mércores, 17 de agosto de 2016

Intel presenta unha tecnoloxía de realidade virtual sen fíos

San Francisco está a acoller hoxe a celebración do Intel Developer Forum, encontro que abriu o director xeral da compañía, Brian Krzanich, desvelando o proxecto Alloy (aliaxe en inglés), unha solución todo-en-un de realidade virtual que busca redefinir esta tecnoloxía como un exemplo do futuro da realidade mesturada, que para o ano que vén ofrecerase como unha plataforma aberta e que chama poderosamente a atención polo feito de que carece de cables de conexión ao ordenador persoal, evitando así unha das principais molestias das solucións de realidade virtual actuais.
Este casco non só achega ao usuario unha maior liberdade de movemento, senón que valéndose da tecnoloxía Intel RealSense tamén pode detectar elementos do mundo físico para, por exemplo, evitar que choquemos contra unha parede real mentres nos movemos no mundo virtual ou para que podamos interactuar co elementos virtuais empregando as nosas propias mans, mesturando realidade e facilitando que os movementos físicos poidan ter resposta no espazo virtual.
Outra das grandes vantaxes da tecnoloxía RealSense integrada no casco de Alloy é que non será preciso distribuír sensores para detectar a nosa posición ao longo da habitación na que esteamos (como acontece con HTC Vive) de xeito que o propio casco sería un elemento independente de sensores externos.
Cómpre destacar que non estamos ante un produto para usuarios finais, senón para desenvolvedores, de xeito que agora compañías como Microsoft están a colaborar para conseguir unha boa experiencia de realidade virtual baseada nesta tecnoloxía, de xeito que para o ano que vén poderían ver a luz distintos dispositivos baseados en Alloy.

Ningún comentario:

Publicar un comentario