xoves, 25 de agosto de 2016

As Librarías de Galicia permiten reservar libros de texto dende o móbil

Para este curso escolar que xa se achega, o curso 2016-2017, cómpre que teñamos en conta que o móbil pode sernos de utilidade á hora de facernos cos libros de texto das nosas nenas e nenos. De feito, a Federación de Librarías de Galicia puxo en marcha este verán, en colaboración coa Xunta, unha web acondicionada para aparellos móbiles que permite que fagamos as reservas do devandito material escolar para o vindeiro curso en calquera dos establecementos asociados á Federación. A web en cuestión é librarias.org/reservadelibros e nela, as nais e pais poderán formalizar a reserva de material de estudo dos seus fillos e sen necesidade de acudir á libraría.
Para tirarlle partido, os interesados deben acceder á dita páxina e cumprimenta os datos persoais, así como os relativos ao colexio e ao curso do alumno. Para facilitar a inclusión do listado de libros de texto, incorporouse unha funcionalidade a través da cal o usuario pode fotografar o listado, ou anexar un arquivo. A reserva dos libros de texto está dispoñíbel para todos os ciclos de Educación Infantil, Primaria, Especial e Secundaria Obrigatoria dos colexios da Comunidade galega. A solicitude remítese de forma automática á libraría a través dun correo electrónico, e as librerías poderán enviar notificacións aos clientes con confirmacións de dispoñibilidade de pedidos, por exemplo. A recollida de libros si que é presencial, na libraría, agás que se acorde coa mesma o envío ao domicilio.
Para promover este servizo de reserva en liña, os impulsores da iniciativa acompañaron a campaña de promoción coa posibilidade de recibiren os usuarios un premio. Así, o 30 de setembro sortearanse 100 estancias familiares na Ribeira Sacra durante o curso 2016-2017 entre as familias que realicen a reserva dos libros a través desta nova aplicación.

Ningún comentario:

Publicar un comentario