mércores, 15 de xullo de 2015

Lalín pecha a UNED e destina o diñeiro a axudas a universitarios

O Concello resolveu o convenio co centro a distancia por «a ínfima oferta académica» e o escaso número de alumnos matriculados

O Concello de Lalín adoptou a decisión de finiquitar o convenio que existía entre o goberno municipal e o Padroado do centro asociado da UNED en Pontevedra e pechar a aula lalinense. A razón é «a ínfima oferta académica» da que dispuña o centro na zona e o escaso número de alumnos matriculados.
A cambio, o Concello ten previsto incrementar a cantidade destinada aos bonos de transporte público destinados a universitarios. a idea é poder beneficiar a un número maior de estudantes e «propiciar ou seu acceso a un maior número de titulacións». O Concello ampliará tamén a cobertura destas axudas e si ata agora, o bono estaba dirixido só a estudantes de Lalín que cursasen estudos por libre, agora ampliarase tamén aos que necesiten desprazarse a centros asociados da UNED situados noutras localidades.
Desde o goberno local recórdase que o acordo, entre Concello e UNED, mantiña aberta un aula na que se impartía unha única titulación: neste caso a de Administración e Dirección de Empresas e na que este ano, apuntan, «só estaban matriculados trece alumnos, repartidos en tres cursos».
A aula da UNED está situada no que no seu día foi o antigo Centro de Formación Téxtil. as obras de acondicionamento do edificio, situado no polígono Lalín 2000, foron executadas no seu día por Antalsis. O centro asociado da universidade a distancia empezou a súa actividade en Lalín en novembro do 2007 con cursos de formación e o curso de acceso á Universidade para maiores de 25 anos.

Un aforro que irá a políticas sociais e aos bonos de transporte

O goberno local recorda que o Concello de Lalín estaba a destinar á aula da UNED máis de 50.000 euros para manter operativo este servizo, o que supón, apuntan, un gasto de caso catro mil euros por alumno. Anuncian que o aforro derivado da resolución do convenio coa UNED e que, explican, «unha parte aínda está por cuantificar», destinarase a incrementar as axudas para os bonos de transporte. Outra parte deste aforro, sinalan, «servirá para aumentar as partidas do Concello adicadas a políticas sociais, a gran prioridade deste mandato»·
No momento da súa apertura, a finais do 2007, a UNED tiña só dous convenios en España para a apertura deste tipo de centros. Un deles era o de Lalín. Nos últimos anos, o Concello de Lalín buscou apoios de cara á posibilidade de incrementar a oferta do centro con novas titulacións, previstas na súa apertura, pero que non chegaron a materializarse.

Ningún comentario:

Publicar un comentario