xoves, 17 de marzo de 2016

O catálogo colectivo da Rede de Bibliotecas Públicas de Galicia xa conta con carné único

Na mañá de hoxe a directora da AMTEGA, Mar Pereira, e o secretario xeral de Cultura, Anxo Lorenzo, daban conta de que a Rede de Bibliotecas Públicas de Galicia conta xa cun carné único proposto pola Xunta de Galicia. Esta achega será posíbel grazas á introdución dun sistema integrado de xestión bibliotecaria de catálogo único, promovido pola Axencia para a Modernización Tecnolóxica de Galicia (AMTEGA) e pola Consellería de Cultura e Educación. Deste xeito, os usuarios e usuarias contarán por vez primeira cun carné único, co que poderán acceder aos servizos de todas as bibliotecas galegas inseridas neste programa e a un catálogo colectivo con todos os seus fondos dispoñíbeis para a súa consulta en liña.
Por outra banda, o traballo técnico dos profesionais das bibliotecas tamén se axilizará ao contar cun único sistema para a xestión de todas as coleccións (físicas ou dixitais) que automatiza os procesos de catalogación, reservas, inventariado ou empréstamos interbibliotecarios.
O carné único é xa unha realidade para os usuarios e usuarias das 25 bibliotecas públicas e axencias de lectura nas que está en funcionamento o novo sistema: as bibliotecas públicas de xestión autonómica de Lugo, de Ourense, da Coruña Miguel González Garcés, de Pontevedra Antonio Odriozola, de Vigo Juan Compañel e de Santiago de Compostela Ánxel Casal; e as bibliotecas públicas municipais de: Ferrol, Vigo, Oleiros, Laxe, Sanxenxo e máis Ortigueira.
A que se poderá acceder mediante ese carné único? Pois alén de achegar os máis de 900.000 títulos e preto de dous millóns de documentos destas 25 bibliotecas, o catálogo colectivo da Rede de Bibliotecas Públicas de Galicia, contará: cos fondos da Biblioteca de Galicia, das bibliotecas de institucións de especial interese para Galicia como a da Real Academia Galega, a do Consello da Cultura Galega, a da Fundación Manuel María, a da Fundación Vicente Risco e a do Centro Galego de Artes da Imaxe, xunto coas bibliotecas dos museos e dos arquivos xestionados pola Consellería de Cultura e Educación.
“Nesta primeira fase estamos a falar, en conxunto, dun total de 43 bibliotecas integradas neste novo sistema –explicou Anxo Lorenzo– e o obxectivo da vindeira fase do proxecto é integrar de maneira progresiva ás máis de 300 restantes bibliotecas e axencias de lectura que forman parte da Rede de Bibliotecas Públicas de Galicia e que na actualidade contan con diferentes programas de xestión bibliotecaria”.
Nunha terceira fase tamén está prevista a introdución nas bibliotecas escolares deste novo programa baseado na tecnoloxía liberada e en formato aberto a través do software Koha.
As novas actuacións no eido tecnolóxico levadas a cabo polo Goberno galego para a mellora dos servizos bibliotecarios tamén inclúen a renovación dos portais web da Rede de Bibliotecas Públicas de Galicia, da Biblioteca de Galicia e das bibliotecas centrais territoriais de xestión autonómica de: A Coruña, Santiago de Compostela, Vigo, Lugo, Ourense e Pontevedra. A directora da AMTEGA lembrou que “estes novos portais nacen xa co apelido .gal”.

Ningún comentario:

Publicar un comentario