martes, 25 de outubro de 2016

Educación impulsa un proxecto educativo europeo a prol da integración coas TIC

Co obxectivo de favorecer para o ensino novas tecnoloxías integradoras e democráticas (cen por cen accesíbeis e cen por cen a prol da plena inclusión) púxose en marcha o proxecto europeo KA204 GAMESP – Physical and virtual Games for Education and social Insertion of intellectually handicapped People, no marco da presente convocatoria Erasmus+ 2016. A iniciativa, por certo, está liderada pola Consellería de Cultura e Educación da xunta. En termos máis concretos, o programa encamíñase a tirar proveito das novas ferramentas e da robótica para impulsar a inserción social de alumnas e alumnas con diversidades intelectuais e cognitivas.
A primeira xuntanza transfronteiriza do proxecto celebrouse esta semana que vimos de deixar atrás no Museo Pedagóxico de Galicia (MUPEGA) en Compostela, e nela reuníronse os sete socios participantes, procedentes de cinco países. Segundo informa Cultura e Educación, ao abeiro desta iniciativa desenvolverase unha plataforma en liña e unha comunidade virtual na que as persoas adultas coas devanditas diversidades e os seus educadores poidan xogar, desenvolvendo “unidades de ensino”, con ferramentas virtuais, “así como interactuar con robots reais que teñan na casa ou no seu centro”. Ademais, o proxecto quere involucrar os pais e nais nas actividades. A dita plataforma, entre outras finalidades, permitirá controlar e programar un obxecto físico ou un robot virtual realizado (tamén) para a ocasión e ao abeiro deste proxecto.
A plataforma tamén incluirá 10 unidades de ensino baseadas en xogos existentes e en xogos novos, que poden ser creados a partir de adaptación para o devandito.

Ningún comentario:

Publicar un comentario