venres, 20 de xuño de 2014

Como se pode manter viva a lingua galega?

Un libro recolle o pensamento do antropólogo Lévi-Strauss para “contrarrestar” con "ideas e argumentos" a situación de debilidade que está a sufrir este idioma.

“A defensa do noso idioma é unha batalla fundamental dun obxectivo máis amplo, a supervivencia da nosa cultura, o cal á súa vez se enmarca no contexto da interacción entre as diversas identidades culturais do noso planeta”. Así comeza o limiar de “Ás voltas coa diversidade cultural: as conferencias de Claude Lévi-Strauss para a Unesco”, un libro no que traballaron José M Anguita Jaén, José M Álvarez-Castro e María Xosé Rodríguez Valcárce, que recolle parte das intervencións deste gran antropólogo.
 
E é que un dos principais obxectivos é demostrar como a lingua é fundamental na pervivencia dunha cultura. “Tanto a tentativa de preservarmos en xeral a diversidade cultural como a de mantermos viva en concreto a nosa lingua veñen sendo obxecto nos últimos tempos de agresións máis ou menos explícitas, máis ou menos bastas, mais nunca inocuas”, apunta o autor.
 
Por iso, neste volume, recóllense as conferencias que Claude Lévi-Strauss elaborou por encomenda da UNESCO contra o racismo, sentando as bases dunha civilización mundial na que as diversas culturas poidan perpetuar a súa orixinalidade de xeito harmónico. “Estamos daquela a botar man de décadas de esforzo internacional na procura dun consenso sobre diversidade cultural, e a empregalas como compás co que navegarmos en galego no mar da civilización mundial”, engade.

“Presión mediática”

En parte, a situación lingüística deteriorase pola “presión mediática da factoría neoliberal” que “conta coa infraestrutura dos lobbies da desinformación”. “No caso concreto da defensa da nosa cultura, moi nomeadamente da nosa lingua, temos visto como, sobre todo dende os tempos da busca e captura do bipartito, se artellaron estratexias neoliberais de presión mediática con argumentos completamente falaces, pero disfrazados de sentido común a través do concepto de defensa das liberdades individuais (las lenguas no tienen derechos, etc)”, sinala o autor.
 
Por iso, esta obra tenta “contrarrestar” estes ataques. “Con este libro, propómonos daquela voltar ó terreo das ideas e dos argumentos dun xeito accesíbel; propómonos apelar á ecuanimidade a través da presenza de interlocutores neutrais....Existen unhas directrices consensuadas que están en total desacordo cos contidos dos ataques dos que estamos a ser obxecto. Con este libro, queremos pór este problema de manifesto. Unha das directrices que nos pode valer de exemplo é a de que non existe tolerancia pasiva”. 
 
O libro, que conta coa axuda da Deputación de Lugo, foi presentado no Museo Provincial de Lugo a finais do pasado mes dentro do ciclo "Maio de Lingua" organizado por esta institución. Aínda non teño datas/lugares para as vindeiras presentacións do libro. Non dubides en preguntarme calquera dúbida que che quede, ou en pedirme máis información sobre calquera punto.

Ningún comentario:

Publicar un comentario