martes, 16 de agosto de 2016

A Deputación de Pontevedra celebra o Día da Xuventude cunha convocatoria de selfies nas redes

A Deputación de Pontevedra quixo celebrar este 12 de agosto o Día Internacional da Xuventude (convocatoria mundial da ONU). Segundo fixo saber a presidenta da entidade provincial, “o obxectivo é promover unha xuventude participativa, comprometida coa sociedade e co benestar colectivo, coa educación, co emprego, coa saúde e co medio ambiente”. Silva lembrou que a Deputación ten arestora un servizo específico de xuventude, ao que se destinan 4,1 millóns de euros no 2016. Como actividade principal da celebración, a institución festexou a xornada cunha xeira colectiva de selfies e fotografías “co fondos e marcos creados para a ocasión”.
A través da iniciativa, que ten por obxectivo “fomentar a participación das mozas e mozos da provincia”, divulgaranse as imaxes obtidas nas redes sociais. En concreto, máis de 150 mozas e mozos participantes nas actividades de DepoRúarte da Deputación xa están a subir as imaxes dende primeira hora da mañá a través das etiquetas #diadaxuventude, #deporuarte e #depoaventura.
Carmela Silva lembrou ademais os programas que a institución provincial está a levar a cabo desde as áreas de xuventude e emprego centrados nas mozas e mozos da provincia. Así, a presidenta provincial falou do programa DepoRúarte (que está a artellar en 52 concellos de menos de 50.000 habitantes espazos de lecer alternativos e innovadores para a xuventude, con actividades educativas saudábeis e modernas) ou da iniciativa En Ruta coa Depo (23 roteiros que inclúen, entre outras cousas, surf, kaiak, visitas guiadas pola Ría de Vigo, O Morrazo ou O Grove).
Tamén lembrou a importancia para a mocidade de programas como SmartPEME, a nova andaina da rede CPAE 2.0 (o Centro Provincial de Asesoramento Empresarial, iniciativa constituída por seis centros atendidos por técnicos especializados en novas tecnoloxías e con sedes en Lalín, Cambados, Vigo, Pontevedra, Ponteareas e Porriño).

Ningún comentario:

Publicar un comentario