xoves, 23 de xullo de 2015

"Se non se inclúe o amor non haberá educación auténtica"

O gaditano Fernando Barragán Medero é profesor de Didáctica e Organización Escolar da Universidade da Lagoa (Tenerife) e ten ás súas costas unha longa traxectoria bibliográfica sobre feminismo, desde a violencia de xénero, a sexualidade ou a coeducación. Presentado, na súa novena vez no curso de verán de Lalín, por Celso Taboada, da Oficina Municipal de Igualdade, protagonizou unha das conferencias de onte na que se definiu como "un idealista" que cre que todas as persoas nacen coa capacidade e o desexo de axudar e investir tempo nos demais.
O seu relatorio estivo articulada en base á coeducación e a necesidade de levar a ela os sentimentos: "Se non se inclúen o amor, as paixóns, as ilusións, non poderá haber xamais unha coeducación auténtica que non recoñeza ese modelo masculino", expuxo. Desde o seu punto de vista, o profesorado "contamos mentiras" ao non ensinar importantes figuras femininas do mundo das ciencias ou a literatura como Juana Inés de Asbaje e Ramírez de Santillana considerada como a Décima Musa mexicana. Ou tamén, a falta de profundidade na vida e obra de mulleres máis coñecidas como María Moliner. "A igualdade significa, desde o meu punto de vista, a liberdade para seleccionar a aprendizaxe, a inclusión de materias como a economía doméstica, ética do coidado, educación dos sentimentos, educación da sexualidade e xénero, cidadanía e emponderamiento ou talleres de cociña, corte e confección", apuntou. A nivel educacional, propuxo a "segregación temporal" por sexos para actividades nas que nenos e nenas teñen un mellor rendemento por separado ou para tratar temas relacións co xénero. Segundo o estudioso, están a ter uns "resultados excelentes" en Islandia ou Alemaña, onde "teñen programas de xénero só para mozos".
Barragán preguntouse se a "coeducación é unha nova falacia do patriarcado" e fixo alusión ao "feminismo radical francés que exclúe aos homes" para terminar afirmando: "Eu non me considero muller, nin home, eu considérome unha persoa". De igual forma, mostrou o seu rexeitamento ao "feminismo anglocéntrico" e apostou pola "inclusión de todas as experiencias" no movemento.
No termo da conferencia destacou o papel das avoas, como ao comezo da mesma: "A importancia das mulleres na vida dos homes (...) Nosas avoa ensinábannos o que era axudar, a protexer, a cultivar un xardín e creo que eses valores os temos que rescatar", afirmou. A parte de Fernando Barragán, que repetirá cunha nova charla o venres, participaron das exposicións no día de onte a profesora Marián Moreno, Rubén Torres e a catedrática Lola Ferreiro.

Ningún comentario:

Publicar un comentario