Tres institutos de Lalín, Silleda e Cruces optan a prácticas profesionais europeas

Participan o IES Laxeiro, Pintor Colmeiro e Marco do Camballón -É un plan da Deputación para alumnado e profesorado de ciclos formativos.

Tres centros educativos das comarcas participarán no programa formativo que pon en marcha a Deputación coa finalidade de impulsar a mobilidade do alumnado e persoal de formación profesional por motivos de aprendizaxe. O proxecto Practicum Depo 2016, a nova convocatoria do programa Erasmus +2016. Mediante esta actuación, a institución provincial solicitará 684.939 euros para que 116 alumnos, maiores de 18 anos, poidan realizar prácticas durante seis meses en sete países da Unión Europea. En Deza e Tabeirós tres institutos solicitaron formar parte desta iniciativa. En concreto trátase do IES Laxeiro, de Lalín, o Pintor Colmeiro, de Silleda, e o Marco do Camballón, de Vila de Cruces, que engrosan a listaxe de 29 centros que tramitou esta solicitude.
A proposta formativa inclúe prácticas laborais en empresas e institucións europeas pertencentes a Italia (30 bolsas), Reino Unido (25), Irlanda (20), Países Baixos (15), Malta (10), Portugal (10) e Finlandia (6). Os participantes deberán regresar das súas mobilidades antes de que transcorresen doce meses desde a data oficial da obtención da súa titulación. Como novidade este ano a Deputación contempla a mobilidade de cinco profesores que realizarán un job shadowing en centros de formación semellantes aos centros integrados de formación profesional de Galicia, coa finalidade de aprender os métodos didácticos que empregan nestes países.
Doutra banda, a administración provincial ratificou en xunta de goberno a concesión da achega de 352.170 euro ao Concello de Lalín para a contratación de 34 persoas dentro do seu plan de emprego. Na mesma convocatoria tamén se inclúe unha subvención de 76.861,27 euros para o Concello de Rodeiro, neste caso para a contratación dunha vintena de traballadores. Estas subvencións enmárcanse en dentro do plan de emprego nunha relación na que se contratarán un total de 196 persoas nun total de nove concellos, entre os que se inclúen os dous dezáns. Nesta listaxe tamén figura Crecente, Marín, Mondariz-Balneario, Pazos de Borbén, O Porriño, Ribadumia e Tui. Esta é a segunda relación de concellos para os cales se aproban as subvencións para a contratación de persoal para o Plan de Conservación e Funcionamento de Bens e Servizos munipacipais dentro do Plan Concellos 2016.