Alumnos e pais chaman á folga este mércores con protestas por toda Galicia contra as 'reválidas'

Os alumnos dos centros galegos están chamados a ir á folga este mércores en contra da Lomce e as 'reválidas', nunha convocatoria impulsada polo Sindicato de Estudantes en todo o Estado e apoiada pola Confederación Española de Asociacións de Padre e Nais de Alumnos (CEAPA).

Os alumnos dos centros galegos están chamados a ir á folga este mércores en contra da Lomce e as 'reválidas', nunha convocatoria impulsada polo Sindicato de Estudantes en todo o Estado e apoiada pola Confederación Española de Asociacións de Padre e Nais de Alumnos (CEAPA).
A xornada estatal de paro (dende Infantil ata a Universidade) terá como eixe central diversas manifestacións programadas en todas as comunidades autónomas.
No caso galego, o Sindicato de Estudantes manifestarase xunto coa Plataforma en Defensa do Ensino Público (conformada por UGT, CC.OO. ou Confapa, entre outros) ás 12.00 horas en A Coruña (Praza da Palloza), Ferrol (praza de España), Compostela (Alameda), Vigo (Praza América) e Ribeira (IES nº1).
Ademais, a plataforma tamén convocou protestas pola tarde, ás 19.30 horas, en localidades como Ourense, Pontevedra e Lugo.
A protesta está secundada pola Confederación Galega de Anpas de Centros Públicos (Confapa-Galicia), que animou ás familias galegas a colaborar para "variar as aulas" e acompañar os seus fillos nas súas reivindicacións contra a Lomce.
A convocatoria conta co apoio, entre outros, de PSOE, Podemos e IU. En Galicia, autoridades acudirán a apoiar as protestas dos alumnos, como Xoaquín Fernández Leiceaga (PSdeG) que participará na marcha de Santiago e Eva Solla (IU e En Marea) en Vigo.
A chamada á folga do Sindicato de Estudantes non conta, non obstante, co apoio das asociacións xuvenís da órbita nacionalista.
A organización de alumnos Erguer! publicou un comunicado no que rexeitan sumarse á convocatoria, ao ser proposta "unilateralmente", sen contar "con outros axentes" e sen traballo movilizador do alumnado.
Neste sentido, criticaron os procedementos do SE con este tipo de protestas "buscando grandes titulares" e apostaron polo traballo "continuado" nos centros ao lado do alumnado.
PLATAFORMA GALEGA
Nesta xornada de loita contra a Lomce, a Plataforma Galega en Defensa do Ensino (conformada pola CIG-Ensino e Anpas Galegas, entre outras entidades) celebrará concentracións pola tarde dentro da súa campaña "en contra das reválidas".
En concreto, serán ás 18.30 horas en Pontevedra (praza da Peregrina), ás 19.00 horas en Compostela (Praza Roxa), Vigo (Farol de Urzaiz), Lugo (IES Nosa Señora dos Ollos Grandes), A Coruña (Praza de Pontevedra), Ferrol (Praza de Amada García) e Ourense (xardíns do Padre Feixoo); e ás 20.00 horas en Carballo (praza do Concello), Cee (praza do 8 de marzo) e Vilagarcía (praza de Galicia).