xoves, 18 de agosto de 2016

O Centro Demostrador TIC anuncia catro actividades para os meses de setembro e outubro

O Centro Demostrador TIC (CDTIC), promovido pola Axencia para a Modernización Tecnolóxica de Galicia (AMTEGA), ten como meta expoñer a oferta de produtos tecnolóxicos ás empresas doutros sectores produtivos dentro do tecido empresarial galego. No que vai de ano, AMTEGA leva organizadas 54 actividades (sesións demostradoras, seminarios de formación e encontros) para achegar as TIC a PEME e autónomos. Máis de 260 empresas participaron no programa formativo do CDTC ao que asistiron 1.200 persoas (207 a través da videoconferencia das aulas CeMIT e 326 vía streaming). Polo que atinxe ao que está por vir, o CDTIC está xa a preparar outras actividades que vai organizar no segundo semestre do ano. Máis polo miúdo, até o de agora hai catro eventos pechados entre setembro e primeiros de outubro.
Así, o día 13 do vindeiro mes de setembro retómanse os seminarios de formación coa actividade Atrae visitantes e convérteos en clientes co inbound marketing, que se celebrará na aula CeMIT de Ourense de 16 a 20 horas. A semana seguinte, o 19 de setembro, terá lugar unha nova sesión formativa, na aula CeMIT de Lugo, e leva por título Sácalles partido ás redes sociais para impulsar o teu negocio. O 29 de setembro, unha nova edición da sesión demostradora Xestión práctica dunha empresa de distribución alimentaria con Odoo, que chegará á aula CeMIT da Coruña. Xa no mes de outubro, o día 6, haberá unha sesión demostradora nas instalacións do CDTIC de Santiago: Controla os prezos dos teus competidores en tempo real con Boardfy.
Engadir que o CDTIC quer chegar ao maior número de usuarios posíbeis e para iso contará coa colaboración das principais aulas CeMIT de cada provincia, que retransmitirán as actividades a través do sistema de videoconferencia da rede. Así, as aulas da Coruña (Centro Cívico de Eirís), Lugo (O Castiñeiro) ou Ourense (La Molinera) serán o escenario dalgunhas das xornadas previstas.
Alén destas actividades, outro dos servizos cos que conta o Centro Demostrador e que cómpre salientar é o CDTIC Virtual, no que empresas, organizacións e persoas usuarias poden probar e avaliar distintas aplicacións en software libre a través dun servizo na nube nunha contorna privada, sen necesidade de dispor de recursos informáticos propios ou persoal con coñecementos avanzados de sistemas.
Arestora, as solucións dispoñíbeis son Xeshostal (software para a xestión hoteleira); Owncloud (servizo para partillar arquivos na nube); Odoo (ERP para a xestión integral dunha empresa); así como CiviCRM (software de xestión de relacións con clientes (CRM) encamiñado ao seu uso por parte de organizacións que traballan no eido social).
Aquelas persoas interesadas en solicitar a avaliación dunha das aplicacións dispoñíbeis non teñen máis que rexistrarse como profesionais ou empresas na web do CDTIC e logo solicitar a aplicación (ou aplicacións) que lles interesen.

Ningún comentario:

Publicar un comentario