Tegnix lanza Control Suprimir para ceibar ás empresas e aos centros docentes de tarefas de mantemento TIC cada vez máis complexas

Como dixemos os días pasados en Código Cero, a firma Tegnix vén de impulsar un ambicioso proxecto de administración de sistemas baseado en GNU/Linux e encamiñado a centros educativos e PEME, o proxecto Control Suprimir, xa operativo e habilitado en galego e máis en castelán. Control Suprimir é un feixe de ferramentas que abrangue todo o que poidamos requirir en materia de mantemento para os ámbitos empresarial e docente. Cousas como o intercambio de ficheiros con permisos individuais ou por grupos, a xestión, as copias de seguridade automatizadas ou unha navegación por Internet máis rápida. Segundo nos conta Carlos Rodríguez, director executivo de Tegnix, Control Suprimir constitúe a prolongación do proxecto Abalar, “a través do que 75.000 equipos dos nosos centros educativos xa levan o sistema automatizado que deseñamos para a Consellería de Educación da Xunta de Galicia”.
Polo tanto, Control Suprimir é o servizo aplicado a centros educativos e empresas que precisen de mantemento integral de sistemas con GNU/Linux.
Na opinión de Tegnix, tanto uns (centros de ensino) coma outras (firmas do noso tecido produtivo) precisan a día de hoxe, máis que nunca, de servizos como Control Suprimir. Por que motivo? “Pois”, conta Carlos Rodríguez, “porque as novas tecnoloxías estanse empregando cada vez máis no ámbito docente e nas empresas, polo que a carga de horas do persoal de mantemento vai en aumento e faise preciso externalizar este servizo nunha empresa especializada como Tegnix”.
A principal particularidade do novo servizo da empresa que dirixe Carlos Rodríguez baséase na bagaxe e experiencia previamente xeradas. É dicir, Control Suprimir non sae da nada, e de feito estamos a falar dun servizo xa implantando nos 75.000 equipos de Abalar “cun resultado excelente”. Agora chega a un novo estado de evolución ofrecéndose ás entidades públicas ou privadas que o precisen.
Como dixemos, está baseado en software libre e código aberto. Isto, engade a empresa, empraza ao cliente nunha situación de “total liberdade” de escoller o mellor fornecedor, “malia que a oferta que achega Tegnix é a que mellor relación calidade/prezo amosa para o mantemento dos nosos equipos informáticos”, explican os responsábeis da firma, que salientan como unha das vantaxes principais do servizo a liberación de tempo do persoal TIC do propio centro adicado “ás complexas tarefas de mantemento onde a infraestrutura pode chegar a máis de 100 computadores”. Ademais, grazas a Control Suprimir pódese integrar o servizo co sistema de Xestión Administrativa (Xade) co que cada persoal do profesorado e mesmo do alumnado do centro ten a súa conta individual e independente do equipo onde traballe. Ademais, inclúese o servizo de “proxy caché”, co que a velocidade de navegación por Internet mellora substancialmente.
Polo que respecta ás empresas, diríxese a cubrir unha demanda específica das mesmas: a demanda de soporte técnico especializado en software libre e código aberto. Polo tanto, Control Suprimir ofrécelles, en palabras de Tegnix, “a solución axeitada para o mantemento da súa infraestrutura e despregue de servizos como compartir ficheiros, xestión de contas e permisos centralizados, proxy, redes privadas virtuais (VPN), teletraballo, etc...”.
Por certo que a web de Control Suprimir está xa plenamente operativa, www.controlsuprimir.com, ao igual que o teléfono da empresa onde recadarmos información, 986 12 40 40, e a conta de correo info@controlsuprimir.com.