CulturaLab, o laboratorio de transmisión de coñecementos e ideas da USC

Este proxecto prevé acudir ao ‘crowfunding’ para financiar a súa posta en marcha e servirá como complemento á formación do Máster en Servizos Culturais da USC.

CulturaLab. Ese o nome do dun laboratorio de transmisión de coñecementos e ideas que a USC acaba de poñer en marcha para desenvolver proxectos culturais.

 

O seu obxectivo é conectar os seus titulados coa industria cultural. Responde a un formato de transmisión de coñecemento diferente ao dos programas tradicionais, co obxectivo de poder seguir sendo unha referencia na xeración de coñecemento.

 

Ademais, esta ferramenta permitirá ao estudantado do Máster en Servizos Culturais completar a súa formación teórica con sesións de marcada orientación práctica encamiñadas a artellar e desenvolver proxectos culturais. “CulturaLab bota a andar coa pretensión de converterse no lugar no que desenvolver outras formas de transmisión de saberes, así como converterse nunha ferramenta para abrir a Universidade á sociedade”, indicou o coordinador do proxecto, Fran Quiroga. 

 

Para acadar este obxectivo, os promotores desta nova proposta formativa contemplan o desenvolvemento de distintas sesións prácticas, así como de relatorios sobre temática diversa que serán impartidos por persoas que investiguen noutros lugares alleos á comunidade universitaria, tales como poden ser persoas involucradas en movementos sociais, feministas... 

 

Por iso, o CulturaLab do Máster de Servizos Culturais da USC configúrase como un ecosistema de aprendizaxe continua, usando a metodoloxía coñecida como learning by doing. “É dicir aprender facendo, e por iso pretende que os alumnos/as do máster materialicen o proxecto cultural que desenvolvan no propio CulturaLab”, sinala. 

 

Para a obtención de financiamento preciso para a posta en marcha do proxecto mellor cualificado por un comité técnico, os seus promotores poderán recorrer ao ‘crowdfunding’, a través de plataformas de mecenado. A campaña de microfinanciamento colectivo, cuxo límite está fixado en 15.000 euros, durará 40 días durante nos meses de setembro e outubro de 2015, para logo realizar o proxecto no mes de novembro. 

 

Este proxecto conta cunha achega de 1.000 euiros da Área de Cultura e Turismo da Deputación Provincial de Lugo. O seu responsable, Mario Outeiro, tamén participou na presentación do CulturaLab.