O profesor Julián Villanueva introdúcenos este xoves nos camiños a seguir para dixitalizarmos a nosa empresa

Julián Villanueva, profesor da IESE Business School (Escola de Dirección de Empresas da Universidade de Navarra), analizará este xoves en Santiago as novas tendencias en mercadotecnia dixital e nos camiños a seguir para acadarmos unha transformación óptima e rendíbel cara aos novos escenarios de actividade en liña empresarial. Asemade, Villanueva avaliará na cita compostelá (prevista para o Colexio Maior A Estila a partir das 18.00 horas), a relación entre o gasto en mercadotecnia e o seu efecto a longo prazo. A conferencia, que terá un marcado enfoque práctico, insírese no Programa de Continuidade 2014-2015 da Agrupación de Membros do IESE Business School.
Julián Villanueva é director do Departamento de Dirección Comercial do IESE. Antes de incorporarse ao IESE como profesor, traballou para Promodès (actualmente, Carrefour) como xefe de produto no departamento de marca branca. Foi consultor de grandes compañías, como Telefónica, Grupo Santander, Bankinter, Caprabo, Eroski, Antonio Puig, Mastercard ou Nestlé, entre outras; en temas como estudos de mercado, cadros de mando de mercadotecnia, segmentación de clientes, recomendacións de posicionamento, espallamento internacional e estratexia de mercadotecnia xeral.
A IESE Business School, a Escola de Dirección de Empresas da Universidade de Navarra, é segundo informan seus responsábeis “un dos dez centros máis prestixiosos do mundo deste eido educativo, sendo pioneiro na formación executiva en Europa desde a súa fundación en 1958 en Barcelona”. Posúe campus en Madrid e en Barcelona, un centro en Nova York e oficinas en Múnic e São Paulo. Organiza e dirixe programas en catro continentes. En Galicia, o IESE conta con preto de 500 antigos alumnos, e imparte un Programa de Desenvolvemento Directivo -PDD- anualmente en Santiago de Compostela.