martes, 16 de setembro de 2014

A CIG-Ensino apoia ao profesorado do IES A Pobra diante dos ataques da Consellaría de Educación

A CIG-Ensino esíxelle ao Xefe Territorial que rectifique e pida desculpas ao equipo docente do centro.

A CIG-Ensino quere amosar o seu apoio ao profesorado do IES A Pobra diante das declaracións do Xefe Territorial da Coruña nas que responsabiliza aos docentes da situación de abandono do centro escolar e das súas carencias.
A CIG-Ensino lembra que a responsabilidade sobre o mantemento das instalacións educativas lle corresponde á Administración, tanto autonómica como local e que as deficiencias deste centro súmanse a todas as incidencias que se están presentando en numeroso centros educativos debido aos recortes cos que se castiga ao ensino público namentres se subvenciona ao privado.
Para a CIG-Ensino estas declaracións supoñen unha afronta máis a un colectivo, o do profesorado, que non ten ningunha capacidade de decisión sobre os recursos cos que se dota aos centros e que non fai máis que sufrir nas súas costas o deterioro do ensino público, os recortes salariais, as amortizacións de prazas, incrementos de horario, número de alumnos e alumnas por aula.
A CIG-Ensino esíxelle ao Xefe Territorial que rectifique e pida desculpas ao equipo docente e directivo do centro e dirixa os seus esforzos en cumprir coa súa obriga de dotalo dos recursos necesarios para que o profesorado e o alumnado poidan desenvolver a actividade escolar nunhas condicións dignas. 

Ningún comentario:

Publicar un comentario