Máis dun cento de centros de ensino participan na videoconferencia de Xurxo Mariño (Día da Ciencia en Galego)

O 4 de novembro a nosa terra (docentes, investigadores, estudantes, cidadanía en xeral) celebra a sexta edición do Día da Ciencia en Galego. Entre as entidades que impulsan a festividade atópase (coma cada ano) a Coordinadora Galega de ENDL, que para conmemorala vai organizar, entre outras cousas, unha videoconferencia impartida por Xurxo Mariño Alfonso (biólogo e doutor en Ciencias Biolóxicas pola Universidade de Santiago, profesor do Departamento de Medicina da Universidade da Coruña, especialista en neurofisioloxía e activo divulgador científico). O relatorio de Xurxo Mariño desenvólvese baixo o epígrafe A máquina que constrúe a mente e a realidade e será retransmitido vía streaming aos centros de ensino non universitarios que queiran participar na iniciativa (a día de onte 108 centros abranguendo máis de 6.500 alumnas e alumnos, “unha convocatoria récord” segundo lembra a Coordinadora).
O alumnado que participe na iniciativa, recordan os organizadores do evento, poderá interactuar co relator a través da rede social Twitter (etiqueta #cienciaengalego). Segundo engade a Coordinadora Galega de ENDL, o Día da Ciencia en Galego organízase por sexto ano consecutivo para reivindicar o uso vehicular da nosa lingua nas materias científico-técnicas, “onde o seu uso é marxinal tras a imposición do Decreto de Plurilingüismo por parte da Consellería de Educación. Na videoconferencia de hoxe, que dará comezo ás 12.30 horas, tamén participan o Servizo de Normalización Lingüística e a Área de Redes e Comunicacións Multimedia da Universidade da Coruña.
Xurxo Mariño Alfonso, no seu relatorio, fará un percorrido polo concepto de mente, o seu funcionamento e a súa adaptación ao universo da intelixencia artificial (Como funciona a mente? A onde vai o “eu” cando durmimos? Poden construírse máquinas artificiais que teñan mente?). O profesor Mariño Alfonso, sinala a Coordinadora, “mergullará aos estudantes na complexidade do encéfalo humano, a máquina na que miles de millóns de neuronas utilizan a electricidade para se comunicaren e, dese xeito, crear a mente e a realidade”.
O evento recala na UDC e na vertente multiconferencia cos nosos centros de ensino tras pasar en edicións anteriores pola USC e a UVigo. Esta videoconferencia, xunto co cumprido feixe de actividades que se está a desenvolver estes días nos nosos centros de secundaria, nas universidades e en diversas institucións, procura que o alumnado “teña acceso á ciencia sen ningún tipo de prexuízos, nin sobre a ciencia, nin sobre todo en canto ás posibilidades de aprendizaxe da ciencia en calquera idioma, tamén o galego”, engaden os organizadores. Os colectivos convocantes (AGAPEMA, APETEGA, ENCIGA e Igaciencia) e as institucións e entidades que se suman a esta data reinvindicativa, como a CGENDL, queren expresar deste xeito que “todos os idiomas, neste caso o galego, apréndense usándoos en todos os contextos, tamén nos relacionados coa ciencia e a tecnoloxía, a pesar do Decreto para o Plurilingüismo que a Consellería de Educación impuxo para eliminar o seu uso como lingua vehicular de diferentes materias destes ámbitos”.