mércores, 22 de decembro de 2010

A DESBORDANTE FESTA DE NADAL NO COLEXIO





Como tódolos anos nestas datas temos a honra de disfrutar dos resultados do desaforado esforzo e traballo dos alumnos e alumnas, xunto co de todo o equipo docente, que nesta ocasión tivo unha desbordante asistencia de público adulto. Parabens para todos, BO NADAL E INMELLORABLE ANO 2011!!!

mércores, 15 de decembro de 2010

Novo número d’O Cartafol, con varias reportaxes sobre a campaña Témoslle lei

Xa está en liña o número de decembro da revista do Servizo de Normalización da Universidade de Santiago de Compostela O Cartafol. Nesta edición faise un seguimento especial da campaña de promoción do galego na Facultade de Dereito, que anunciabamos no boletín anterior: Témoslle lei. Entrevistas a representantes das asociacións estudantís que participan na campaña e artigos sobre os materiais e o desenvolvemento da campaña ocupan a maior parte do contido desta excelente revista en liña.

Máis información en:
http://ocartafol.usc.es/
http://ocartafol.usc.es/cartafol/contidos/novas/novas_0056.html
http://ocartafol.usc.es/cartafol/contidos/novas/novas_0055.html
http://ocartafol.usc.es/cartafol/contidos/novas/novas_0054.html

Premio Apalpador 2010

A Irmandade dos Apañacastañas convoca o primeiro Premio Apalpador para actividades lúdicas e educativas que teñan como centro a figura do Apalpador. O premio está dirixido aos responsábeis educativos, animadores culturais, alumnos e calquera outra persoa física ou xurídica que teña como misión a organización de actividades para as nenas e os nenos.
O premio divídese en dous, un para actividades escolares e outro para extraescolares. Para participar haberá que inscribirse previamente neste mesmo sitio web Premio Apalpador 2010/Inscrición/ cunha achega de 10 € antes do 1 de xaneiro do 2011. Se merca calquera dos produtos á venda na tenda do Apalpador a inscrición será de balde. Os orixinais presentaranse tamén a través deste mesmo sitio web até o 16 de xaneiro.

Máis información en:
http://www.apalpador.com/premio

O secretario de Política Lingüística afirma que Blanco Amor é unha das pezas clave na dignificación do galego

Así se expresou o responsable de Política Lingüística, Anxo Lorenzo, na ofrenda floral en recordo do escritor no día en que se cumpriron 31 anos do seu pasamento. Por outra banda, o responsable de Política Lingüística anunciou a creación en Ourense dun seminario permanente para a dinamización lingüística que levará o nome de Eduardo Blanco Amor. A iniciativa, que se realizará en colaboración coa Deputación de Ourense, ten como obxectivo “facer prender nos máis novos o amor polo galego e a reflexión sobre a necesidade de usalo e de coidalo nesta Galicia do século XXI”.

Máis información en:
http://www.xunta.es/linguagalega/noticias/1638

Anxo Lorenzo avoga por un traballo “coordinado e colaborativo entre administracións e institucións” na promoción lingüística

O secretario xeral de Política Lingüística, Anxo Lorenzo, salientou a importancia de levar a cabo un “traballo coordinado e colaborativo entre administracións e institucións a prol do fomento do uso do galego”. Así o afirmou no acto de inauguración das VII Xornadas sobre Lingua e Usos, que este ano se centran no tema “lingua e sanidade”. O secretario xeral de Política Lingüística aproveitou o marco das xornadas, organizadas polo Servizo de Normalización Lingüística da UDC, para anunciar a integración da Xunta de Galicia na Comisión Interuniversitaria de Política Lingüística, “para unha mellor coordinación da actuación dos poderes públicos competentes no ámbito da política universitaria de normalización lingüística”.

Máis información en:
http://www.xunta.es/linguagalega/noticias/1639

mércores, 1 de decembro de 2010

O Dicionario galego de Pedagoxía contribúe a reforzar a presenza do galego no ámbito das ciencias da educación

O conselleiro de Educación e Ordenación Universitaria, Xesús Vázquez Abad, salientou na presentación da obra que a elaboración de materiais lexicográficos e terminolóxicos en galego axuda a afianzar a presenza e a vitalidade do idioma nos distintos sectores sociais. Neste sentido, o conselleiro destacou que “o Dicionario galego de Pedagoxía recompila unha importante mostra do saber sobre as Ciencias da Educación e constitúe, sen dúbida, unha ferramenta de grande utilidade para os profesionais do ensino, para os estudantes ou calquera outro cidadán interesado pola educación en Galicia”.

Máis información en:
http://www.xunta.es/linguagalega/noticias/1616

A Secretaría Xeral de Política Lingüística promove o primeiro Dicionario galego de recursos humanos

A Secretaría Xeral de Política Lingüística, a través do Termigal, e en colaboración coa Real Academia Galega e a Fundación Galicia Empresa, impulsou esta ferramenta que busca facilitar a incorporación do galego ao ámbito socioeconómico.

Máis información en:
http://www.xunta.es/linguagalega/noticias/1613

Dicionario de pronuncia da lingua galega

O Instituto da Lingua Galega (ILG) da USC e mais a Real Academia Galega acaban de publicar o Dicionario de pronuncia da lingua galega, do profesor Xosé Luís Regueira. Esta obra parte do VOLG e fornece transcricións fonéticas para un total de 47.000 palabras cunha proposta de pronuncia modelo.

Máis información en:
http://ilg.usc.es/ilgas/novas_publicacions/Dic_pronuncia_intro_2010.pdf (introdución e índice da obra)
http://ocartafol.usc.es/cartafol/contidos/pasaafolla/pasaafolla_0009.html (recensión do dicionario publicada en O Cartafol Dixital da USC)
http://www.ctnl.org/web/notic.php?ide=737&desc=dicionario_de_pronuncia_da_lingua_galega
http://www.farodevigo.es/sociedad-cultura/2010/11/19/o-primeiro-dicionario-pronuncia-galega-propon-patron-oral-uniforme/492559.html

Admiten o recoñecemento do idioma galego na reforma da Lei da comarca do Bierzo

Unha emenda aprobada por unanimidade aposta porque “Castela e León facilitará a participación da Comarca do Bierzo nas actuacións que realice para a promoción da lingua galega no seu ámbito territorial”. A Comisión de Interior e Xustiza das Cortes de Castela e León admitiu esta emenda co voto unánime dos tres grupos parlamentarios, PP, PSOE e grupo mixto.

Fala Ceibe admite que o contido xurídico deste novo artigo lingüístico queda lonxe da súa proposta de emenda, que facía mención á creación dun servizo lingüístico comarcal, á recuperación da toponimia ou ás relaciones de colaboración con Galicia.

Máis información en:
http://www.elbierzodigital.com/bierzo/?noti=48088

A Universidade de Vigo edita o primeiro dicionario galego- -éuscaro e éuscaro-galego da historia

A lingua galega dispón dun dicionario galego-éuscaro e éuscaro-galego, unha obra na que se recollen arredor de 5.000 entradas e outras tantas frases feitas e expresións típicas.

Máis información en:
http://duvi.uvigo.es/index.php?option=com_content&task=view&id=4111&Itemid=51
http://www.galiciahoxe.com/mare/gh/galego-xa-fala-euscaro/idEdicion-2010-11-18/idNoticia-612058/
http://www.lavozdegalicia.es/ocioycultura/2010/11/18/0003_8856362.htm

O secretario xeral de Política Lingüística e o director xeral de Xustiza participaron na IV Xornada Xustiza e Lingua: Reflexións para a Normalización

O secretario xeral de Política Lingüística e mais o director xeral de Xustiza participaron nesta xornada de reflexión e análise organizada polo Colexio de Avogados de Santiago de Compostela. Durante a súa intervención, Anxo Lorenzo incidiu nalgúns dos principais retos para o galego neste sector, que pasan por “introducir o idioma como lingua habitual de traballo na Administración de xustiza en Galicia e garantir a capacitación lingüística dos seus traballadores”. Ademais, Anxo Lorenzo incidiu na necesidade de conseguir que a todo cidadán se lle ofreza a posibilidade de ser atendido en galego, así como na importancia de actualizar os recursos técnicos que faciliten o traballo dos funcionarios neste idioma.

Pola súa parte, o director xeral de Xustiza, Juan José Martín, tamén destacou “o desexo do Goberno galego de que se mellore o emprego da lingua galega na Administración de xustiza da nosa comunidade, polo que se seguen liñas de acción específica”. Martín incidiu en que se está a traballar para que “a promoción e o uso da lingua reflicta o establecido na lexislación vixente, que regulamenta a cooficialidade lingüística dentro do marco do respecto á igualdade de dereitos lingüísticos da cidadanía”.

Xunto cos representantes da Administración galega participaron na IV Xornada Xustiza e Lingua o académico da lingua galega Manuel González González, o maxistrado do Tribunal Superior de Xustiza de Galicia Fernando Fernández Leiceaga e o avogado Xoán Antón Pérez Lema. Todos eles tiveron ocasión de expoñer as súas reflexións sobre o proceso de normalización no eido xudicial e foron críticos coa cativeza dos avances que se produciron ata agora.

Máis información en:
http://www.xunta.es/linguagalega/noticias/1631

Témoslle lei, campaña a prol do uso do galego na Facultade de Dereito da USC

O lema elixido, Témoslle Lei (dise da acción de gardar fidelidade, sentir simpatía ou terlle un grande aprecio), incide no feito de que o galego conta con lexislación que busca protexelo e fomentalo, e, asemade, na cuestión afectiva e identitaria cara á nosa lingua.

Esta campaña supón o inicio do desenvolvemento dun plan específico de normalización lingüística na Facultade de Dereito compostelá, co obxectivo de levar o uso do galego na docencia ata o 30% das horas de clase en tres cursos académicos. A campaña conta cun sitio web onde se pode consultar lexislación en galego e outra documentación, ademais dun vídeo onde profesionais do ámbito do Dereito opinan sobre o seu traballo cotián en galego. O fiscal xeral de Galicia, Carlos Varela; a maxistrada xuíza do Xulgado do Social núm. 2 de Santiago, Paz Filgueira; o xuíz Luís Villares; o decano do Colexio de Avogados de Santiago, Evaristo Nogueira; o secretario do Concello de Outes, Xaquín Monteagudo; e os profesores da Facultade de Dereito José Antonio Gómez Segade e Antonia Nieto Alonso participan neste vídeo e animan ao PDI e ao alumnado do centro a incorporar a lingua galega no seu quefacer profesional.
O inicio da campaña realizouse por sorpresa o luns 22 de novembro na Facultade de Dereito.

Máis información en:
http://www.usc.es/temosllelei/que-e-temoslle-lei.html (web da campaña)
http://xornal.usc.es/xornal/acontece/2010_11/noticia_0118.html
http://gl-es.facebook.com/people/Temoslle-Lei-Dereito-Usc/100001886173759 (perfil ca campaña en Facebook)
http://www.ctnl.org/web/notic.php?ide=740&desc=na_facultade_de_dereito_da_usc_queren_terlle_lei_a_lingua
http://www.galiciahoxe.com/mare/gh/temoslle-lei/idEdicion-2010-11-23/idNoticia-613837/
http://agalegainfo.crtvg.es/videos/?emi=11214&corte=2010-11-22&hora=14:53:15&canle=tvg1#