Comeza hoxe o curso para 200.000 nenos entre críticas pola Lomce

Xusto un día antes de que máis de 200.000 nenos de tres a doce anos inicien as clases, o DOG publicaba onte o decreto de primaria, que se aplica este curso en primeiro, terceiro e quinto de primaria desenvolvendo a Lomce. Unha das críticas dos sindicatos foi precisamente a improvisación e as présas para aplicar esta lei, aínda que a Xunta matiza que a comunidade escolar ten este texto dende hai catro meses. As acusacións de falta de diálogo levaron ao sindicato CC.OO. a rexeitar o convite oficial para participar na inauguración oficial do curso que realizarán os reis o día 16 en Pereiro de Aguiar. A volta ás aulas levará esta mañá a máis de 200.000 nenos a un millar de colexios diferentes.