xoves, 5 de novembro de 2015

A Deputación de Pontevedra apoia a creación dun servizo de normalización lingüística común para O Morrazo

A Deputación provincial de Pontevedra respalda a creación dun servizo de normalización lingüística común para os concellos do Morrazo. Con este motivo, o deputado provincial de Cultura e Normalización Lingüística, Xosé Leal, mantivo una reunión de traballo co alcalde de Cangas, Xosé Manuel Pazoscos concelleiros de Normalización Lingüística e de Xuventude da vila, Heitor Mera e Andrés García, coa edil de Normalización de Bueu, Silvia Carballo, e mais co secretario xeral de Política Lingüística, Valentín García, para articular accións de traballo conxunto en materia de normalización do idioma. "A posibilidade de establecer un servizo de normalización conxunto entre os concellos de Cangas e Bueu, ou mesmo a través de todos os concellos da mancomunidade, é unha vía que queremos fomentar desde o ente provincial e que tamén está en sintonía coa liña da Secretaría Xeral de Política Lingüística", afirmou Xosé Leal.
A unión permitiría un aproveitamento máis racional dos recursos, focalizar mellor o labor de asesoramento e soporte por parte de servizos lingüísticos da Deputación e acometer un maior número de actividades por parte das administracións locais.
Na provincia de Pontevedra só unha decena dos 62 concellos teñen este departamento. Para corrixir esta situación, a Deputación creou una liña de axudas para aqueles que aposten por crear ou potenciar este servizo. O organismo creará un web específico para os 62 concellos da provincia. Nel está previsto introducir modelos de documentos administrativos, libros de estilo que inclúan normas gramaticais, léxicas e de redacción e mais un boletín lingüístico no que se recollan desde convencións gráficas e recursos de Internet ata frases feitas.

Ningún comentario:

Publicar un comentario