xoves, 5 de novembro de 2015

Presentada a nova edición (a 15 xa) do Concurso de Proxectos Tecnolóxicos

A sede da Deputación de Ourense acolleu este martes a presentación do 15 Concurso de Proxectos Tecnolóxicos, unha actividade que se vai resolver o vindeiro 10 de decembro na Escola Superior de Informática do campus local e que se dirixe a establecer pontes firmes de interrelación entre a I+D levada a cabo na universidade (ámbito TIC) e o tecido produtivo da contorna, ou sexa, as empresas. O acto de presentación contou coa presenza da directora da Escola Superior de Enxeñaría Informática do Campus de Ourense, Ana Garriga; o director xerente de Expourense, Alejandro Rubín, e o asesor de Cultura da Deputación, Aurelio Gómez. Todos eles salientaron a gran novidade posta en xoga nesta edición: a entrega do Premo Provincia Intelixente que vai entregar por vez primeira a Deputación (a maiores patrocinadora do evento).
O galardón do organismo ourensán, fíxose saber, é unha “categoría especial que ten a súa orixe no apartado Provincia Intelixente do Plan Ourense 15-19, orientado a dar servizos ós cidadáns e ás administracións locais e no que as tecnoloxías da información teñen unha especial incidencia no seu desenvolvemento”. Polo tanto, engadiuse, o obxectivo é amosar e visualizar en detalle os traballos que poidan ser encamiñados a dar solucións abeiradas ao devandito proxecto.
Volvendo ao Concurso de Proxectos Tecnolóxicos, lembrar que se presenta unha vez máis como “unha gran oportunidade para que os estudantes do sector TIC de Galicia e de Portugal dean a coñecer os seus proxectos de fin de carreira, o seu talento e o seu espírito emprendedor”. En última instancia, o que se busca co certame é incentivar e estimular o mercado laboral, amais de expoñer novas oportunidades de emprego lembrando ás empresas as múltiples vantaxes que poden acadar de incluíren nas súas fileiras profesionais galegos e portugueses procedentes das novas tecnoloxías. Tendo en conta isto, darase acubillo no certame a aqueles traballos onde prevaleza “unha clara aplicación das súas ideas ao mundo empresarial e que estean vencelladas coa realidade e necesidades cotiás”.
O acto de entrega dos premios terá lugar na Escola Superior de Enxeñaría Informática da Universidade de Vigo-Campus de Ourense, co-oganizadora do concurso xunto a Expourense, e será o xoves 10 de decembro. As bases da convocatoria para presentar os traballos poden consultarse na páxina web de Expourense. En total repartiranse 1.400 euros en premios. O prazo para a recepción dos traballos remata o 26 de novembro. Pódense presentar os estudantes dos títulos de Enxeñaría en Informática, Enxeñaría de Telecomunicación e traballos de fin de máster de másteres oficiais relacionados co eido das TIC das tres universidades galegas e tamén do Norte de Portugal.

Ningún comentario:

Publicar un comentario