martes, 20 de outubro de 2015

A xira Rapaciñ@s chega este martes a Vigo

A xira Rapaciñ@s, dirixida a amosar perante os escolares axeitadas maneiras de usar as novas tecnoloxías (a través de charlas e obradoiros), chega este 20 de outubro a Vigo logo da primeira actividade celebrada na Cidade da Cultura de Santiago. A cita é no Edificio Municipal da Rúa Oporto (antigo Reitorado da Universidade de Vigo) e vén da man, como todo o itinerario previsto pola nosa xeografía, do Colexio Profesional de Enxeñaría en Informática de Galicia (CPEIG) e a Axencia para a Modernización Tecnolóxica de Galicia (AMTEGA). O horario do evento (que é de balde) vai de 19.30 a 21.30 horas.
A xornada vai dirixida a nais, pais e docentes, que terán unha oportunidade para dar conta, de primeira man, das vantaxes das novas tecnoloxías e como previr os riscos que tamén presentan. O programa de mañá abrangue unha charla cun colexiado do CPEIG e obradoiros lúdico-didácticos para as nenas e nenos centrados nas maneiras de acadaren unha navegación o máis enriquecedora e segura posíbel.
Rapaciñ@s, como lembraremos, é un programa que consta dunha serie de relatorios informativos que percorre Galicia da man das colexiadas e colexiados do CPEIG. Por unha banda, familias e tamén docentes atopan información e recursos de interese; por outra, nenas e nenos adquiren hábitos seguros para navegar na Rede e desenvolven a súa creatividade tecnolóxica a través de obradoiros pensados para que se divirtan e aprendan.
Para asistir ás conferencias e obradoiros non é necesaria inscrición previa e as prazas cubriranse por orde de chegada (“cómpre que as nenas e nenos leven unha tableta ou un smartphone para participar nos obradoiros”, sinalan dende a organización).

Ningún comentario:

Publicar un comentario