luns, 15 de setembro de 2014

A Xunta de Feijóo gasta 190 € menos por habitante en ensino

Comisións, CIG e PSdeG póñenlle cifras ao impacto que están a ter os recortes na educacións. Hai menos profesores, peor pagados, máis precarias e menos prazas en FP.

O portavoz de Educación do Grupo Socialista, Vicente Docasar, presentou unha moción no Parlamento na que lle reclama á Xunta que repoña as prazas docentes e as condicións laborais “escamoteadas por Feijoo aos profesores e profesoras durante os seus cinco anos de goberno”.
 
Segundo datos do PSdeG, o gasto en educación caeu de 860 a 670 euros por habitante dende que os conservadores recueperaron o poder en 2009.  Pola súa banda, o sindicato CC.OO denuncia unha redución de máis de 1.500 docentes nos últimos cursos e a duplicación da cifra de persoal interino, que se sitúa en case o dez por cento
 
Esta falta de investimento está a crear evidentes problemas.  “Neste momento hai máis de 1.200 profesores/as que van impartir unha materia da cal non son especialistas e máis de 500 profesores/as que teñen que impartir docencia en máis de un centro", denunciaba esta semana a CIG-Ensino, o sindicato máis representado nas escolas públicas. 
 
O responsable socialista lembra que o profesorado galego ten perdido un 30 por cento do seu nivel adquisitivo, segundo os sindicatos, e ve cómo" o goberno galego está a impoñer unhas condicións de traballo cada vez mais precarias". 
 
O parlamentario socialista esíxelle ao goberno galego que poña en marcha unha serie de plans plurianuais . Así,  clama en primeiro lugar un plan plurianual de mellora das instalacións dos centros educativos obsoletas “por falta dun axeitado mantemento durante os últimos anos”.
 
Tamén demanda un plan plurianual “para renovar os equipamentos didácticos dos centros educativos que foron quedando obsoletos durante os últimos anos” e un último plan plurianual “para equiparar o ancho de banda de acceso á Internet dos centros do medio rural cos centros do medio urbano”.
 
En opinión da CIG as perspectivas para este ano non son boas. “O inicio do curso preséntase sumamente conflitivo, con grandes carencias no ensino público de profesorado ou aulas masificadas mentres se seguen a ampliar os concertos educativos, aquelas unidades que se subvencionan ao 100% co erario público”, explican dende o sindicato nacionalista.
 
Pola súa banda, o sindicato CC.OO critica tamén a redución da oferta educativa na formación profesional básica pois "a Consellaría de Educación presume de promover a FP, pero o certo é que a oferta para este curso diminuíu en 520 prazas".
 
O martes está previsto que os reis de España inauguren o curso escolar visitando o colexio Ben Cho Sey de Ourense. As diferentes plataformas do sector acudirán a protestar ás portas do centro.

Ningún comentario:

Publicar un comentario