xoves, 14 de abril de 2016

A Galipedia xuntou apoios na Universidade de Vigo

A Galipedia, a Wikipedia galega que arestora conta xa con 129.500 artigos, vén de celebrar un wikimaratón na Facultade de Filoloxía e Tradución (UVigo). O obxectivo da cita (que forma parte dun itinerario de actividades por toda a xeografía galega) foi ampliar fondos e equipo de colaboración. A sesión veu da man da comisión de Normalización Lingüística do propio centro. Segundo nos conta nun senso máis amplo, a finalidade deste tipo de xuntanzas é visualizar a nosa enciclopedia virtual perante a comunidade internauta, amosando o seu funcionamento e facendo o posíbel para favorecer a chegada de novos editores de contidos. A xornada foi presentada pola vicedecana Susana Rodríguez Barcia e colleu corpo cunha introdución á Galipedia da man dun dos seus colaboradores, Miguel Anxo Solla.
Solla expuxo perante os asistentes o funcionamento da ferramenta para poder publicar novos artigos ou editar os xa existentes. Xunto con Adrián Estévez, administrador da Galipedia, convidou aos asistentes a escribir “sen medo”, “con afouteza”, porque sempre hai tempo “de reverter os contidos” que, segundo lembraron, “están sometidos a unha revisión en tempo real, evitando a publicación de información incorrecta ou non contrastada”.
Entre outras cousas, fixeron saber que a propia Galipedia ten un asistente de creación de artigos e un libro de estilo, así como unha guía para os que se queren estrear, tanto cun artigo de seu, como editando un xa existente. Tamén lembraron “algunhas liñas vermellas que non se deben cruzar”, como a publicación de artigos de autopromoción, xa sexa de persoas como de grupos, asociacións ou traballos ou o uso de contidos con dereitos de autor e recomendaron “especial coidado no tratamento de materias polémicos”, para o que debe prevalecer un punto de vista neutro. Os mellores artigos, sinalaron, son recoñecidos cunha estrela amarela que aparece na páxina e na actualidade, a Galipedia conta con 63 entradas con esta distinción.
Ademais, nun plano máis xenérico, informaron que a Galipedia atesoura a día de hoxe 129.500 artigos e 14 administradores, ao tempo que lle quitaron ferro a todo este labor colectivo, salientando que é moito máis doado e sinxelo do que pode parecer nun primeiro intre. Segundo fixeron saber, a achega de entradas pódese “facer de xeito anónimo ou como usuario rexistrado”, sendo estes últimos os que levan preto do 90% do peso da actividade. De feito, “arredor dun 35% dos artigos foron creados polos dez editores máis activos”, informaron, engadindo que a estes usuarios rexistrados “presupónselles boa vontade e as súas edicións a penas precisan revisión”.
Na actualidade a Galipedia conta con 1000 usuarios rexistrados, dos cales 25 editan contidos todos os días e outros 100 fano de maneira cotiá. Sobre os contidos máis consultados, Estévez explicou que adoitan ser xenéricos, por exemplo termos como “Vigo” e “Coruña”, “lingua galega” ou “Galicia”. A calidade dos contidos dun determinado tema tamén condiciona o número de visitas, engadiu, destacando que isto axuda tamén a mellorar a información fornecida. “Se non atopamos información de calidade, moitas veces recorremos á Wikipedia do español ou do inglés, pero se atopamos esa información en galego, non só consultámola decote, senón que contribuímos a mellorala, é un proceso de retroalimentación”. Outro aspecto que puxeron sobre a mesma foi “a escasa presenza feminina en todas as wikipedias”. En inglés, por exemplo, o 85% dos contidos teñen selo masculino e “en galego a porcentaxe é algo superior”, segundo sinalaron.

Ningún comentario:

Publicar un comentario