AGAL promove unha campaña contra a “discriminaçom” que sofren os reintegracionistas

O detonante desta campaña foi a denuncia do escritor Vítor Vaqueiro tras ser descualificado un certame literario por utilizar esta variante idiomática.

“Galego en liberdade”. Ese é o nome da nova campaña que promove a Associaçom Galega da Lingua (AGAL) para combater a “discriminaçom” que sofren as persoas reintegracionistas no uso desta normativa do galego. De feito, o detonante da campaña foi a denuncia pública do escritor Vítor Vaqueiro, descualificado nun certame literario por causa da súa escolla normativa, ao considerar o galego algo inseparável do portugués.

“Por desgraça, nom estamos diante de um único caso”, sinala o presidente da AGAL, Miguel R. Penas, Esta asociación, con máis de trinta anos de traballo, asegura que se trata de «umha práctica demasiado habitual» e reproban que na Galicia do século XXI continúe a haber certames que discrimine a participación de reintegracionistas só «por puros motivos ideológicos».

Até o momento, máis dun centenar de persoas apoian publicamente esta campaña que ten coma obxectivo “impedir este tipo de exclussons”. Entre os primeiros asinantes destacan escritores como Teresa Moure, Séchu Sende e Carlos Quiroga; o dramaturgo Carlos Santiago; docentes das tres universidades galegas, como Carlos Valcárcel (UVigo), Cilha Lourenço e David Peón (UdC) ou Bernardo Valdês (USC) e dirixentes políticos como Néstor Rego e Adrián Dios (BNG) ou Rubén Pérez (EU).

Este é o manifesto.

«Galego em liberdade»

Recentemente, tivemos conhecimento de que Vítor Vaqueiro, reconhecido escritor galego, nom puido concorrer em igualdade de condiçons a um prémio literário, convocado na Galiza, por causa da sua escolha normativa.

Por desgraça, isto nom é um caso isolado e existem mais episódios e tentativas discriminatórias, umha prática demasiado habitual, ainda, na Galiza do século XXI. É inacreditável que indicando as bases dos concursos que os textos devem ser entregues “em língua galega” muitas e muitos dos participantes sejam afastados da possibilidade de obter o prémio, por motivos ideológicos.

As/os abaixo-assinantes consideramos que as diferentes opçons gráficas que as pessoas tenhem para representar o seu galego nom podem ser um pretexto para que elas sejam excluídas de qualquer acontecimento cultural, e muito menos um destas características. E comprometemo-nos a impedir que este tipo de exclusons voltem a acontecer na medida das nossas possibilidades e nos ámbitos em que temos voz.