luns, 14 de marzo de 2016

O potencial social e educativo da gamificación, polo miúdo este sábado en Pontevedra

Este 12 de marzo, sábado, hai en Pontevedra unha cita con todas aquelas metodoloxías destinadas a aplicar a nosa interacción cos videoxogos aos procesos da vida real: procesos empresariais de todo tipo, procesos formativos e de divulgación, de xestión, de desenvolvemento, de inclusión, etc. Dito doutra maneira: temos unha cita cos xogos que saen de si mesmos para achegar coñecemento e habilidades, e tamén para ensinarnos a ensinar. A cita con estas metodoloxías, agrupadas baixo o concepto gamificación, vén impulsada pola Concellaría de Promoción de Pontevedra, e conta coa colaboración das universidades galegas de Vigo e A Coruña. A xornada Gamification Jan Galicia celébrase na Casa da Luz. Os organizadores son Raquel Pedrouso e Aitor Barbosa, que lembraron na presentación do encontro que “a gamificación é a incorporación de elementos e dinámicas do xogo a eidos serios, que vai encamiñado á modificación da conduta no ámbito educativo, laboral e da saúde”.
Segundo engadiron, a xornada será unha experiencia de ensino convocada cun obxectivo duplo: por unha banda xerar unha comunidade activa de gamificadores en Galicia e, por outra banda, achegar estas metodoloxías aos/as docentes como ferramenta de innovación educativa, “de tal xeito que logo da xornada do sábado xa poidan aplicar elementos da gamificación nas súas aulas o luns”, engadiron. Segundo explicaron, a cita do sábado basease en 3 momentos principais:
· De 10:00 a 14:00 horas. Experiencia gamificada de aprendizaxe na que os participantes terán que descubrir quen é o asasino ao transformárense en axentes do FBI.
· De 16:00 a 19:00 horas. Obradoiros creativos nos que se porá en práctica o aprendido na sesión da mañá e idearanse novas experiencias axeitadas as necesidades dos asistentes.
· De 19:00 a 20:00 horas. Pechakucha: Exposicións de investigacións e ferramentas gamificadas para a aula. Participarán: Beatriz Legerén (docente e investigadora da Universidade de Vigo), Luz Castro (Imaxin Software), Antonio Seoane (docente e investigador da UDC) e Bruno Verín (representante e co-fundador do proxecto Educativo Semente de escolas en galego).

Ningún comentario:

Publicar un comentario