O Campus de Pontevedra prepara a nosa vindeira xeración de programadores de videoxogos

A Facultade de Ciencias Sociais e da Comunicación da Universidade de Vigo (Campus de Pontevedra) está a acoller estes días unha actividade formativa que amosa metodoloxías e recursos de primeira man para converternos en creadores de aventuras gráficas a contrafío das majors e botando man plenamente dos ingredientes fundamentais: innovación, afouteza, maxín, etc. O curso Programación de videoxogos indies é unha iniciativa inserida na programación de primavera da Vicerreitoría do Campus. Arestora ao seu abeiro estanse a desenvolver, por grupos, tres aventuras gráficas: unha inspirada na Guerra Civil, unha proposta dirixida a amosar aos nenos e nenas os efectos do Alzheimer e un xogo de plataformas inspirado no cinema. O curso, de 30 horas e dirixido pola profesora Beatriz Legerén, ten como obxectivo introducir ao alumnado nas principais ferramentas para dar forma a un videoxogo.
A actividade clausurarase este venres coa presentación dun primeiro bosquexo das ideas nas que os 14 asistentes a esta actividade viñeron traballando desde finais de febreiro.
A ilustradora Iria Carballo e o programador e deseñador Adrián Santasmarinas, os dous formados na mesma Facultade, son os responsábeis xunto con Legerén de impartir o obradoiro. Este salienta por dous motivos principais: pola súa vontade de dar azos á nosa mocidade para que se afiance nun terreo (o dos produtos de lecer dixital) que para nós os galegos achega moito potencial (e no que podemos achegar unha chea de coñecemento e ideas novas), e tamén polo seu carácter “fundamentalmente práctico”. De feito, diríxese a acadar que os participantes teñan todos os recursos precisos ao seu alcance para facer un xogo, “dende a definición da idea inicial e o deseño de personaxes e contornas e ao posterior traballo de programación”.
De feito, o curso xa permitiu aos asistentes iniciarse no manexo da ferramenta para a creación de xogos en dúas dimensións Game Maker, “que foi creada por un grupo de investigadores da Universidade de Dundee, en Escocia”, como explica Legerén.
Ademais de introducir ao alumnado nas características do Game Maker, este curso buscou tamén fornecer ao alumnado coas diferentes fases dun traballo que, como explica Legerén, comeza diante do papel. “O primeiro de todo é definir que é o que queres facer e cando xa o tes todo é o intre de pórse a debuxar e programar”, salienta a directora dun curso no que os estudantes foron avanzando, por equipos, no desenvolvemento das súas ideas. Na tarde deste venres, na última sesión desta actividade, chegará o momento de que amosen “un primeiro nivel ou unha pequena demo” dos seus proxectos.