venres, 23 de outubro de 2015

SIVSA viaxou a Bruxelas para impulsar a súa aposta en I+D con fondos europeos

A empresa galega SIVSA, responsábel entre outros desenvolvementos do software de xestión de clínicas Fenix, estivo o pasado mes de setembro en Bruxelas participando nunha visita institucional e empresarial organizada pola asociación Ineo. A experiencia, compartida con outras empresas do sector galego das novas tecnoloxías, serviu para que coñeceran de primeira man as perspectivas de acceso a fondos de cooperación europea para firmas do eido tecnolóxico no marco do programa Horizonte 2020. A visita institucional centrouse sobre todo en achegar luz sobre as estratexias LEIT (Leadership in Enabling and Industrial Technologies), e nesta materia foron asesorados por Gustaf Winroth (responsábel das convocatorias de I+D relacionadas coas TIC no Horizonte 2020) e por Enrique Aresti, da Dirección Xeral de Mercado Interior, Industria, Emprendemento e PEME.
Segundo informa SIVSA, a empresa tivo ocasión de afondar nos servizos que a Comisión Europea proporciona ás pequenas e medianas empresas dentro do programa COSME para o acceso a mercados exteriores. Este achegamento ao programa COSME materializouse sobre todo nun encontro coas representantes da Axencia Executiva para PEME (EASME), Idaira Robayna e Rebeca de Sancho. Por outra banda, na sede do REPER, a Representación Permanente de España ante a UE, SIVSA coñeceu máis de preto o funcionamento de Europa como subministradora de fondos en Proxectos de Cooperación.
Tanto SIVSA como o resto de empresas que viaxaron xunto a Ineo, aproveitaron a súa estadía en Bruxelas para xantar coa directora da oficina na cidade belga da Fundación Galicia Europa, Ana Ramos Barbosa, e cos eurodeputados galegos Francisco Millán Mon (PP) e José Blanco (PSOE), “co obxectivo de poder achegar a visión sectorial dos traballos que ambos realizan na Eurocámara”.

Ningún comentario:

Publicar un comentario