Presentado un kit dixital para facilitar a normalización do galego

Esta semana, até este xoves, estanse a desenvolver os XVI Encontros para a Normalización, uns encontros que veñen da man do Centro de Documentación Sociolingüística (Consello da Cultura Galega) e que podemos ver en directo a través da web de seu, consellodacultura.gal. Entre os recursos expostos nas xuntanzas e dirixidos a fomentar o emprego (e o emprego correcto) do galego a todos os niveis sociais, cómpre salientar un recurso que nos toca de preto pola súa ampla vertente dixital. Falamos do Kit para a Normalización, un sitio web no que se compilan ferramentas e contidos precisos para a planificación lingüística.
Segundo fixeron saber os responsábeis da súa posta en marcha, trátase “dun recurso pensado para facilitar o traballo das persoas que están a participar na normalización do galego, especialmente daquelas que realizan o seu labor desde os concellos de Galicia”.
O Kit, que xorde a raíz dun convenio formalizado entre o Consello da Cultura Galega e a Secretaría Xeral de Política Lingüística, xunta información moi diversa. Segundo se fixo saber, “abrangue bibliografías, lexislacións ou recursos prácticos para a elaboración dunha diagnose fiábel sobre o contexto, un decálogo de boas prácticas, ou un directorio de entidades relacionadas coa lingua, e materiais de cursos, xornadas, recursos lingüísticos e webs de referencia”.
Os encontros conclúen este xoves prestando atención á política das institucións tomando como referencia os casos da xustiza e dos medios de comunicación.