mércores, 17 de febreiro de 2016

O Campus de Lugo formou a 20 investigadores en modelado e impresión en 3D

Até 20 investigadores e técnicos (enxeñeiros industriais, agrónomos, topógrafos e de montes, arquitectos, aparelladores, así como licenciados e titulados en Xeografía e Historia, Ciencias Química e Belas Artes) participaron a pasada fin de semana nun curso sobre modelado e impresión 3D desenvolvido no Campus de Lugo. Os alumnos, procedentes de ámbitos ben diversos (rehabilitación, docencia escolar e universitaria e investigación) desenvolveron as distintas accións formativas e prácticas programadas cun software gratuíto previamente instalado nos seus respectivos computadores portátiles.
Segundo informa a Universidade de Santiago (Campus de Lugo) a temática das primeiras sesións desta actividade formativa estivo centrada no modelado 3D a partir de fotografías, láser escáner ou de software de debuxo en 3D, e cada un dos participantes elaborou o modelo 3D virtual dunha goma de borrar tallada. A edición do modelo virtual elaborado ocupou a a segunda xornada do curso desenvolvido no edificio Cactus do Campus de Lugo.
Na xornada de clausura, as persoas inscritas tiveron a ocasión de imprimir o seu modelo 3D personalizado nunha das impresoras postas á súa disposición polos organizadores da acción formativa. Os participantes puideron levar así tras o traballo realizado: a goma tallada orixinal, o modelo 3D virtual elaborado co seu nome en relevo e a reprodución final impresa.
A primeira edición desta actividade é unha acción formativa promovida polo grupo USCAN3D da USC que contou coa colaboración da empresa tecnolóxica BQ e o Colexio Oficial de Enxeñeiros Industriais de Galicia. Lembrar que o grupo USCAN3D ten sede na Escola Politécnica Superior (EPS) de Lugo e está especializado en modelado 3D, ademais de ser o responsábel da organización do campionato mundial en liña para escolares D3Mobile Metrology World League.

Ningún comentario:

Publicar un comentario