luns, 16 de xuño de 2014

A CIG-Ensino defendeu no Consello Escolar Galiza unha emenda á totalidade solicitando a retirada do proxecto de FP Básica

A CIG-Ensino presentou outras 25 emendas co obxecto de modificar os aspectos máis lesivos deste decreto 

A CIG-Ensino presentou este xoves 12 de xuño no Consello Escolar de Galiza, unha emenda á totalidade solicitando a retirada do proxecto de Decreto que regula a Formación Profesional Básica recollida na LOMCE por tratarse dun modelo que pretende segregar o alumnado no ensino obrigatorio e conformar un sistema a educativo estratificador, clasista e selectivo. As emendas a totalidade votáronse conxuntamente e foron rexeitadas por 17 votos en contra e 16 a favor. A CIG-Ensino presentou outras 25 emendas para modificar os aspectos máis lesivos para o ensino deste proxecto de decreto. Coincidindo con este debate a Plataforma Galega en Defensa do Ensino Público concentrouse ás portas da sede do Consello Escolar de Galiza.
“A situación é tan esperpéntica que o profesorado terá que impartir para o vindeiro curso unha nova modalidade de FP cos seus títulos correspondentes, que se publicará -no mellor dos casos-  en Agosto, candos/as docentes  teñen que ter as programacións feitas e o curso organizado e en funcionamento no mes de setembro”, explica Anxo Louzao. “O  obxectivo da CIG-Ensino é que non se aplique este modelo de ensino para o próximo curso”.
A solicitude de retirada deste proxecto por parte da CIG-Ensino fundamentase, tamén, no seguinte:
  • A carencia de debate e participación de profesorado.
  • A improvisación existente durante  o procedemento de tramitación, o que mesmamente levou a que a Permanente do Consello Escolar  de Galiza ditaminara un proxecto de  decreto baseado nun real decreto que estaba sen aprobar polo Goberno central.
  • En que estamos ante un proxecto  que se pretende aplicar para o curso que vén  sen que se coñeza, nin se negociara mapa algún da FP. “A obstinación de querer aplicala para o próximo curso amosa a total vasalaxe do conselleiro aos intereses do PP e non as necesidades que ten o sistema educativo galego”, explicou Anxo Louzao, secretario nacional da secretario Nacional da CIG-Ensino e membro do Consello Escolar de Galiza.
  • En que afianza un modelo de educación de formación profesional dual que supón maior privatización e ordenación da formación polas empresas.
  • Esta é unha modalidade de formación que nada ten que ver coa estrutura do noso país.
  • En que propón unhas ráteos de 30 alumnos por aula cando este nivel educativo se por algo se debe caracterizar, tendo en conta o alumnado o que vai dirixido, é por unha formación personalizada.
  • Ademais o alumnado que non aprobe a reválida non vai ter título de ESO.
  • Este proxecto non garante nin sequera o transporte escolar ao alumnado.
  • Carece de oferta de ciclos de todas as familias profesionais e non garante os recursos necesarios educativos nos centros nos que se vai impartir.
  • Non asegura, nin sequera, os mínimos establecidos no decreto de plurilingüísmo ao non establecer os módulos que ese deben impartir en lingua galega.
  • Liquida o módulo de Iniciativa Persoal e Relacións Laborais.
  • Na falta de negociación na Mesa Sectorial e na negativa a contrastalo cos lexitímos representantes do profesorado.

Ningún comentario:

Publicar un comentario