venres, 13 de xuño de 2014

Expertos galegos e internacionais debaten sobre o futuro do galego na educación infantil

O profesor da Universidade de Wisconsin-Milwaukee,Gabriel Rei-Doval; o sociolingüista Anik Nandi; o impulsor do proxecto Burela, Bernardo Penabade e o presidente de Avoaescola, Francisco López, tentarán realizar unha radiografía sobre a aprendizaxe do galego.

Sociolingüistas, profesores universitarios e activistas a prol da lingua debaterán sobre o presente e as posibilidades de futuro do galego na educación infantil. Será no marco dunha mesa redonda que se celebrará este venres, ás 19.30 horas na sede da Avoaescola, en Narón.
 
Nesta charla participarán Gabriel Rei-Doval, doutor en Filoloxía Galega e profesor de Lingüística Luso-Hispánica na Universidade de Wisconsin-Milwaukee. Na súa intervención, Rei-Doval, gran impulsor da difusión do galego nos EE.UU., fará unha interpretación da situación actual do galego no ensino en Galicia coas perspectivas sobre a súa aprendizaxe fóra, tanto en España como fóra dela. 
 
Tamén intervirá Anik Nandi, lingüísta bengalí que, traballa, actualmente na Heriot-Watt University de Edimburgo. Nandi é un investigador do ILG e da Cátedra Unesco de Patrimonio Lingüístico Mundial da UPV/EHU e especialista nas áreas de Política Lingüística, Linguas minoritarias e ameazadas e no ensino de linguas estranxeiras. Actualmente realiza a súa tese doutoral sobre sociolingüística galega e, na súa intervención, falará, precisamente, das semellanzas da situación sociolingüística de Galicia e da India.
 
Compartirán a mesa con Bernardo Penabade, profesor de lingua e literatura galega no instituto “O Perdouro”, en Burela e impulsor do Proxecto Burela e Neo de normalización e extensión da lingua galega. E tamén, con Francisco López, presidente da Cooperativa Avoescola e Galiza co Galego, organizacións que están a traballar na consecución dunha rede de escolas infantís en galego.

Ningún comentario:

Publicar un comentario