luns, 22 de xuño de 2015

Os fogares galegos teñen cada vez menos nenos e máis vellos

Un terzo de fogares ten nenos e un de cada cinco só maiores de 65. Do 1.060.774 de fogares de Galicia, 346.711 tiñan nenos e 229.802 estaban habitados por xubilados. En 2013 tamén aumentou o risco de pobreza en 0,12 puntos.

Os nenos van camiño de converterse nun ben preciado en Galicia. E é que menos dun terzo dos fogares galegos teñen nenos, mentres que xa en máis dunha quinta parte das vivendas só hai familias maiores de 65 anos.
 
Segundo os datos divulgados polo Instituto Galego de Estatística (IGE), só o 33,24% dos fogares galegos tiñan nenos a cargo, aínda que a taxa era de 37,23% na provincia de Pontevedra e de 28,50% na de Ourense. Así mesmo, o 21,66% dos fogares estaban integrados por persoas de 65 ou máis anos, aínda que na provincia de Ourense alcanzaba o 28,57% e na de Pontevedra o 18,56%.
 
As familias de dous adultos e un neno representaban o 11,90% dos fogares e as de dous adultos con dous ou máis nenos 10,19%, e só o 2,30% tiñan tres ou máis adultos con polo menos dous nenos a cargo.
 
Segundo cálculos do IGE, a finais de decembro de 2013 había en Galicia un total de 1.060.774 fogares, dos que 346.711 tiñan nenos e 229.802 estaban habitados por xubilados.As estatísticas tamén mostran que 312.435 adultos de 18 a 34 anos residían no fogar dos seus pais, dos cales 141.179 carecían de ingresos.
 
Aumenta a pobreza
 
Por outra banda, en 2013 a taxa de risco de pobreza en Galicia aumentou en 0,12 puntos para situarse no 16,57% da poboación e o 22,83% da poboación residente estaba en risco de pobreza ou exclusión social, 0,75 puntos máis que o ano anterior, apunta o IGE. 

Ningún comentario:

Publicar un comentario