Selectividade, o temor para 187 alumnos das bisbarras

Santiago acollerá dende o mércores as probas, con estudantes de oito centros da zona.

Toca ampliar as horas de estudo e temperar os nervios entre os case douscentos estudantes de Deza e Tabeirós-Terra de Montes que se enfrontarán este xuño ás probas de Selectividade. Este mércores, día 11, comezan os exames en Santiago tan esperados polo inminente salto á Universidade como temidos para 187 alumnos da zona, non só por ter que superalos senón tamén especialmente pola necesidade de conseguir a nota que de acceso á carreira soñada.

Na Estrada presentaranse un total de 59 alumnos. No instituto García Barros cursaron segundo de Bacharelato un total de 85, aprobando 47 e acudindo ao Selectivo 46. Neste centro houbo catro matrículas de honra, destacando o 9,78 de María Rey Bascuas. E no IES Antón Losada Diéguez serán dezaseis os que realicen a proba, trece deste curso e tres de pasados, e houbo trinta alumnos. Houbo unha matrícula de honra, de Jennifer Brea, con 9,53.

Dos dous institutos de Lalín serán 76 estudantes os que se examinen. Por parte do IES Laxeiro, dos 56 matriculados deste ano van corenta ás probas e concederon catro matrículas de honra, a máis destacada coa nota de 10 de Paula Castro Sesto. Non obstante, no IES Aller Ulloa, dos 70 que cursaron este ano só 36 acudirán a Selectividade. En canto ás matrículas de honra outorgadas segundo o número de alumnos, foron tres, a Leticia Diéguez, Sara Piñeiro e Mónica Otero.

En Silleda será 26 os que irán dos dous institutos da zona. Do IES Pintor Colmeiro irán 17 dos 27 matriculados, dos cales Claudia García Gómez se levou a única matrícula de honra con 9,75. No María Inmaculada só son nove estudantes os que irán dos vinte de segundo que cursaron este ano Bacharelato.

En Forcarei, polo instituto Chano Piñeiro asistirán ás probas de acceso nove estudantes, dos 16 matriculados. Finalmente, o IES Marco do Camballón de Vila de Cruces levará a dezasete alumnos dos 24 matriculados. Neste caso a matrícula de honra cun 9,45 foi para Isabel Carmoega.

Adeus a Selectividade 

Esta será unha das últimas edicións das probas para acceder á Universidade, xa que tras o decreto aprobado para o curso 2017-2018, o que coñecemos como Selectividade desaparecerá.