xoves, 19 de xuño de 2014

A CIG-Ensino exíxelle á Consellaría de Educación que dea instrucións aos centros para que non se cambien os libros de texto para o vindeiro curso

A aplicación da LOMCE está pondo en evidencia o desgoberno, o despropósito e o desprezo da Consellaría de Educación co profesorado, coas familias e cos centros educativos.

Os centros educativos tiñan de prazo até o 15 de xuño para mudar os libros de texto, mais hoxe por hoxe, 18 de xuño, a Consellaría no trasladou nin aos centros nin ás direccións ningunha instrución ou circular sobre como proceder ante a nova situación, consecuencia dos cambios de currículos e da implantación da educación primaria. Nin sequera respondeu a aquelas direccións que se dirixiron directamente á Consellaría para ter información e coñecer a que aterse para fixar os libros de texto para o vindeiro curso.
A Consellaría, con este comportamento irresponsábel, pretende que sexan os centros os ue resolvan unha situación conflitiva inducida pola propia Consellaría que se opta por cambiar os libros de texto, pode comportar, nalgúns casos, un gasto extra ás familias. 
A Consellaría de Educación só está obsesionada por subordinarse aos intereses do PP de Xénova e por iso non ten inconveniente en actuar con total improvisación e impunidade á hora de aplicar a LOMCE. Non lle importa que o día 1 de setembro se inicie o novo curso escolar, no que está prevista a aplicación da LOMCE nos cursos 1º, 3º e 5º de Primaria, sen que se estean publicados os currículos nin se coñezan os criterios de avaliación desas etapas, malia que ao inicio do curso é cando se aproba a programación dos departamentos e a programación xeral anual de centros.
A CIG-Ensino, diante de tanto desatino, desleixo e improvisación, exíxelle á Consellaría que urxentemente remita aos centros unha circular clara no sentido de que se continúe cos libros de texto actuais para o vindeiro curso, a fin de impedir un gasto innecesario ás familias, moito máis inxustificado neste momento de crise que tan cruelmente está golpeando as clases populares galegas. Ao mesmo tempo, exiximos, mais unha vez, a gratuidade universal dos materiais curriculares e dos libros de texto, mediante a modalidade de préstamo.

Ningún comentario:

Publicar un comentario