luns, 25 de abril de 2016

O CPEIG formou a máis dun milleiro de profesores en protección de datos

O Colexio Profesional de Enxeñaría en Informática de Galicia (CPEIG) vén de pechar a segunda edición do seu Programa de formación a docentes, unha iniciativa dirixida a profesoras e profesores, e que levou aos centros educativos información sobre a relación entre protección da información e docencia. Segundo informa o colexio que preside Fernando Suárez, de sumar as cifras de participación da convocatoria acabada de pechar cos números da primeira edición, teriamos máis de mil docentes formados ao abeiro do Programa. “Unha cifra que fala do éxito da iniciativa”, sinala a entidade profesional, que engade que aquela foi desenvolvida en virtude do convenio asinado coa axencia AMTEGA, un acordo encamiñado a acadar a incorporación de toda a sociedade galega ás vantaxes das TIC.
A formación dirixida aos docentes referiuse á protección de datos de carácter persoal e capacitación para a introdución da programación no currículo educativo. O material que se utilizou nestas xornadas formativas e os relatores das mesmas foron achegados polo CPEIG. Como documento principal, cómpre destacar o uso da Guía LOPD (Guía da Lei Orgánica da Protección de Datos). Entre as temáticas formativas incluíuse: servizo de revisión e actualización continua da Guía LOPD, a raíz das novas consultas, normativa e casuística expostas; cursos formativos de protección de datos e cursos formativos en materia de programación.

Ningún comentario:

Publicar un comentario