Galicia perdeu un 60% de empresas tecnoloxicamente innovadoras nos anos de crise

O país pasou de 2.502 empresas que aplicaron innovacións tecnolóxicas en 2007 a só 997 en 2014. Galicia sitúase como novena comunidade en emprendemento empresarial tecnolóxico.

Galicia contaba no ano 2005 con 2.189 empresas tecnoloxicamente innovadoras. Dous anos despois, en 2007, acadou o seu cénit con 2.502. E chegou a crise económica e, con ela, unha desfeita no sector empresarial, no que a innovación tecnolóxica minguou progresivamente até chegar a mínimos en 2014, con tan só 997 empresas tecnoloxicamente innovadoras, segundo os últimos datos que se poden consultar no Instituto Galego de Estatística (IGE). É dicir, dende o comezo da crise, o país perdeu o 60,1 por cento da súa capacidade innovadora no sector tecnolóxico.

Esta perda de competitividade nos anos de crise foi practicamente a mesma que a media española, que se situou no 60,5 por cento, pasando de 46.877 empresas tecnoloxicamente innovadoras en 2007, a 18.511 no ano 2014.
Destes datos dedúcese unha clara e alarmante perda de competitividade tanto da economía galega como da española, pois a innovación tecnolóxica é unha variable determinante para a a capacidade competitiva dun país.

Empresas tecnoloxicamente innovadoras
Ano	España	Galicia
2005	47.529	2.189
2006	49.415	2.208
2007	46.877	2.502
2008	42.206	2.152
2009	39.043	2.082
2010	32.041	1.947
2011	27.203	1.643
2012	20.815	1.267
2013	19.370	1.136
2014	18.511	997
Fonte: IGE

Segundo datos do Instituto Nacional de Estadística (INE), as comunidades autónomas que presentaron maiores porcentaxes de empresas con innovacións tecnolóxcas durante o período 2012-2014 foron La Rioja (un 20,7 por cento das súas empresas introduciron innovacións tecnolóxicas neste período), Euskadi (18,9 por cento) e a Comunidad Foral de Navarra (18,0 por cento). Galicia sitúase nun discreto noveno posto, co 13,4 por cento das empresas que innovaron tecnoloxicamente.