mércores, 30 de marzo de 2016

Betabeers Galicia afondará na programación de proxectos emprendedores

O vindeiro 7 de abril ás 20:00 horas as instalacións de WeKCo na Avda. Novo Mesoiro da Coruña volve acoller unha nova edición de Betabeers Galicia, encontro para desenvolvedores web e móbiles que combina charlas técnicas, presentacións de proxectos e networking.
Nesta ocasión a charla técnica que centra a xornada será impartida por David Pombar, un dos fundadores de SetPay, e impulsor de varias iniciativas para favorecer o emprendemento (como Startup Galicia), que baixo o provocador título É doado saber programar, o fodido é saber o que, pretende afondar nos inicios das programación de proxectos, na exploración nas necesidades dos usuarios, na importancia da eficiencia como métrica para a calidade da programación e no concepto de Mínimo Produto Viable.
Tras a intervención de Pombar Rodrigo Lago presentará Ubiplay Mobile, compañía de desenvolvemento de software que desenvolveu un motor de aventuras, Ubiplay Engine, para crear aplicacións para Android e iOS a través dun editor gráfico.
A xornada pechará cunha intervención de María del Carmen López Gómez, directora de Galicia Open Future, que presentará a terceira convocatoria para a aceleración de proxectos galegos, aberta até o vindeiro 15 de abril.

Ningún comentario:

Publicar un comentario