xoves, 19 de novembro de 2015

Como está a afectar o contacto do español á lingua galega?

O simposio anual do ILG estuda o cambio linguístico no galego actual.

O contacto co español, xa secular en Galicia, pero que nos últimos decenios alcanzou un impacto especialmente relevante, é un dos temas que abordará o simposio anual do Instituto da Lingua Galega da USC. Un evento no que tamén se analizarán as fondas mudanzas da sociedade e da cultura que se produciron no último século.
 
O encontro desenvolverase esta semana no Salón de Graos da Facultade de Filoloxía e o 25 no Consello da Cultura Galega, entidade colaboradora. Ao longo destes días analizaránse, entre outras cuestións, a variación entonativa, o cambio inducido por contacto castelanizante en galego, as consecuencias do cambio de lingua dominante por razóns ideolóxicas, a escrita electrónica galega ou a percepción e as actitudes como condicionantes do cambio lingüístico.
 
Persoal investigador de recoñecido prestixio internacional achegará diferentes abordaxes metodolóxicas e  un bo número de investigadoras novas presentarán as liñas de investigación nas que están traballando e que xa están a producir importantes resultados. Deste xeito a organización do simposio quere mostrar a vitalidade que están a alcanzar este tipo de traballos na lingüística galega actual e amosar as posibilidades da aplicación de novos enfoques para comprender mellor como cambiou e como está a mudar hoxe a lingua.

Ningún comentario:

Publicar un comentario