Docentes de Galicia poderán concursar fóra, pero non ao revés

A decisión prexudica a aqueles docentes galegos que superaron a oposición noutra comunidade autónoma e aspiraban a volver a Galicia a través dun concurso estatal.

O concurso de traslados de profesores que se levou a cabo este ano está pendente de que o Tribunal Superior de Xustiza de Galicia resolva varios recursos, polo que a Consellería de Educación decidiu non convocar prazas no proceso estatal que se inicia agora e se desenvolverá no 2015. Pero si elaborou unha orde -da que xa hai borrador- para que o profesorado que ten praza fixa en Galicia poida participar nos concursos do resto de comunidades autónomas, é dicir, que os profesores de Galicia poderán trasladarse a outras, pero non ao revés. Esta decisión, que a Xunta anunciou hai semanas, prexudica basicamente a aqueles docentes galegos que superaron a oposición noutra comunidade autónoma e aspiraban a volver a Galicia a través dun concurso estatal.

Todos os sindicatos se mostraron en contra desta medida, e o último en facelo foi UGT, que asegura que a Xunta volve non axustarse á normativa estatal, o que pode levar a unha nova xudicialización «por parte do profesorado que ve restrinxido ou seu dereito á mobilidade», sosteñen.

Dende a Consellería de Educación aseguran que as prazas que queden vacantes porque o profesorado participa no concurso estatal de traslados non pasarán a formar parte das que se convoquen na oposición anunciada para o 2015, xa que non son oficialmente vacantes ata o próximo mes de setembro.

Á espera de tres sentenzas

O concurso anterior de traslados, de ámbito autonómico, xerou polémica por baremar por primeira vez os anos traballados en situación de interinidade. Ata tal punto que se presentaron recursos xudiciais que deron a razón en tres sentenzas aos recorrentes. Nestes momentos presentáronse recursos de apelación nos tres casos no Tribunal Superior, polo que Educación decidiu non convocar prazas no concurso estatal á espera da resolución xudicial. Durante este curso 2014-2015 os profesores que participaron no proceso tomaron posesión dos novos destinos de forma provisional, malia que sobre o baremo pesan tres fallos xudiciais que o anulan parcialmente.