xoves, 31 de xaneiro de 2013

A Mesa pola Normalización Lingüística recibiu unha sentenza favorable ás súas teses no recurso perante o TSXG

A Xunta é o primeiro goberno autonómico do Estado que recorre aos tribunais para que o seu idioma propio estea máis desprotexido

Carlos Callón: “Insulta a intelixencia de calquera que nos digan que gañaron as sentenzas e que, ao mesmo tempo, as van recorrer”.
A Xunta tira diñeiro de todas e todos para atacar o noso idioma nos tribunais, cando a súa obriga é defender a nosa lingua e a nosa cultura
Santiago de Compostela, 30 de xaneiro de 2013.- A Mesa pola Normalización Lingüística, a primeira entidade que recibiu unha sentenza favorábel ás súas teses no recurso perante o TSXG polo decretazo contra o galego, considera “obscenos” os argumentos utilizados pola Xunta para os seus recursos perante o Tribunal Supremo. A Mesa recorda que, aínda que houbo gobernos noutras comunidades do Estado que si practicaron nalgún momento políticas contra as súas linguas (como os de Navarra ou Valencia), a Xunta de Feijóo é “o primeiro goberno autonómico que recorre aos tribunais para conseguir unha maior desprotección para o seu idioma”.
O presidente da Mesa, Carlos Callón, apunta ademais que “está á vista de todo o mundo que temos un presidente que é mentireiro compulsivo”, pois “insulta a intelixencia de calquera que se nos diga que gañaron as sentenzas e que, ao mesmo tempo, as van recorrer”. “Ha de ser a primeira vez na historia que alguén recorre sentenzas que di que gañou!”, ironiza.
As varias sentenzas do TSXG anulan por ilegais os núcleos do decreto do plurilingüismo e o cerne do discurso do PP sobre a presenza dos idiomas no sistema educativo. Así, o decreto en vigor é un “decreto zombi”, posto que, aínda que continúa en vigor, “en realidade está xa morto xuridicamente, igual que estaba xa morto socialmente e pedagoxicamente”, pois é unha norma “sen apoios na comunidade educativa e considerada unanimemente como inservíbel desde o ámbito da pedagoxía”.
A Mesa lamenta tamén que “nun momento como o actual, en que tan necesaria é a cohesión social de Galiza, a aposta da Xunta sexa destruír a nosa cultura todo o posíbel, mesmo malgastando diñeiro público nese obxectivo, como está a acontecer agora cos seus recursos ao Tribunal Supremo”. No entanto, a asociación asume que “dará a batalla en todos os ámbitos que for preciso para defender o galego na escola”.



Rexeitamento frontal ao recurso da Xunta que tenta "aumentar a desprotección do galego"

A Xunta decidiu enlamarse nunha batalla xudicial co galego como protagonista, logo de anunciar o pasado martes que xa se prepara para presentar un recurso de casación ante o Supremo contra as numerosas sentenzas que anulan o cerne do decreto do plurilingüismo. Todo, malia que o Goberno de Feijóo insiste unha e outra vez en que os ditames "avalan" a norma e a súa política lingüística. O rexeitamento de colectivos, sindicatos e oposición é, de novo, frontal e rotundo.

A Mesa pola Normalización Lingüística, a primeira entidade que recibiu unha sentenza favorábel por parte do TSXG, cualifica de "obscenos" os argumentos utilizados pola Xunta para os seus recursos perante o Tribunal Supremo e recorda que, aínda que houbo gobernos noutras comunidades que si aplicaron políticas contra as súas linguas, o Executivo de Feijóo é “o primeiro que recorre aos tribunais para conseguir unha maior desprotección para o seu idioma”.
O presidente da Mesa, Carlos Callón, asegura que “está á vista de todo o mundo que temos un presidente que é mentireiro compulsivo”, pois “insulta a intelixencia de calquera que se nos diga que gañaron as sentenzas e que, ao mesmo tempo, as van recorrer”. “Ha de ser a primeira vez na historia que alguén recorre sentenzas que di que gañou!”, ironiza.

Outro dos colectivos aos que o TSXG estimou en parte o recurso, CIG-Ensino, cre que a Consellaría de Educación "amosa unha vez máis a súa galegofobia" e entende que o feito de que a Xunta decida finalmente acudir á Xustiza implica que o Goberno sabe que os ditames "poñen en entredito o decreto". "Insisten na súa política contra a nosa lingua, que é o seu obxectivo central, e para iso non dubidan en gastar importantes cantidades de diñeiro en recorrer estas sentenzas porque amparan o noso idioma", engade a central nacionalista, que coincide coa Mesa en denunciar tamén o gasto de cartos públicos para atacar a cultura propia.

Alternativa Galega de Esquerda (AGE), pola súa banda, considera que "a belixerancia da Xunta contra a lingua galega non parece coñecer límites" e critica o "asañamento" do PP "co idioma que o Estatuto considera propio de Galicia". “Jesús Vázquez é un perverso galegófobo que desde a institución que debera defender a identidade galega”, lembra o deputado Xabier Ron, “non deixa de atentar contra a súa lingua”. "O conselleiro e Feijóo teiman no seu odio furibundo contra o galego e a cultura galega", insiste.

Ademais, o membro da Executiva Nacional de Compromiso por Galicia (CxG), Henrique Monteagudo, cre que “o Partido Popular ten que reflexionar”, xa que as sucesivas sentenzas do TSXG “desmontan un por un todos e cada un dos elementos principais do decreto”. O membro da Real Academia Galega considera tamén que Feijóo perdeu unha oportunidade para rectificar “unha política lingüística errada que se basea no desprezo total e absoluto ao galego".
Monteagudo destaca tamén que "este desprezo e maltrato da lingua" está acompañado dun “desprezo ás institución propias”, xa que "Feijóo acode a Madrid, ao Tribunal Supremo, para que resolva sobre unha materia que é competencia exclusiva da Comunidade Autónoma".












Maré de reaccións contra o recurso da Xunta ao Supremo para salvar o decreto de plurilinguismo

Organizacións políticas, sindicais ou cidadás amosan o seu rexeitamento á decisión da Xunta de presentar recurso de casación ante o Tribunal Supremo para intentar enmendar o lapote que lle deu o TSXG ao seu decreto de 'pulrilingüismo'

O domingo, milleiros de galeg@s encheron as rúas de Compostela en defensa do galego. 48 despois, a Consellería de Educación informaba que se personaba diante do Tribunal Supremo co fin de presentar o recurso de casación contra as sentenzas ditadas polo Tribunal Superior de Xustiza galego arredor do decreto do plurilingüísmo. A respostaretadora do goberno autonómico ao clamor social que defendía o galego na mobilización da capital de Galiza.
Diferentes entidades e organizacións están a amosar o seu rexeitamento contra esta decisión da Xunta. Desde A Mesa afirman que "é o primeiro goberno autonómico do Estado que recorre aos tribunais para que o seu idioma propio estea máis desprotexido". Para o seu presidente, Carlos Callón, “insulta a intelixencia de calquera que nos digan que gañaron as sentenzas e que, ao mesmo tempo, as van recorrer”.

Galegofobia.

Desde a CIG-Ensino denuncian "a galegofobia da Xunta", que vai provocar un "gasto importante para recorrer as sentenzas do TSXG por ampararen o noso idioma". O sindicato nacionalista considera que "o Partido Popular emprendeu desde o primeiro día unha cruzada contra o noso idioma, procurando a súa desaparición das aulas, privando así o alumnado do dereito a ser escolarizado na súa lingua propia, e procurando que deste xeito a nosa lingua deixe de ser falada entre as e os máis novos".
Mentres, o AGE considera que "a belixerancia da Xunta de Alberto Núñez Feijóo contra a lingua galega non parece coñecer límites", engadindo que "o Executivo de Feijóo, a través do brazo executor do conselleiro Vázquez, pasará á historia como lingüicida".
Tamén desde Compromiso por Galicia mostraron o seu rexeitamento ao recurso. e consideran que con esta decisión "Feijóo maltrata á língua e á xustiza galega".









mércores, 30 de xaneiro de 2013

Bota a andar o Taboleiro do Libro Galego, un proxecto que achegará unha listaxe semanal das obras máis vendidas en lingua galega


Desde o coñecido blog Caderno da Crítica, o profesor e tradutor Ramón Nicolás botou a andar esta fin de semana o Taboleiro do Libro Galego, no que se achegará unha listaxe semanal das obras máis vendidas nas nosas letras atendendo ás categorías de Narrativa, Poesía, Ensaio-Teatro, Literatura Infantil e Xuvenil, Banda Deseñada e mais Álbum Ilustrado.
Un total de 12 librarías de diferentes localidades do país achegan os datos para elaborar estas listaxes, que abren con As voces baixas, de Manuel Rivas como a obra de narrativa máis vendida dos últimos sete libros, e Ardalén, de Miguelanxo Prado, a encabezar as vendas de banda deseñada.

Información tirada de culturagalega.org.



Pecha o último diario impreso en lingua galega


A compañía de Lugo pecha a edición diaria en papel de De Luns a Venres (LV), o último medio impreso a diario en galego. A empresa promete que o cambio non suporá a desaparición da información diaria, que di se reforzará a través da súa páxina web. Tamén promete que a nova publicación semanal aumentará as páxinas e a tirada, mantendo a aposta polo idioma galego.
Pola súa banda, o Colexio de Xornalistas reaccionou xa ao peche de LV. Na súa opinión a desaparición de LV non obedece á falta de receptividade e apoio dos lectores, xa que, segundo asegura o propio medio no seu derradeiro número, "pechou o ano 2012 como o xornal de maior crecemento da prensa de Galicia, segundo o Estudio General de Medios (EGM), cun 34,29% de suba, que lle permitiu acadar os 38.000 lectores". Outros 7000 recibían o xornal a diario nos seus correos electrónicos.

Máis información en Galicia Confidencial.

A Xunta recorrerá as sentenzas do decreto e culpa a oposición de ter que acudir aos tribunais

Tan só dous días despois doutra masiva manifestación contra a suá política lingüística, a Xunta vén de confirmar a súa intención de interpoñer recurso ás sentenzas ditadas polo TSXG, que eliminan o cerne do polémico decreto do plurilingüismo para o ensino. A Consellería de Cultura e Educación emitiu un comunicado no que aclara que xa realizou "o trámite formal de simple personamento" ante o Tribunal Supremo, o paso necesario para poder presentar un recurso de casación contra os ditames do Tribunal Superior.

Segundo o Goberno galego, este trámite realizouse no último día do prazo, "agardando ata o último momento, por se se producía algunha resposta dialogante e construtiva sobre a proposta que no seu día fixo o presidente da Xunta". Refírese á oferta de Núñez Feijóo, que asegurou que acataría as sentenzas do TSXG se o BNG asumía a política lingüística do PP. Loxicamente, a oferta non tivo resposta e a Xunta decidiu enlamarse nunha batalla legal contra os ditames xudiciais, malia que insistiu unha e outra vez en que "as sentenzas refrendan o decreto ao 100%".

Na propia nota de prensa, ateigada de erros, a Xunta insiste nos ataques á oposición e insiste en que o ditame xudicial non pon en dúbida a norma lingüística. Así, a Consellería asegura que "non pode admitir as imposición que algúns partidos ou colectivos pretenden", porque "serían contrarias ao expresado pola maioría do pobo galego nas urnas e contrarias ás sentenzas do TSXG, que non derrogou, como pretendían os recorrentes, o decreto de plurilingüismo".
Educación vai máis aló e engade que esa "pretensión derrogatoria" está "carente de apoio social e xurídico" e acúsaa de estar esgrimida "por algún partido" como" única resposta á man tendida do presidente de negociar sobre a base dos ditames emitidos polo Tribunal galego".

O Goberno galego aclara que o TSXG dispón dun máximo de trinta días para comunicarlle á Xunta que prazo lle habilita "para presentar formalmente o recurso de casación", unha presenación que se impediría, segundo o Executivo, "se os recorrentes e a oposición aceptaran a mencionada proposta feita hai máis dun mes polo presidente da Xunta".
As sentenzas que botaron abaixo o cerne do decreto do plurilingüismo estimaron en parte os recurso presentados por colectivos tan variados como Queremos Galego, A Mesa pola Normalización Lingüística, CCOO, CIG-Ensino ou a Real Academia Galega. Aínda así, a Xunta continúa a censurar os recorrentes e a negar a relevancia duns ditames que anulan o artigo 5.2., no que se estipulaba a realización dunha enquisa lingüística entre os pais e nais en Educación Infantil, e o 12.3. no que se establecía que o alumnado podería usar na aula a lingua da súa preferencia.









luns, 28 de xaneiro de 2013

''Manda carallo, sen galego e sen traballo''

A indignación polas (contra)reformas que en materia económica e lingüística están a levar a cabo os gobernos do PP na Galiza e no Estado mesturáronse este domingo en Compostela coa auga da chuvia nunha mobilización nacional que culminou cunha contundente advertenza: "sairemos á rúa as veces que faga falta".

Contra "un ataque premeditado á nosa lingua" perpetrado polos gobernos do PP na Galiza e no Estado e crucial nas súas (contra)reformas "porque significa eliminar a cohesión social e a nosa identidade nestes tempos convulsos". Eis aquí, en palabras do voceiro de Queremos Galego, Carlos Callón, o eixo central de máis unha mobilización nacional que este domingo secundaron en Compostela milleiros de persoas. E fixérono malia a chuvia, malia o frío e malia que o Concello de Santiago puxo todo da súa parte para prohibir este acto en prol do idioma propio, para berrar por el e para protexelo das gadoupas da Xunta.

Polo cesamento dos ataques contra o galego.


A derrogación inmediata do decretazo que a consellaría de Educación impuxo tan pronto chegou ao goberno e que acumula seis sentenzas en contra ditadas polos TSXG; que o ministro español José Ignacio Wert recúe na súa teima de españolizar o ensino a través da LOMCE; e que o executivo de Feijóo dea un respiro á nosa lingua, afogada no anteproxecto de orzamentos que esta terza feira irá a debate no Parlamento e que reserva para a promoción do galego 5,7 millóns, exactamente un terzo do que Fraga investía hai 20 anos.
Eses tres, aderezados co rexeitamento máis fero a unhas políticas socio-económicas que incharon a cifra de desempregad@s até acariñar @s 300 mil, son os motivos que botaron o pobo á rúa máis unha vez e, como se advertiu desde o micro da Quintana, "todas as que fixeran falta" para pararlle os pés a un goberno que prefire pagar a escola privada no canto de defender a pública, acatando o estabelecido nunha lei que vén de Madrid e que reduce do 45% ao 35% a autonomía dos territorios para achegar contidos ao currículo educativo. O galego, as linguas propias, teñen nesta norma unha importancia menor que a relixión e a súa aprendizaxe fica suxeita á boa vontade de cada centro.


Tod@s, agás o PP


Aínda que se molle o galego non encolle ou Manda carallo, sen galego e sen traballo foron dous dos lemas máis coreados nas rúas, namentres a manifestación seguía o seu camiño cara á Praza da Quintana baixo o atento ollar dos antidisturbios.
Polo medio, dúas faixas sostidas por militantes independentistas amordazad@s cun colante da bandeira española recordaron, dunha banda, @s nove pres@s dispersad@s e, da outra, que 12 cidadá(n)s galeg@s fican pendentes de seren xulgadas por defender a lingua nunha manifestación contra Galicia Bilingüe realizada o 8 de febreiro de 2009.
A mobilización contou co apoio de todas as forzas políticas con representación parlamentar, agás o PP, que cadraron á hora de condenar as medidas contra a lingua e contra as políticas de benestar despregadas desde a Xunta. Queixouse Francisco Jorquera (BNG) da teima do titular de Educación, Jesús Vázquez, en aplicar "un decreto que condena o galego á marxinalidade no ensino"; Xosé Manuel Beiras (AGE) identificou no goberno galego "o problema dos colonizados" polo "autoodio" que manifestan cara aos símbolos da identidade nacional; e Pachi Vázquez (PSOE) tildou de "lamentábel" a "persecución" da cal Feijóo fai vítima a nosa lingua.

'Queremos galego na escola'


Se mexan por nós, caghamos por eles!", berrou Sés, parafraseando ao Leo e erguéndolle o dedo índice "ao meu meu que se chama Núñez Feijóo". Fíxoo desde o mesmo micro polo que pasaron o actor Luís Iglesia, a vicepresidenta da Mesa Susana Méndez, o músico Xurxo Souto ou a profesora Marta Dacosta, repartíndose a lectura do manifesto Queremos galego na escola.
O texto redactouno a plataforma cidadá para a ocasión e nel reclamouse que este idioma "non estea prohibido en ningunha materia"; que se desenvolva un plan de formación para que o persoal dos centros educativos "poida desenvolver a súa actividade profesional en galego"; e que se garanta a educación na lingua propia en todas as etapas educativas. Tamén se reivindicou "un teatro 100% en galego".
Canda Sés cantou Uxía a coñecida peza 'Tempestades de sal'. Cun bocadiño do seu retrouso pechamos esta crónica: Mais aínda seguimos aquí, a aturar tempestades de sal, resistindo a violencia de mans desas serpes e cans que nos queren calar.








O orzamento de Política Lingüística só aumenta as partidas para o ensino privado

Galicia sairá de novo á rúa este domingo polo galego. E farao para reclamar a presenza da lingua propia na escola, para mostrar oo seu rexeitamento á lei Wert e pola dignidade dun idioma que segue a sufrir o seu desmantelamento, tamén no plano económico. Queremos Galego chama á cidadanía a encher as rúas de Santiago, mentres os datos seguen a descubrir as penurias da política lingüística da Xunta.

Tal e como se tira dunha análise dos Orzamentos do Goberno galego para 2013, e como lembrou a Coordinadora de Técnicos de Normalización Lingüística (CTNL), a Xunta dedica á lingua galega tan só un terzo do que lle dedicou o Executivo de Manuel Fraga hai vinte anos. Os orzamentos da Secretaría Xeral de Política Lingüística (SXPL) neste ano non chegan aos 6 millóns, fronte aos 17,2 de 1993.

Pero se facemos unha análise comparativa dos orzamentos da SXPL, as prioridades quedan claras. O orzamento de Política Lingüística en 2013 só aumenta as partidas para o ensino privado e para as destinadas a recursos de fóra do país respecto ás de 2012. Así, tan só se incrementan as transferencias a centros e universidades privadas, ademais dos cartos destinados ao ensino superior de fóra de Galicia e ás bolsas no lectorado, como se pode comprobar no seguinte cadro.
Comparativa Orzamentos da SXPL 2012-2013 (en euros)

Obxecto                                                                         2012                 2013                     Diferenza


Transferencias correntes ás corporacións locais             520.000           400.000               -120.000

Subvencións a empresas editoras                                  300.000           250.000               - 50.000

Subvencións equipos de normalización                          50.700                        0                -50.700

Bolsas de investigación nos proxectos do Ramón Piñeiro 211.140        185.696                -25.444

Bolsas nos lectorados de lingua galega 1                           66.000        196.439                +30.439

Accións de promoción da lingua galega (fundacións)       200.000          75.836               -124.164

Publicacións                                                                   100.000         50.000                 -50.000

Campañas de normalización lingüística                          2.567.014    1.322.256            -1.244.758

Estudos e traballos de investigación                                  671.614      481.614               -190.000

Cursos e actividades de formación                                1.000.000      710.000               -290.000

Proxectos de fomento e formación de centros non universitarios 400.000    300.000       -100.000

Convenios con medios de comunicación                       800.000       700.000                 -100.000

Outros convenios                                                         220.107       220.107

Formación de persoal e normalización lingüística dos concellos 40.000       0                   -40.000

Transferencias a universidades privadas                      19.488            32.480                  +12.992

Transferencias e centros educativos privados para equipos de dinamización 30.700        +30.700

Transferencia á Real Academia Galega                     135.390            52.390                   -83.000

Transferencia á Fundación Galicia-América                10.000              8.000                     -2.000

Transferencia a universidades do resto de España     157.330           220.330                  +63.000

Creación de lectorados e centros de estudos galegos no estranxeiro 378.529 298.653     -79.876

Se reparamos na táboa, obsérvase que só hai catro partidos da SXPL que aumentan o seu orzamento. Os cartos dedicados ás bolsas nos lectorados de lingua galega pasan dos 166.000 euros de 2012 aos 196.439 de 2012, o que supoñen 30.439 euros máis. Tamén soben as transferencias a universidades privadas -en Galicia non as hai-, que pasan de 19.488 euros a 32.480 (+12.992) e as dedicadas a universidades do resto de España, de157.330 euros a 220.330 (+63.000). Ademais, apróbase unha nova partida de transferencias a centros educativos privados para equipos de dinamización, na que se inclúen 30.700 euros.





"Aínda que se molle, o galego non encolle"

"Aínda que se molle, o galego non encolle", berraban os milleiros de persoas que este domingo desafiaron un día de chuvia e frío para manifestarse en Compostela pola lingua propia. Convocados por Queremos Galego, cidadáns chegados de todos os puntos do país volveron saír á rúa solicitar a "derrogación inmediata do decretazo", logo das múltiples sentenzas do TSXG que eliminan o cerne da polémica norma do Goberno da Xunta de Núñez Feijóo, e para amosar o seu rexeitamento á lei Wert, a reforma educativa que deixaría o idioma nunha posición residual.

Pero foi, sobre todo, unha nova manifestación de dignidade e pola dignidade dun idioma galego minorizado e desprazado, nomeadamente no ensino. Unha marcha contra a política lingüística desta Xunta e tamén do Goberno central. "Queremos galego na escola", foi unha das reivindicacións máis escoitadas nunha marcha que, malia o mal tempo, volveu superar as expectativas. Cando a manifestación entraba na zona vella de Compostela, a cola aínda non saíra da Alameda.

"Manda carallo, sen galego e sen traballo", berraron tamén os manifestantes, que mesturaron na marcha a súa indignación polas consecuencias da crise coa reivindicación ante os continuos ataques que está a sufrir a lingua, sobre todo desde a chegada do goberno de Núñez Feijóo á Xunta. "Nas aulas de Galiza, queremos galego", insistían unha e outra vez os asistentes, que só se comezaron a librar da auga ao pouco de chegar á Praza da Quintana, cando co comezo dos discursos parou de chover.
Precisamente, neses discursos mesturouse a reivindicación coas críticas ao Concello de Santiago, que impediu a colocación dun palco para o acto final da marcha de Queremos Galego, unha medida que xa foi denunciada nos tribunais pola plataforma. Así o lembrou Carlos Callón, presidente da Mesa pola Normalización Lingüística e voceiro do colectivo, que recordou tamén a situación de penuria pola que pasa a lingua galega na escola. "O 95% dos centros de Ensino Infantil das cidades non empregan o galego", asegurou.

Antes, Uxía Senlle e Sés amenizaron o acto coa súa música, mentres Luís Iglesias, Pepe Penabade, Marta Dacosta ou Mercedes Queixas repartíanse para ler o manifesto. Nel, reivindicouse a "derrogación de forma inmediata" do decreto do plurilingüismo e reclamouse que o Goberno galego "promulgue unha nova norma que se basee no acordado por unanimidade parlamentar no Plan Xeral de Normalización da Lingua Galega".
Na marcha puidéronse ver representantes de todas as forzas parlamentarias da oposición, así como dos principais sindicatos e organizacións estudantís. Toda a oposición denuncia a política lingüística da Xunta.

Así, o secretario xeral do PSdeG, Pachi Vázquez, considerou “lamentable” que “o principal inimigo do noso sinal de identidade, que é o galego, sexa o Goberno de Galicia”.
O líder dos socialistas galegos considera “incrible" que teñamos que defender o galego "loitando contra o goberno que en teoría estaría encargado de defendelo”. Advertiu que “segue habendo persecución por parte do goberno” contra o galego a pesar da sentenza do TSXG que desbotou as principais medidas do decreto do plurilingüismo aprobado por Feijóo. Por iso, chamou así a “buscar un novo consenso” e instou ao Goberno a “deixar de usar a lingua propia como elemento de confrontación política”.
Pola súa banda, Francisco Jorquera, voceiro do BNG no Parlamento, criticou que a Xunta "teime en seguir aplicando" o decreto que "condena o galego á marxinalidade no ensino" malia "a opinión contraria da comunidade educativa e da cidadanía". Ademais, o portavoz de AGE, Xosé Manuel Beiras, cualificou os gobernantes do PP de "nazinecios" por crer que "toda a produción da cultura galega desde hai máis de mil anos é unha arte dexeneradora".

Para Beiras, o Goberno de Feijóo ten "o problema dos colonizados" porque manifesta "o seu autoodio e desprezo aos valores do seu pobo". "Eles non forman parte deste pobo, son unha excrecencia que parasita as enerxías deste pobo", engadiu, tras reivindicar que é "a cidadanía quen saca adiante o país mentres eles lle poñen freo". "Axita terán o seu castigo porque non hai que npoda pelexar contra un pobo en pé permanentamente", rematou.






"É incríbel ter que mobilizarse para que o galego non sexa excluído da escola"

"O pobo galego si pode cos elementos; que chove, que vente, o galego está presente". Carlos Callón, voceiro da plataforma Queremos Galego, destacou o apoio unha vez máis da cidadanía á manifestación que este domingo percorreu as rúas de Compostela. Malia o día frío e con intensa chuvia, foron milleiros os que berraron contra a política lingüística da Xunta e do Goberno central, enchendo unha Praza da Quintana que quedou pequena.

Todo, malia que, como recordou Callón, a plataforma "non conta con ningunha axuda do Goberno galego", pero si "coas dificultades que pon o goberno municipal de Santiago, que non quere ningún acto a prol do noso idioma na capital do país". "Tentaron impedir o Correlingua, a manifestación do Día das Letras e tamén este acto final, mais aquí estamos", dixo na súa intervención tras a marcha.

Callón destacou a "verdadeira calamidade" que supón a política lingüística dos executivos galego e español. "É incríbel que teñamos que mobilizarnos para que o galego non sexa excluído de calquera etapa educativa", afirmou, tras lembrar que "máis do 95% dos centros de Infantil das cidades non impartan nin un só día na lingua propia".
Ademais, Carlos Callón cualificou tamén de "incríbel" a proposta incluída da reforma educativa impulsada polo ministro Wert na que se pretende "que se pague con cartos públicos escolas privadas para aquelas familias que non queiran escoitar o galego". "Como poden ter a vergoña de propor iso?", preguntouse o presidente da Mesa pola Normalización Lingüística, que cre que para o PP "o idioma non é unha cortina de fume", senón un obxectivo "do seu ataque para acabar coa nosa identidade".

Por iso, destacou Callón, "é moi positivo" que "toda a sociedade organizada de Galicia estea aquí, excepto, lamentablemente, o Partido Popular". "Continuamos e continuaremos aquí; continuamos a erguer a bandeira de Rosalía e farémolo as veces que faga falta porque defendemos o dereito a existir como pobo", rematou o voceiro de Queremos Galego, antes de recordar a Avelino Pousa Antelo.






martes, 22 de xaneiro de 2013

Cara á FP dual pola porta de atrás?

Alternativa Galega de Esquerda denuncia que a Xunta está poñendo en marcha o novo modelo de formación profesional dual -no que boa parte dos procesos formativos se realizan nas empresas e non nos centros de ensino- e que o fai "pola porta de atrás", sen un marco normativo galego e sen ter en conta os órganos consultivos en materia de Educación.
Os deputados Ramón Vázquez e Xabier Ron poñen o énfase na sinatura o pasado 16 de xaneiro do conselleiro de Educación, Jesús Vázquez, dun convenio de colaboración co director financeiro da empresa Coremain SL. Vázquez e Ron denuncian que o acordo para establecer un proxecto empresarial de FP dual realizouse sen o correspondente marco normativo galego, "aplicando directamente o Real Decreto aprobado polo Ministro Wert en Madrid". Ademais, a Xunta non convocou ningún dos órganos consultivos legalmente establecidos para abordar calquera cambio na ordenación do sistema educativo galego, coma o Consello Galego de Formación Profesional, o Consello Escolar de Galicia ou a Mesa sectorial de Educación.
AGE tamén critica que o convenio se asinase con esta empresa sen abrir a posibilidade de que outras optasen a partircipar. Lembran que a Xunta leva asinados "unha chea" de contratos con Coremain SL, sendo por exemplo a adxudicataria dos ordenadores para o Plan Abalar cun valor de máis de 5 millóns de euros, entre outros programas e contratos.

Criticas ao modelo dual

A reforma da lei de Educación proxectada polo ministro Wert establece un novo modelo de formación profesional baseado no modelo dual alemán. A nova FP Dual permite facer prácticas e recibir formación en empresas, simultaneando traballo e estudos. Os expertos non ven a necesidade de realizar esta reforma e cualifican de "irreal" a aposta por ese modelo, polas diferenzas na estrutura produtiva entre España e eses países e polo bo funcionamento obxectivo dos estudos de formación profesional no Estado. Por exemplo, o ex director xeral de FP, Miguel Soler, considera que na práctica "só servirá para cubrir postos de traballo que requiren unha maior cualificación con estudantes a cambio de soldos que non chegarán ao salario mínimo", xa que a maioría das pemes non teñen capacidade para destinar a persoal á formación do alumnado.
De igual xeito, Alternativa Galega de Esquerda denuncia que “este enfoque formativo do PP pretende incorporar ao mercado laboral a xóvenes dende os 16 anos e especular con esta man de obra barata co pretexto de mellorar a oferta formativa, aproveitan a desregulación do mercado laboral co que se permitirá o libre despedimento de traballadores con antigüidade para contratar a aprendices en precario e con salarios miserables”. E engaden que "co establecemento dos chamados minijobs, o PP pretende ademáis un dobre obxectivo disfrazar as cifras do fracaso e abandono escolar e maquillar as cifras do paro, e todo con máis precariedade e menor calidade de ensino”.

Galicia non é Alemaña

Antonio Rial, profesor de Ciencias da Educación na USC, cre que “a formación profesional non necesita ningún cambio neste momento. Se cadra pódense facer algunhas modificacións nos ciclos medios, pero os ciclos superiores funcionan moi ben, sobre todo grazas a un profesorado de primeiro nivel e moi comprometido coa formación”. En concreto, Rial afirma que a implantación do modelo alemán "non sería posible", porque "Alemaña ten un sistema dual no que as grandes empresas son as protagonistas, e funciona porque estas empresas teñen aulas-talleres, polo que o sistema non é moi distinto ao que temos aquí, e só no último ano os alumnos se insiren no proceso de produción real. Aquí a situación é moi distinta; as empresas non forman os seus propios activos. E en calquera caso as prácticas en empresas en España melloraron moito, por iso non vexo necesarias as reformas”.
Concha Fernández, profesora de Formación Profesional Específica de Servizos Socioculturais e á Comunidade, afirma que "o modelo alemán serve para un modelo produtivo e de servizos coma o alemán. Pero en Galicia que persoa entra nunha empresa e dentro dela continuar a súa formación? Sería unha reforma irreal, que poría en mans das empresas persoas cunha cualificación mínima. En Alemaña alguén entra en Siemens nun nivel básico e ir progresando; en Galicia o 95% das empresas teñen menos de sete traballadores".
Os deputados de AGE sinalan tamén as diferenzas entre os contextos industrial, empresarial, laboral, económico e social de Galicia e Alemaña. Ramón Vázquez e Xabier Ron destacaron o investimento de 30 billóns de euros por parte do goberno alemán para o desenvolvemento da formación profesional, a participación de 500.000 empresas alemás que participan ofrecendo máis de 350 carreiras profesionais, e os 320.000 instrutores que traballan como formadores nas empresas, e todo nun contexto onde a taxa de paro se sitúa no 7,3 por cento e o salario medio nos 1.993 euros. Pola contra, en Galicia o 95 por cento das empresas son de pequeno tamaño e só o 0,67 por cento teñen 50 ou máis empregados.
Antonio Rial: “A implantación do modelo alemán non sería posible, porque Alemaña ten un sistema dual no que as grandes empresas son as protagonistas, e funciona porque estas empresas teñen aulas-talleres, polo que o sistema non é moi distinto ao que temos aquí, e só no último ano os alumnos se insiren no proceso de produción real. Aquí a situación é moi distinta; as empresas non forman os seus propios activos. E en calquera caso as prácticas en empresas en España melloraron moito, por iso non vexo necesarias as reformas”
Concha Fernández: "O modelo alemán serve para un modelo produtivo e de servizos coma o alemán. Pero en Galicia que persoa entra nunha empresa e dentro dela continuar a súa formación? Sería unha reforma irreal, que poría en mans das empresas persoas cunha cualificación mínima. En Alemaña alguén entra en Siemens nun nivel básico e ir progresando; en Galicia o 95% das empresas teñen menos de sete traballadores"









venres, 18 de xaneiro de 2013

A mala educación


Luís Seoane e Pablo Picasso coñecéronse en París. Dos encontros que mantiveron no obradoiro do segundo, ao longo do ano 1949, sairían interesantes conversas nas que Picasso falaría das súas lembranzas da infancia, dos anos que viviu na Coruña e da orixe dos seus medos daquela época, que non era outra que a escola. Lembraba con terror o soto do Eusebio da Guarda, onde os profesores infrinxían os castigos aos alumnos. Estamos a falar de fins do século XIX. Cada época ten o seu aquel, as súas eivas e desacertos.
Por sorte, hoxe o castigo físico desapareceu. A sociedade avanza e, con ela o sistema educativo, ou así debera ser. Sen embargo, non sempre acontece. A fins do século XX a educación pública galega era boa ou moi boa, dependendo dos centros. Había un compromiso da administración e o persoal docente respostaba axeitadamente a aquela responsabilidade, traballando para preparar ás que probablemente sexan as xeracións con mellor formación académica deste país.

Pero as cousas mudaron co paso de século, porque o escenario que envolvía ao sistema educativo cambiou vertixinosamente a partires da era dixital que se consolida co acceso en masa a Internet. As novas tecnoloxías, os novos xeitos de traballar, de infomarse e comunicarse transformaron un escosistema ao que aínda non fomos capaces de adaptarnos.
Imaxinemos, por exemplo, a Seoane e a Picasso, cando nenos, debuxando e pintando prolíficos, incansables nas súas respectivas casas da Coruña. Inventando historias e novas técnicas pictóricas para expresarse, para comprender o mundo que os rodea. Tardes enteiras adicadas a explorar, a motivarse, a dar renda solta ao talento, á creatividade. E imaxinémolos despois, tratando de dar ao profesor unha lección intragable, rancia, caduca, con instrumentos fósiles para a docencia, mapas cheos de couza, libros áridos e desfasados.

Pois un pouquiño así é como están as aulas galegas hoxe en día. Pícaros e pícaras que nacen cunha tablet debaixo do brazo, que navegan en Internet mellor que calqueira cerebriño de Silicon Valley, que son capaces de editar vídeos, manipular fotografías co Photoshop ou preparar un traballo con información do Google en menos que canta un galo. Estes cativos e cativas chegan a clase –despois de ter pasado moi pouquiño tempo cos seus pais que teñen horarios leoninos–, sacan a libretiña Taurus, o lápis Staedtler do número dous e botan case cinco horas copiando enunciados de libros moi mal editados como se fosen escribáns da Idade Media. Na aula é habitual que só haxa un ordenador que case sempre emprega o profesor para ver o solucionario dos exercicios.
O problema da educación pública non é só un problema de cartos. Nin un problema da comunidade educativa que a día de hoxe fai todo o que está na súa man para saír adiante, dentro dos recursos limitadísimos de que dispón. Pero si que se ten convertido nun problema político, como tantas outras cousas.

A controvertida lei Wert devólvenos á prehistoria, a un mundo que xa non existía, que estaba erradicado e que non queremos que volva. A verdadeira reforma educativa vai por outros camiños, acorde cos novos tempos que vivimos, difíciles de albiscar por un torito bravo, ensilvado en favorecer a privatización dun servizo básico e absolutamente esencial para o conxunto da sociedade como é a Educación. Pero os golpistas aproveitan o neboeiro da crise para retroceder todo o que poden a sotos de tortura onde o fracaso escolar do 25%, inconcebible e alarmante, poderá incrementar se non se teñen os recursos necesarios e a sensibilidade suficiente para aceptar que o coñecemento é un conxunto de valores que non se acadan a través de leis antidemocráticas, non consensuadas, mercantilistas e recentralizadoras. Pola vía do autoritarismo nunca se conseguiu a excelencia.
Ninguén pretende que todos sexamos Seoanes ou Picassos, ese é un lugar reservado para uns poucos visionarios. Pero si arelamos unha Educación pública e innovadora para todo o mundo, ben adaptada aos tempos que corren. O obxectivo da educación debe ser a formación de cidadáns con capacidade para pensar, non a produción dunha masa de futuros traballadores baratos e facilmente manipulables que se esquezan de que algún día existiron os dereitos.
















xoves, 17 de xaneiro de 2013

A lingua vale para a Xunta a metade dunha décima dos Orzamentos

Un 0,06%, a metade dunha décima. É o orzamento que a Xunta de Feijóo vai destinar á lingua galega en 2013 segundo denuncian a Coordinadora de Traballadores pola Normalización Lingüística e CIG-Ensino. Así as cousas, segundo os datos que manexa a CTNL, o investimento do PP en política lingüística "cae a mínimos históricos": a cuarta parte do que eran hai unha década e un terzo do que eran hai 20 anos, coa Administración Fraga.
Cómpre recordar que con este diñeiro se financian as actividades das equipas de normalización de 1.500 centros de ensino, que verán recortadas as partidas destinadas aos proxectos de innovación en normalización e aqueloutras que van parar a proxectos de fomento do uso da lingua propia do País.
Mais, para alén da escola, tamén se paga do mesmo peto o apoio á normalización nos 315 concellos galegos, os centros de estudo en 16 países, a formación requerida para a obtención dos certificados Celga, todas as accións e campañas de fomento do galego que parten da Xunta para medios de comunicación e proxectos editoriais ou os proxectos de investigación que realizan institucións como a Real Academia e o Consello da Cultura.
Por todo isto, a CTNL valora a tesourada á normalización como "un auténtico insulto ao idioma propio e ao principal símbolo de identidade do País". Na mesma liña pronunciouse CIG-Ensino, que debulla as accións das que é responsábel a secretaría xeral de Política Lingüística para sinalar que todas sofren "un fortísimo recorte" que supera nalgúns casos o 60% respecto de 2012 e o 90% respecto de 2005.
De maneira detallada e comparando co ano pasado, caen as partidas destinadas a campañas de normalización (49%), accións formativas (29%) e proxectos de ensino (25%). Respecto de 2005 cae un 56% o orzamento dos centros educativos, máis do 79% o das editoriais e máis do 92% aquel destinado a entidades sen fins lucrativas. Son algunhas das cifras do que a Coordinadora considera unha "inxustificábel perda de peso e visibilidade" de Política Lingüística.
Pola súa banda, CIG-Ensino fai fincapé tamén en que "malamente se poderán pór en práctica" os proxectos de normalización neste curso 2012-2013, pois informan de que o resultado dos proxectos premiados e a contía das subvencións "non se coñecerán antes do inicio do terceiro trimestre".



Nace a nova rede social Vituin, galega e en galego


Para todas aquelas persoas ou entidades que queiran formar parte dunha nova rede social, desta volta galega e en galego, nace Vituin.
Para se rexistrar nela pódese premer aquí.

Información tirada de Praza Pública.

martes, 15 de xaneiro de 2013

Programa xuvenil europeo.


People of the sea

Intercambio con 15+1 chipriotas con 15+1 galegos/as onde convivirán durante 8 días nas instalacións da Cidade Príncipe Felipe de Pontevedra.
O elemento común de ambos países é o mar, e dende ese punto de vista realizaremos as actividades. As principais actividades so a búsqueda e solución de desemprego, os problemas ambientais das rías e ríos "environment", a música (djembé), así como compartir experiencias e tradicións de cada país. Así deberán convivir tendo como lingua vehicular o inglés, xunto con 2 titores, un de Chipre e outro de Galicia.
  • Dimensión de aprendizaxe: a mocidade participante aprenderá sobre desemprego, reciclaxe e música.
  • Dimensión intercultural: a mocidade participante aprenderá de ambas culturas.
  • Dimensión europea: reflexionaremos sobre o concepto de cidadanía europea onde todas as persoas compartimos oportunidades e responsabilidades para facer que Europa sexa un lugar mejor

Datas: do 10 ao 18 de febreiro de 2013
Lugar: Cidade Príncipe Felipe
Destinatarios/as: mozos e mozas de 17 ata 30 anos.
Prazas: 15
Duración: 8 días.
Cota de Inscrición: 20 € (inclúe 8 días de aloxamento + pensión completa)

Pre-inscrición presencial ata o 25 de xaneiro.
Información e Inscricións: Oficina de Xuventude do Concello de Pontevedra. Casa Azul r/ Sor Lucia 2-3º. tel.  986 84 03 67 ou  652 809 080 xuventude@pontevedra.eu

Á procura da mobilización total nas aulas contra a 'Lei Wert'


Unha mobilización de toda a comunidade educativa contra a "contrarreforma" do ensino público ou, o que é o mesmo, contra LOMCE, máis coñecida como 'Lei Wert'. Un día despois de que as principais organizacións estudantís galegas acordasen un calendario de protestascontra o proxecto impulsado polo gabinete de Mariano Rajoy a Plataforma Galega en Defensa do Ensino Público vén amosar o seu apoio ás mobilizacións do estudantado ademais de convocar as súas propias, que van dende concentracións nas sete cidades o vindeiro día 31 ata un traballo centro por centro, co obxectivo de que en cada colexio e instituto se coñeza o contido da denominada "lei de mellora da calidade educativa" e se rexeite formalmente.
En rolda de prensa en Compostela a voceira da plataforma e presidenta da federación de ANPAS de Lugo, Elvira Lombao, sinala que tratarán de vehiculizar este rexeitamento a través de solicitudes aos consellos escolares e claustros, aos que lles pedirán "que aproben resolucións en contra da súa aprobación". "É o momento de dicir que non queremos esta lei -di-, que os pais e nais, o profesorado e o alumnado tamén somos membros da comunidade educativa e temos dereito a dar a nosa opinión".
A plataforma explicará nos centros que a lei terá "consecuencias nefastas" para o galego e inclúe preceptos "totalmente confesionais"
Trátase, explica Lombao, de "darlle un toque ao Goberno" e para isto cómpre tamén, na opinión da plataforma, espallar o contido da norma. Por este motivo celebrarán "conferencias e debates" en todas as comarcas, para "informar" dos detalles dunha lei "que supón unha recentralización de consecuencias nefastas para o noso idioma", ademais de implantar nas aulas normativas "totalmente confesionais" xa que "a relixión non só segue sendo materia curricular, senón que se ve reforzada, na medida en que lle crean unha alternativa e pasa a ser específica en Bacharelato", di Anxo Louzao, secretario nacional da CIG-Ensino, sindicato integrado no colectivo.
Ademais, apunta, a LOMCE "está impregnada en todo o seu texto dunha ideoloxía mercantilista, neoliberal e privatizadora", toda vez que "non só seguirán concertándose os actuais niveis" nos que xa está implantado este modelo, senón que tamén haberá FP básica concertada nun escenario xeral no que a lei estipula que haberá "centros privados concertados" na medida en que haxa "demanda social" deles. Isto, di Louzao, é "moito máis grave", porque "substitúe" o principio vixente, segundo o cal "a administración estaba obrigada a ofertar prazas públicas dabondo".
Ao tempo explica Louzao que na banda do profesorado a estas razóns únese a "desautorización" dos docentes que, na súa opinión, a lei introduce coa recuperación das reválidas. Estas probas "condicionan totalmente o traballo" dos e das profesionais do ensino, con "avaliacións externas" que apostan por unha escola "elitista, clasista e só pensada para unha minoría da sociedade". O alumnado que "non supere" as reválidas, augura, vai ser "expulsado do sistema" e isto afectará máis "ás clases máis desfavorecidas". "Unha parte moi importante do alumnado vai ser expulsado sen ter a mínima titulación", augura.

Curso UNED- Busqueda de empleo en Alemania



La UNED (Universidad Nacional de Educación a Distancia)y el Concello de
Mos organizan para los días 8 y 9 de febrero en el Centro Desarrollo Local
de Mos un curso de 10 horas de duración EL MERCADO LABORAL EN ALEMANIA,
donde se facilitará a los participantes información sociolaboral de
interés sobre el pais y dos talleres en lengua alemana de elaboración de
cv y entrevista de trabajo. Para estos dos talleres es necesario tener
conocimientos de alemán equivalente un nivel de A 2 de una Escuela Oficial
de Idiomas.

Adjuntamos el cartel y tríptico de inscripción, rogando la correspondiente
divulgación de la actividad formativa, que también esta disponible en
nuestra página web www.uned.es/ca-ourense.

Convocatoria de cursos de lingua galega Celga 1, 2, 3 e 4 para o ano 2013


AVISO: convocatoria de cursos de lingua galega Celga 1, 2, 3 e 4 para o ano 2013
No DOG núm. 4, do luns 7 de xaneiro de 2013 publícase a convocatoria para os cursos de lingua galega preparatorios para as probas dos niveis Celga 1, 2, 3 e 4, para adultos e colectivos de Galicia. Todos os cursos (70 horas lectivas) e os exames están programados para antes do verán.
O día 25 de xaneiro de 2013 finaliza o prazo de solicitude, particular ou colectiva, dos cursos. As solicitudes poderanse presentar no rexistro xeral do edificio administrativo da Xunta de Galicia (Campolongo), ou en calquera das dependencias ás que se refire a Lei 30/1992 (art. 38.4º). Os modelos de solicitude son os anexos I (para particulares) e II (para colectivos) da orde publicada no DOG (envíase no arquivo xunto).
Cursos Celga programados en Pontevedra:
Celga 1Celga 2Celga 3Celga 4
Código: CL1201336000001
Lugar: Edificio Xunta (rúa Fernández Ladreda, 43 P) baixa
Datas: 18.3.2013 ao 30.5.2013
Horario: 17.00-19.30
Días: luns a xoves
Código: CL2201336000002
Lugar: Edificio Xunta (rúa Fernández Ladreda, 43 P)
Datas: 18.3.2013 ao 30.5.2013
Horario: 10.00-12.30
Días: luns a xoves
Código: CL3201336000003
Lugar: Escola Oficial de Idiomas rúa: Celso E. Ferreiro, s/n
Datas: 5.3.2013 ao 21.5.2013
Horario: 9.00-12.00
Días: martes e venres
Código: CL4201336000004
Lugar: EOI
Rúa: Celso E. Ferreiro, s/n
Datas: 5.3.2013 ao 21.5.2013
Horario: 9.00-12.00
Días: martes e venres

Código: CL2201336000005
Lugar: Edificio Xunta (rúa Fernández Ladreda, 43 P)
Datas: 18.3.2013 ao 30.5.2013
Horario: 16.00-18.30
Días: luns a xoves
Código: CL3201336000006
Lugar: EOI
Rúa: Celso E. Ferreiro, s/n
Datas: 5.3.2013 ao 23.5.2013
Horarios:
martes:18.30-20.30
mércores: 20.00-21.30
xoves: 18.30-21.00
Código: CL4201336000007
Lugar: Edificio Xunta (rúa Fernández Ladreda, 43 P)
Datas: 18.3.2013 ao 30.5.2013
Horario: 10.00-12.30
Días: luns a xoves



Código: CL4201336000008
Lugar: Edificio Xunta (rúa Fernández Ladreda, 43 P)
Datas: 18.3.2013 ao 30.5.2013
Horario: 18.30-21.00
Días: luns a xoves

Ademais destes cursos programados, os colectivos, asociacións e entidades que o desexen poderán organizar cursos Celga. Canda a solicitude deberán achegar unha listaxe cun mínimo de 20 persoas preinscritas. Ademais, o colectivo deberá dispoñer dun local convenientemente equipado para a impartición do curso. Poderanse priorizar solicitudes de colectivos que organicen cursos dirixidos a grupos determinados con especificidades especiais.