martes, 9 de agosto de 2016

Lalín acollerá unha embaixada de blogueiros para amosarlles as súas posibilidades turísticas

Os nosos concellos están amosando ao mundo blogueiro os seus potenciais turísticos. E fano por varios motivos (hábitos turísticos cada vez máis enraizados na Rede, necesidade de abrir novos vieiros para a nosa autopromoción), pero en boa medida porque unha parte importante da actividade viaxeira, hostaleira e gastronómica estatal ten o seu punto de partida nos cadernos persoais de “viaxeiros-blogueiros” referenciais. Se hai uns días falamos das xeiras de acollida de influencers do Concello de Ferrol, ou dos encontros celebrados en Camariñas, agora é a quenda de Lalín, que vén de anunciar que en outubro amosará o potencial do Concello perante unha ducia de blogueiros.
Trátase dunha iniciativa impulsada dende Concellería de Turismo e diríxese a visualizar os atractivos locais perante bitacoreiros turístico de “influencia e prestixio”. Segundo fixo saber o concelleiro Francisco Vilariño, a iniciativa encamíñase a difundir o concello de Lalín e os seus recursos, contribuíndo a acadar a máxima promoción a nivel turístico en redes sociais e nos cadernos dixitais de cada participante, “coa repercusión que isto significará para o enriquecemento social, económico e cultural do concello”.
A iniciativa abranguerá xeiras de acollida de blogueiros durante unha fin de semana do mes de outubro. Durante esta estadía os impulsores do programa amosaranlles os enclaves de Lalín de meirande valor paisaxístico, natural, arquitectónico e histórico, incluída a Fraga de Catasós (un conxunto de gran valor ambiental declarado Monumento Natural e que acubilla, no seu seo, algúns dos máis senlleiros carballos e castiñeiros da nosa terra), as diferentes rutas do rural ou os emprazamentos máis salientábeis da propia vila. O Concello confía en que a estadía dos blogueiros en Lalín repercuta moi positivamente na presenza vindeira de visitantes, con todo o que ten isto de positivo para o comercio local e os eidos gastronómicos e hostaleiros locais.

Ningún comentario:

Publicar un comentario