luns, 8 de setembro de 2014

A iniciativa E-DIXGAL leva os libros dixitais a máis de 2.300 alumnos de quinto de primaria

Semella que os libros dixitais van estar este curso máis preto do noso alumnado ou, mellor dito, máis dispoñíbeis. En total, até 84 centros educativos galegos inician a súa actividade este día 10 de setembro (o curso 2014-2015) con conexión directa á plataforma de contidos dixitais da Xunta. Segundo informa a Axencia para a Modernización Tecnolóxica de Galicia (AMTEGA), responsábel da dita contorna virtual de aprendizaxe, esta vai ofrecer contidos curriculares dixitais e de balde a máis de 2.300 alumnos de quinto de primaria, que serán accesíbeis tamén sen necesidade de conexión.
Trátase do primeiro chanzo de E-DIXGAL, unha iniciativa abeira ao Proxecto Abalar da Consellería de Cultura e Educación e AMTEGA. Con esta iniciativa quérese abranguer en tres anos 22.500 alumnos de quinto e sexto de primaria e primeiro e segundo da ESO. Segundo informa a axencia, “o investimento total é de preto de 2 millóns de euros e suporá un aforro total de 4,5 millóns de euros para a Administración autonómica e as familias”.
Lembrar que para a materialización da plataforma e para o subministro de contidos iniciouse un concurso público que finalmente foi gañado polas firmas Iecisa, Altia, Coremain e Netex. A plataforma fornece, nesta primeira fase, contidos curriculares para quinto de primaria de dous provedores, a editorial EDEBÉ e a empresa de contidos dixitais Netex.
O proxecto foi presentado en todo detalle este venres 5 de setembro, perante directores e coordinadores tecnolóxicos dos centros implicados e perante os asesores de Abalar, por parte de Xesús Vázquez e Mar Pereira, responsábeis de Educación e Cultura e AMTEGA, respectivamente. Vázquez salientou “a boa acollida da iniciativa” e engadiu que foron 90 as solicitudes recibidas na Consellería, nunha convocatoria que, dixo, “foi un éxito entre os centros públicos, que representan o 90% dos proxectos presentados, sendo un de cada tres centros públicos Abalar de primaria beneficiarios do proxecto”.
Asemade, tamén fixo saber que os profesores implicados dos devanditos 84 centros son preto de 600. En virtude do proxecto, engadiu, poderán elaborar “a súa propia mochila dixital” escollendo, a través da plataforma dixital, os contidos formativos dos dous provedores que participan na iniciativa, coa posibilidade de combinar unidades de ambos para unha mesma materia. No acto tamén se fixo saber que os profesores poderán acceder dende esta contorna virtual aos máis de 2.000 recursos educativos do espazoAbalar. Tamén se habilitará conexión co Punto Neutro do Ministerio de Educación para posibilitar o acceso a contidos de pago de empresas editoras.
Pola súa parte, o alumnado poderá facer uso da plataforma “de modo equivalente ao do docente, aínda que as opcións que verá son as exclusivas do seu perfil”, explicaron Vázquez e Pereira. Deste xeito, as rapazas e os rapaces accederán ao itinerario formativo que lles asigne o profesor e poderán visualizar o calendario de contidos e actividades propio. O equipo básico de acceso á plataforma por parte do alumno é o netbook de Abalar que se lle asigna desde o inicio de curso.

Ningún comentario:

Publicar un comentario