Un estudo demostra que o LTE é a solución máis eficiente para universalizar a banda larga móbil no rural

As zonas rurais, para que enganarnos, seguen a estar en desvantaxe no que se refire a comunicacións, e xa non digamos en materia de comunicacións móbiles avanzadas e banda larga móbil. Este é un problema que atinxe a todo o eido xeográfico estatal, pero na nosa terra (con tantos núcleos de poboación espallados e cunha orografía tan complexa e accidentada) adquire unha maior dimensión. Hai solucións definitivas para isto e que ademais teñan un compoñente universalizador? A xulgar polos traballos desenvolvidos por un grupo de investigadores da Universidade Politécnica de Madrid, si que hai solución: a fórmula do LTE empregada a esgalla polas operadoras.
O seu traballo, un estudo “tecnoeconómico”, baseouse pois en avaliar as mellores tecnoloxías para levar a banda ancha da rede móbil (30 Megabits por segundo) até a maior cantidade de poboacións rurais de menos de 5.000 habitantes. O modelo desenvolvido polos científicos sinala que o estándar de comunicacións móbiles LTE é o mellor para asegurar o retorno do investimento.
Os investigadores forman parte do Grupo de Tecnoloxías da Información e a Comunicación da Universidade Politécnica de Madrid (UPM). Para o seu labor, botaron man dun modelo tecnolóxico de seu, Rocket, co que puideron demostrar que o estándar de comunicacións móbiles Long-Term Evolution (LTE) é a tecnoloxía máis axeitada e máis eficiente en custos para a maior parte da poboación (entre o 75 e o 98,5%), observándose que é a única solución posíbel para o rango do 90% ao 98,5% dos habitantes (as tecnoloxía VDSL non ten capacidade para cubrir esta franxa). Para o 1,5% restante, coma en tecnoloxías previas, aconséllase que se cubra con banda larga vía satélite.
Respecto dos compromisos impostos aos operadores (Telefónica, Orange e Vodafone está obrigados a prover conxuntamente banda larga de 30 Mbps ao 90% dos concellos de menos de 5.000 habitantes), corroborouse que “son asumíbeis” por estes, posto que “non superan a tendencia de investimento anual de anos anteriores”.