pedindo a devolución ao Goberno da futura normativa, se busca "ata o último momento corrixir os obxectivos que busca a contrarreforma da LOMCE, que son profundamente clasistas e privatizadores".
Non compartimos en absoluto, en coincidencia co que demanda a comunidade educativa, o carácter netamente mercantilista da lei, que supedita a educación a intereses economicistas, suprimindo materias e contidos que se estiman pouco 'útiles' para o mercado, mentres se sitúa ás empresas como parte primordial do sistema educativo", insiste a parlamentaria.

FALTA DE BASE CIENTÍFICA

No concreto, a Esquerda Plural rexeita que boa parte das emendas rexistradas "denuncian a falta de base científica e pedagóxica da LOMCE, enchida de afirmacións e medidas que contradín ou terxiversan resultados de investigacións internacionais co fin de axustarse aos principios ideolóxicos ultraconservadores" que pretende xustificar.
Con iso, cita certos termos e conceptos "acientíficos" utilizados, "talles como o vocábulo talento, propio da terminoloxía bíblica e infrecuente na literatura pedagóxica contemporánea,".
Igualmente, a proposta parlamentaria formula alternativas aos itinerarios segregadores, "una das medidas estrela para o PP para eliminar a comprensividad da educación básica", é dicir, a formación común á que ten dereito todo o alumnado nas etapas obrigatorias.
Outro bloque de emendas contrapón a defensa dunha escola pública, democrática e laica, como eixe vertebrador do sistema educativo, "fronte á potenciación dos concertos educativos e o reforzo do adoutrinamento que promove a LOMCE", segundo apunta IU.
As modificacións rexistradas tamén enfróntanse ao ensino diferenciado por sexos, a" as reválidas como instrumentos de selección e non de mellora", á supresión das "canles democráticas" de participación, á volta a un currículo controlado polo Estado e a unha pedagoxía "chamada do esforzo para esconder a volta a 'a letra con sangue entra' ".

OPOSICIÓN FRONTAL Á LEI

Deste xeito, a Esquerda Plural di que traslada a súa "oposición frontal" a este proxecto de lei do Goberno que "foi amplamente contestado por todos os sectores do ámbito educativo".
Na súa opinión, estas 160 emendas poñen de manifesto tamén que si "hai Alternativa á LOMCE" e que esta pasa por estender e potenciar unha educación pública e laica, garantir o dereito universal á educación en condicións de igualdade e contribuír ao éxito escolar de todo o alumnado.
Neste contexto, a formación explica á súa vez que as emendas formulan unha educación personalizada, integral e inclusiva, para ser desenvolvida en igualdade e dunha forma democrática que potencie a participación de toda a comunidade educativa. Para iso é imprescindible que se motive o profesorado e que conte cun financiamento público suficiente", apostila.
Finalmente, a Esquerda Plural fai mención ás organizacións e colectivos da comunidade educativa aos que se tivo "moi en conta" coas súas achegas: sindicatos, distintas asociacións do profesorado de Tecnoloxía e de Filosofía, Europa Laica, Amnistía Internacional, Coordinadora de Xordos de España, asociacións do profesorado de Música, Consello Xeral de Colexios Oficiais de Psicólogos ou as asociacións de profesorado de ensinanzas artísticas, entre outros.

A lingua predominante en infantil fixarase en función da pregunta a pais e ámbito

Os alumnos usarán na aula, con carácter xeral, a lingua de impartición de cada área, materia ou módulo

Os centros educativos serán os encargados de fixar o idioma predominante dos grupos de educación infantil en función do resultado da pregunta "non vinculante" aos pais, o ámbito sociolingüístico e a garantía de equilibrio de ensino e adquisición de coñecementos en galego e castelán. Esta decisión plasmarase nunha addenda anual ao proxecto lingüístico de cada centro.

Así explicouno en rolda de prensa o secretario xeral de Política Lingüística, Valentín García, na que informou sobre unha instrución enviada aos centros para adaptar o decreto 79/2010, do plurilingüismo no ensino, ás sentenzas do Tribunal Superior de Xustiza de Galicia (TSJG) que anularon parte de dous artigos da citada norma.
Deste modo, o responsable lingüístico explicou que a pregunta ás familias, que se realiza cada ano no momento en que os nenos comecen o seu primeiro ensino no sistema educativo, será "non vinculante" aínda que "si importante", dado que o coñecemento da lingua materna dos alumnos por parte dos centros é un mandato obrigado pola Lei de Normalización Lingüística.
A decisión resolverase en función doutros factores, como a realidade sociolingüística na que se sitúa o propio centro e a necesidade de garantir unha presenza equilibrada das dúas linguas cooficiais de Galicia como vehiculares do sistema educativo, ademais de permitir unha adquisición equivalente en ambos os dous idiomas.
O proceso para fixar o idioma iníciase, en primeira instancia, dende o equipo directivo do centro que a plasmará no seu plan lingüístico, ao que engadirán unha addenda anual onde reflectirán o idioma de cada grupo en infantil. Este proxecto terá que ser aprobado polo Claustro e o Consello escolar do propio centro.
Finalmente, esta addenda remitirase á Inspección Educativa, quen será a encargada de verificar que o proceso se realizou dun xeito correcto.

USO DO IDIOMA NA AULA

Sobre iso, García insistiu en que a pesar da "lingua predominante" de cada grupo sexa castelán ou galego, o obxectivo "último" de cada etapa educativa debe ser a adquisición de competencias e presenza "en igualdade" de ambos os dous idiomas.
En relación ao parágrafo anulado polo TSJG relativo ao uso do idioma na aula, o tribunal ditara que cada alumno terá que empregar a lingua propia de cada materia. "Isto ten que ser así", recoñeceu Valentín García.
Por iso, os estudantes terán que usar na aula "con carácter xeral" a lingua establecida para cada materia e o profesorado buscará que a validación do dominio do idioma "respecte as circunstancias persoais" dos alumnos e se oriente a unha adquisición "en igualdade" das dúas linguas oficiais.
García matizou, aínda así, que a avaliación da materia se realizará tendo en conta os criterios do correspondente currículo, polo que "non" poderán prevalecer criterios de competencia lingüística do idioma vehicular sobre os coñecementos específicos" en cada materia.
"É de sentido común", considerou o responsable de Política Lingüística, quen defendeu que este argumento está avalado "por moitos criterios pedagóxicos".

PROXECTO DE MODIFICACIÓN CELGA

García aproveitou a rolda de prensa para presentar as liñas básicas do proxecto de Orde sobre as validacións do sistema de certificación de lingua galega (Celga) adaptado ao Marco Europeo Común de Referencia para as Linguas, actualizando a normativa tras seis anos dende a súa posta en marcha.
Esta nova normativa incluirá modificacións para prestar "especial atención" a aquelas persoas que presenten unha determinada porcentaxe de minusvalidez física ou psíquica, que poderán acceder a exames con condicións específicas, pero respectando os mesmos parámetros de avaliación e esixencia.
Segundo exemplificou García, sería o caso dunha persoa que presente unha porcentaxe elevada de minusvalidez auditiva e que podería quedar exento das probas de comprensión oral. Para iso, os interesados en participar nas probas con estas novas condicións terán que certificar a súa minusvalidez e comunicar o apoio que necesitarán para a realización dos exames no momento de presentar solicitude para a convocatoria.
Outro dos cambios incluídos será o recoñecemento do nivel Celga correspondente para aqueles alumnos que cursaran estudos no exterior en centros con programas educativos homologados con impartición garantida en lingua galega. Entre eles, están aqueles adscritos ao Protocolo de Colaboración entre Galicia e Castela e León nas bisbarras Del bierzo e de Sanabria, xunto cos institutos Vicente Cañada Blanch de Londres e Santiago Apóstolo de Bos Aires.
Trátase, segundo destacou Valentín García, dunha "vella reivindicación" das colectividades galegas no exterior e asociacións de profesores de galego "dende hai anos", e que reforzará a proxección exterior do idioma.
O terceiro punto incluído na Orde adapta as validacións Celga á formación plurilingüe do alumnado, de modo que os estudantes que superen un curso de ESO ou de Bacharelato no estranxeiro, sempre que este non sexa o último da etapa educativa, poderá solicitar acreditación oficial dos Celga 3 e 4, respectivamente.

EXENCIÓN DA MATERIA

Finalmente, Valentín García informou dunha Orde aclaratoria sobre a exención da materia de lingua galega, ante a peticións efectuadas. Así, esta "non" varía respecto á situación anterior", de modo que terán dereito de exención de exames aqueles alumnos que veñan de fóra pero "non aqueles que se reincorporen" ao sistema educativo. Esta exención duraría "un máximo de dous anos".
O secretario xeral de Política Lingüística destacou que a Xunta cumpre "con ao máis estrita legalidade", garantindo "o equilibrio" entre linguas e "buscando o consenso" e a "igualdade de oportunidades.
Así mesmo, avanzou que explicará todas estas modificacións en sede parlamentaria nunha comparecencia xa solicitada e que está prevista para o mes de setembro.