xoves, 7 de xullo de 2016

Imatia volve achegar estadías e formación avanzada aos universitarios de Telecomunicacións

A empresa galega Imatia está a achegar novamente formación especializada para os nosos universitarios de Telecomunicacións. E faino apoiando boa parte desta actividade educativa no emprego de tecnoloxía de seu para o desenvolvemento de software, a tecnoloxía Ontimize. Esta achega formativa intégrase no compromiso de Imatia co mundo universitario e co talento local, un compromiso que se materializa cada ano e que volve abrollar estes días coa estadía na sede de Imatia de estudantes en prácticas do Grao de Enxeñaría de Tecnoloxías de Telecomunicacións (Universidade de Vigo). A idea é permitir a estes futuros enxeñeiros un amplo achegamento ao que será o seu vindeiro traballo, ademais de achegar unha continuidade para a súa formación.
No curso deste ano participan 16 alumnos, dos cales 12 están na oficina de Imatia en Vigo e 4 na da Coruña. Todos eles reciben formación impartida por persoal da empresa, tanto acerca de Ontimize como doutras aplicacións relacionadas, co fin de aplicar logo os devanditos coñecementos adquiridos en diferentes tarefas a realizar durante as 240 horas que dura o seu período de prácticas.
Segundo informan os responsábeis de Imatia, “cremos que se trata dunha magnífica oportunidade para estes alumnos de Telecomunicacións, xa que é a súa toma de contacto co mundo empresarial ao que accederán en moi pouco tempo”. Ademais, a firma valora moi positivamente o feito de poderen traballar os alumnos con Ontimize, que é unha infraestrutura-marco corporativa que facilita o emprego das principais tecnoloxías usadas na actualidade para o desenvolvemento de aplicacións de negocio. Por exemplo, Angular, Java, CSS3, HTML5, Spring, Android, iOS. En palabras de Imatia, Ontimize “fornece un coñecemento que con toda seguridade será reaproveitado por estes estudantes durante a súa carreira profesional”.

Ningún comentario:

Publicar un comentario