A UVigo acolleu un Wikimararón para crear novos contidos nunha enciclopedia que xa suma 129.500 entradas.
Dende a súa creación en 2003 a Galipedia foi crecendo
exponencialmente e na actualidade conta con 129.500 artigos. Deste
xeito, a
Wikipedia en galego vaise nutrindo de contidos
grazas tanto aos usuarios rexistrados como a persoas anónimas de
publican novos artigos ou editan e completan os existentes. Para
continuar ampliando as fondos de información da enciclopedia virtual
estanse a celebrar wikimaratóns pola xeografía galega, un deles este
martes na
Facultade de Filoloxía e Tradución,
organizado pola comisión de Normalización Lingüística do propio centro. O
obxectivo deste tipo de actividades é visibilizar esta ferramenta e
achegala aos potenciais usuarios, para que coñezan o seu funcionamento e
se poidan converter en editores de contidos. A xornada por presentada
pola vicedecana
Susana Rodríguez Barcia, que puxo en valor este tipo de recursos léxico-lingüístico que axudan “á normalización da lingua galega”.
A xornada comezou cunha introdución á Galipedia da man dun dos seus colaboradores,
Miguel Anxo Solla,
que amosou aos asistentes o funcionamento da ferramenta para poder
publicar novos artigos ou editar os xa existentes e lles ofreceu as
claves para redactar un bo contido. Xunto con
Adrián Estévez,
administrador da Galipedia, animou aos presentes a escribir sen medo,
“con afouteza, porque sempre hai tempo de reverter os contidos” que,
segundo lembraron, están sometidos a unha
revisión en tempo real,
evitando a publicación de información incorrecta ou non contrastada.
Segundo Solla, un bo artigo é aquel que “cubre un oco existentes no
relativo ao contido, ten un bo título, non se limita a unha entrada de
dicionario, é comprensible, fácil de atopar e atractivo, diversifícase,
desenvolve todos os aspectos dun mesmo tema, é neutral e imparcial, coa
extensión apropiada para o tipo de información, é preciso e explícito,
está categorizado e é verificable, incluíndo referencias, imaxes e
ligazóns interlingüísticas”. Explicou tamén que a propia
Galipedia
ten un asistente de creación de artigos e un libro de estilo, así como
unha guía para os que se queren estrear, tanto cun artigo de seu, como
editando un xa existente. Tamén lembrou algunhas liñas vermellas que non
se deben cruzar, como a publicación de artigos de
autopromoción,
xa sexa de persoas como de grupos, asociacións ou traballos ou o uso de
contidos con dereitos de autor e recomendou especial coidado no
tratamento de materias polémicos, “para o que debe primar un punto de
vista neutral”. Os
mellores artigos son recoñecidos
cunha estrela amarela que aparece na páxina e na actualidade, a
Galipedia conta con 63 entradas con esta distinción.
Galipedia ten 14 administradores e máis de 1.000 usuarios rexistrados
129.500 artigos e 14 administradores. Semella un labor inabarcable, pero
Adrián Estévez
é un deles e recoñece que se pode facer de xeito sinxelo. A publicación
de artigos pódese facer de xeito anónimo ou como usuario rexistrado,
sendo estes últimos os que levan preto do 90% do peso da actividade. De
feito, arredor dun
35% dos artigos foron creados polos
dez editores máis activos. A estes usuario rexistrados “presupónselle
boa vontade e as súas edicións a penas precisan revisión”. Para o outro
10% de contidos están, non só os 14 administradores, senón que calquera
usuario pode revisar os últimos contidos actualizados e comunicar
posibles
incorreccións ou imprecisións nos mesmos. Con
todo, os administradores tamén se deben enfrontar a outro tipo de
usuarios e “reverter os vandalismos para evitar os troleos”, que como
explica
Estévez van dende “loar con maldade unha
determinada parroquia ou o equipo de fútbol, ata insultos a políticas/os
ou descualificacións a cantantes”.
Na actualidade a Galipedia conta con
1000 usuarios rexistrados,
do cales 25 editan contidos todos os días e outros 100 o fan dun xeito
habitual. Sobre os contidos máis consultados, Estévez explica que
adoitan ser xenéricos, por exemplo termos como
Vigo e
Coruña,
lingua galega ou Galicia. A calidade dos contidos dun determinado tema
tamén condicionan o número de visitas e, ao mesmo tempo, axudan a
mellorar aínda máis a información. “Se non atopamos información de
calidade, moitas veces recorremos á
Wikipedia do
español ou do inglés, pero se atopamos esa información en galego, non só
a consultamos habitualmente, senón que contribuímos a mellorala, é un
proceso de retroalimentación”. Outro aspecto que salientou foi a escasa
presenza feminina en todas as wikipedias. En inglés, por exemplo, o 85%
dos contidos teñen selo masculino e “
en galego a
porcentaxe é algo superior”, segundo sinala. A pesar de que se teñen
realizado estudos tratando de buscar os motivos, non se chegou a unha
conclusión clarificadora, polo que Estévez recomenda formación a través
de actividades como os wikimaratóns para que o alumando, que é nativo
dixital, se achegue á
Galipedia dende a paridade.
Ningún comentario:
Publicar un comentario